27/01/2009

طماشة

اليوم الثلاثاء الساعة 7 في ندوة بجمعية الخريجين بعنوان

مالجديد في الحكومة الجديدة؟

يحاضر فيها النائب السابق مشاري العصيمي

المهم

في شي ماني فاهمته 

واحد من سنتين يقول صواريخنا تصل لحيفا وما بعد حيفا وما بعد بعد حيفا

والثانيين

خطفوا طيارات وفجروا اهم مبنيين اقتصاديين بالعالم ووين بأمريكا

ومسوين لوية بالعراق صار لهم 6 سنين
 
ومسوين لوية بباكستان وأفغانستان

ابي هذيل كلهم وينهم عن اسرائيل
 
وليش ما يطقونهم

ويطبقون جهادهم الإسلامي اللي يدعونه؟؟؟

انزين الحين خالد السلطان قائد السلف يبيع خمر بلبنان

ووزير التجارة احمد باقر تابع لخالد السلطان بالتجمع السلفي

شلون يحرم فترينة المحلات ورئيسه بياع خمر؟؟؟

مو مشكلة

يقولون ان في اسهم بالبورصة صار سعر مليونها ب اقل من 10000 دينار

ليش ما ينقلون البوصة حق المحاميد

لأن التنافس اقوى هناك

باجر لعبة المنتخب مع عمان بستاد الصداقة والسلام بالعديلية الساعة ست

ويقولون الدخول مجاني

وهذا اغبى قرار

يعني دشة الملعب ما تعدي دينارين ليش تخلونها ببلاش

دام مو هامتكم الفلوس

خلوّا الدشة بفلوس ومردودها حق اللاعبين بس

يعني متوسط سعر التذكرة دينار ونص بعشرين الف مشجع هذي 30.000 دينار

وزعوها على اللاعبين بدال شغل البلاش الغبي اللي قاعدين تسوونه

انزين سؤال الحين اسرائيل شبعت قتل ووقفت اطلاق النار

قبل لا يدش فبراير

يصير نسوي حفلات ولاّ خالد السلطان وربعه ما يرضون

بيني وبينكم في مشاكل وايد

وكلها تستاهل موضوع كامل

لكن الربع مكتفين بالطماشة والانتقاد بدون فعل

محد يبي يسوي شي

فنتطمش معاهم ونشوف المشاكل يوم عن يوم تكبر

خنشوف نية التحرك متى تصير

عموما

هذي مدونة يديدة اسمها معمعة

وهذا فيديو يديد كان ممكن يكون احلى لكن نشجع كل الجهود



10 comments:

Mohammad Al-Yousifi said...

ويقولون الدخول مجاني



وهذا اغبى قرار



شنو بتحضرين ؟

Bloggerista said...

اقتراح المحاميد يازلي

و حفلات هلا فبراير ما يندرى شبيصير عليها

بيت القرين said...

مطقوق
ليش لأ

فاشن
ما راح يصير شي كالعادة

مركبنا said...

بيت القرين
خطير اللوك الجديد
مبروك
شغل عدل

=======
صاجه بخصوص المنتخب

-------
بس على فكرة بخصوص السلطان انا ما احبه ولا اواطنه
لله في الله
بس الاسبوع الي فات قالوا لي مصادر جدا قريبة منه
ان مركز سلطان صار فقط لاخوة واهو طلع منه

الدســتور said...

متأمله خير بالربع

ماعندهم غير لاكلام للاسف

Anonymous said...

حتى تاريخ اليوم 27-يناير-2009
خالد سلطان العيسى لازال يملك بمركز سلطان

http://kuwaitse.com/PORTAL/A/Stock/Stock.aspx?Stk=610

مَـــــعْــــمَــــعَـــــه said...

اولا خالد السلطان عليه وايد مآخذ بس ما نبي نتكلم فيه مو ناقصين سيئات ولا نبي نزيده حسنات

وبالنسبة حق فلوس التذاكر انا ما اوافق ان يعطونهم اللاعبين وافضل يشترون لهم 3 مليون سهم واذا تعدل السوق يعطونهم الارباح بالتاكيد المبلغ راح يكون اكبر

اخيرا شكرا جزيلا على الدعاية الغير مدفوعة التكاليف .

Bad-Ran said...

يبيع خمر !
استغفر الله

Anonymous said...

حتى أيام الغزو العراقي مركز سلطان كان يبيع بيرة نعم بيرة (ب كحول)

Anonymous said...

خالد سلطان بن عيسى لا يملك اي سهم او حصه في مركز سلطان

و المعلومات اللي في سايت البورصه اثريه مو شي يدي

مركز سلطان مملوك بالكامل لاخو خالد السلطان و اسمة جميل السلطان