بعد معاناة وتعب وبحث يومين
وتحمل ملاقة بعض الإيميلات
وصلت لغايتي في البحث عن معلومات عن محمد إبراهيم
بس قبل لا أبلش
الكل إستانس على ترشيح الخرافي للعدساني لرئاسة ديوان المحاسبة
و والنعم بالعدساني كشخص
لكن الريّال عمره تجاوز الثمانين
الله يعطيه طولة العمر إن شاء الله
لكن شنو وشكثر يقدر يقدم وإهوا بالهعمر؟؟
إنزين خل أدش بموضوعي
عن الكابتن محمد إبراهيم
بغض النظر عن الشبه بينه وبين صدّام حسين بالشكل
هذا مو موضوعي
وبغض النظر وين ساكن ابوه مثل ما قال لي فريج سعود
محمد إبراهيم لاعب سابق بنادي القادسية والمنتخب الوطني
من أبرز إنجازاته كلاعب اهو كأس الخليج في الكويت سنة 1990 وإهوا هدّاف البطولة
وكاس الأمير 89 ضد العربي انتهت 2-1 وإهوا صاحب أحد أهداف النهائي
وبطولة الدوري 1992 وغيرها من البطولات القدساوية
بس كل هذا مو مهم
سواء كان لاعب زين او مو زين ما يهم لأني بتكلم عنه كمدرب
خل اقول لكم الارقام لأني أحب لغة الأرقام وعمرها ما تغلط
محمد إبراهيم أول مدرب بتاريخ القادسية ييب لهم بطولة الخليج مو مرة مرتين وكاد ان ييب الثالثة لولا ايقاف النشاط الرياضي قبل جم شهر
محمد ابراهيم اول مدرب بتاريخ الكويت ييب بطولة ولي العهد والأمير والدوري بسنة وحدة مع بعض
محمد ابراهيم اول مدرب يوّصل فريق كويتي لقبل نهائي آسيا للأندية بشكلها الحالي
وغيره من انجازات على مستوى نادي القادسية
انزين على مستوى المنتخب
محمد ابراهيم اهوا المدرب اللي كسر العقدة السعودية مع الكويت وفاز عليهم بكاس الخليج 17 بقطر 2-1 وإهيا المرة الأولى اللي نفوز على السعوديين بكاس الخليج من 96 يعني على مدى 8 سنوات
واهوا المدرب اللي كسر العقدة البحرينية وفزنا عليهم بكاس الخليج الأخير بعد ثمان سنوات عجاف
محمد ابراهيم درب المنتخب الكويتي على المستوى الأولمبي والأول في 23 مباراة رسمية
فاز في 11 مباراة منهم بنسبة 47.8% يعني النص تقريبا
مع ان الفريق هاوي وماكو ملاعب وماكو اي مقومات رياضية سليمة
في حين ان فيليب سكولاري مدرب منتخب البرتغال سابقا في آخر إحصائياته مع المنتخب البرتغالي درّبهم في 18 مباراة فاز في 9 منهم بنسبة 50% يعني النص بالضبط
ومثل ما تلاحظون ان نسبة محمد ابراهيم مع سكولاري متقاربة جدا بالأرقام
مع الفوارق بالمستويات المنافسة طبعا بس هم محمد ابراهيم فريقه (منتخب الكويت) كله قيمته 750 الف دولار اهيا قيمة انتقال احمد عجب
في حين ان قيمة فريق سكولاري تفوق ال 70 مليون دولار
وللعلم ان بالارقام محمد ابراهيم اهوا افضل مدرب درّب منتخب الكويت في ال 11 سنة الأخيرة بما فيهم المدرب الألماني بيرتي فوغتس والبرازيلي كاربجياني وأثنيناتهم مدربين عالميين
وإهوا افضل مدرب بتاريخ نادي القادسية على الإطلاق وحقق مع الفريق الحالي اكثر مما حقق فريق جاسم يعقوب والدخيل
انزين قبل لا اقول شنو ابي من كل هالكلام
في ناس راح يقولون مو اهوا اللي سوا هالشي الفريق اللي يدربه جاهز ومستعد ومتجانس
وعشان نسكر هالباب
محمد ابراهيم حقق كاس الاندية الخليجية مع القادسية سنة 2000 وماكان في الفريق بذاك الوقت ولا لاعب يلعب اليوم
وهذا يبين ان مو الفريق اللي شايل محمد بل العكس صحيح
اللي ابي اوصل له من هالكلام ان محمد ابراهيم اهوا اكفأ مدرب للمنتخب حاليا وأرقامه تتكلم وخسارة من عمان ما تجدّم أو تأخر بإنجازاته
اللي يطالب الاتحاد ان يشيله هذا ما يبي مصلحة الكرة الكويتية وخصوصا حاليا
بس لحظة ليش محمد ابراهيم قرر ينسحب فجأة من تدريب المنتخب؟؟
قبل المباراة المهمة لنا مع عمان يوم 28-1-2009 بيومين طلع لن إبن الشهيد الوحيد ورئيس نادي القادسية وقال بالحرف الواحد
لن نجدد إعارة إبراهيم للمنتخب
هذا يعني اداري ورياضي مخضرم وقائد
بالله هذا تصريح وهذا وقت تصرح فيه
المنتخب عنده مباراة مهمة
وانت تقول حق اللي يحط خطط للمنتخب ان ترى ما راح تكمّل معاهم
وباقي لك مباراة وترجع؟؟
وين العقلية الفذة لدى أبناء الشهيد والحنكة
ولاّ كل هذا صار فيك بعد ما خرّبت الرياضة وإندقرت من قرار الأمير بتطبيق نظام ال 14 عضو
هذا بالله انسان همّه الرياضة الكويتية
ومسيكين محمد ابراهيم لا حول ولا قوة
ملتزم مع نادي القادسية بعقد ورئيس النادي ما يبي محمد ابراهيم يستمر مع المنتخب
مع العلم ان مباراتنا اليايه بأول ثلاثه يعني بعد شهر
يعني لو اي مدرب يي الحين يدربنا ما يمديه حتى يحط خطّة
بس لأن طويل العمر طلال قال لأ خل يولي منتخبكم
وطويل العمر الثاني أحمد الظاهر ما يقدر على اخوه
فخلّوا المنتخب يولي وبالطقاق بسمعة الكويت
ما صدقنا على الله نلاقي منتخب يرد الروح وفيه عزيمة وخطة وثبات
يات القبضة وطشّرت الأمل
شكرا بو نواف على اللي قدمته
ولا بد من كلمة شكر توجه لك في ظل هالجحود اللي اشوفه واسمع واقراه من وايد ناس تكلموا وقطّوا كل بلاوي الكرة الكويتية على راسك
عسى الله يوفقك يا ولد الكويت
اللي يبي ينتقد محمد ابراهيم بهالبوست خل يكتب لي بالمنطق والارقام
مو يقول لي سمعت ان لاعب قال عنه جذيه او بالديوانية يضحكون عليه
حطيت لكم ارقام ودوّرت وايد
احترموا البحث وحطوّا نفس الشي
ولا عزاء للكويت ورياضييها في ظل وجود الأخوان رحباني
Authoress
بالذمة شرايج بالبحث هذا والمعلومات والأرقام؟
14 comments:
daana ... bi ghath il nathar 3an loghat arqaamich elly maatghali6 (jaasim lihwaidy kaan haddaaf il 3aalam bil arqaam .. fa hal sinat'ha kan a7san min ronaldo ?)
il rayyaal ghala6 ghal6aat takteekiyya ib kaas il khaleej o thid 3man tawwa waa7id ib oola ibtidaa'y mayghali6ha ... tabdeelat ghala6 o khi6a6 ghala6 ... kan lazim yamshee ... o tamasokka ib 3ajab kan akbar ghala6 daamah mo ga3id ibayyin bil imbarayat ... fa ismi7eelly .. awwal marra bagool innich ghal6aana ghal6aana ghal6aana ! la'anna sij laqab il mishnis yin6ibiq 3alaih !
o li 3ilmich .. loghat il arqaam .. idaarat il i7saa' il 3alamy gabil 3 sneen 7a66at inna 7asab il arqam inna naady il Kuwait bil markaz il 50 3al 3alam o inna a7san min lazio elly kaan wagt'ha khaamis il dawry il i6aly ... haathy arqaamich elly matghali6 ?
وين ساكن ابوه؟؟
عدل الاسلوب يالهيلقية
محمد ابراهيم اهوا المدرب اللي كسر العقدة السعودية مع الكويت وفاز عليهم بكاس الخليج 17 بقطر 2-1 وإهيا المرة الأولى اللي نفوز على السعوديين بكاس الخليج من 96 يعني على مدى 8 سنوات
واهوا المدرب اللي كسر العقدة البحرينية وفزنا عليهم بكاس الخليج الأخير بعد ثمان سنوات عجاف
من هالسطر وقفت قراءة الموضوع
Ana A2aydiich 100% o bo nawaf ma
ga9ar kafaa o wafaa o 3asaah 3al guwa :)
يا جماعه ذبحتونا العقده البحرينيه والعقده السعوديه, الموضوع كله انهم احسن من فريقنا الحين يعني مو احنا نلعب واهم يفوزون. يعني نقدر نقول المانيا عقدة السعوديه ما فازت عليها لأ لأن مستوى المانيا احسن من السعوديه هذا شي طبيعي.
فريقنا على هالمنطق كل دول الخليج عقدته لأنه الاضعف. (ما عدااليمن والله يستر لا تصير عقده)
اولا محمد ابراهيم شخصيته صفر جدام اللاعبين
ثانيا عنده تفرقه واضحة ويميز بين اللاعبين
ثالثا لو محمد ابراهيم مدرب زين جان اختاروه بالبداية مو اذا توهقوا نادوه
رابعا مدرب ردود أفعال ما عنده تكتيك أو فكر كروي محترف " مدرب على قده "
خامسا انجازات القادسية من اللاعبين مو منه
سادسا مع احترامي له بس من الظلم و الاجحاف مقارنة سكولاري فيه
ودمتم بود
سكولاري الي يتساوى حاليا مع محمد ابراهيم في نسبة فوزه في المباريات يدرب نادي تشلسي الانجليزي
واذا كان محمد ابراهيم احسن مدرب في هذه الفترة للمنتخب فهو لسبب واحد فقط
المنتخب ما عاد يفرق معاه اي مدرب
الكرة بالكويت كلها خرطي بخرطي ما فرقت محمد ابراهيم يدربهم ولا خليلو ...خشق
loooooool bahma mama
عجبتني نقطة العُقده و فعلاً شي يضحك طلق العقد على كل من هب و دب .
ومحمد ابراهيم واجد زين :)
سعود .. وين ساكن أبو محمد ابراهيم؟؟
حتى بالرياضة نقولكم
ماعندنا غيره
هاردلك المقارنة بين محمد إبراهيم و سكولاري .. نسبة الفوز مالها شغل بين هالأثنين .. سكولاري جابل منتخبات عالمية فيها لاعبين بالملايين إذا ما وصلت قيمتم إلى مليار .. ومحمد إبراهيم جابل منتخبات بو ربع دينار .. ويعني آنا إذا طقّيت 5 هنود مسّحوتين أصير مثل اللي طق 5 أفريقيين جحافل !! أدري المثال الأخير يلوّع الجبد بس يا حجية دانة .. شتّان ما بين الأمرين
فريج سعود
ما سبب تسمية
خليلو ...خشق
بهذه التسمية ؟
محمد ابراهيم حقق كل انجازاته وماحصل اي تقدير او تكريم. وكان يدرسنا بنفس الوقت في ثنوية النجاح بالسره :)
Post a Comment