07/01/2009

شفيكم


أول شي معركة خالدة دارت رحاها اليوم 10 محرم بين الحسين بن علي بن أبي طالب عليهم السلام وأصحابه ضد عصبة من الأشرار

إنتهت بإستشهاد الحسين وأهله وأصحابه

بس المفارقة ان اللي خسر هذي المعركة جسديا اهوا اللي يذكر بالخير على مدى الأزمان

عظم الله أجر كل إنسان على وجه الأرض في هذا اليوم

ودامنا بهالسيرة يا جماعة الرفاعي قاعد يحن ويوزع ستكرات ويحط اعلان بالوطن صفحة اولى صوموا العاشر من محرم

عسى صايمين بس؟؟

انا بيني وبينكم خفت ما اصوم فيطقني
فما صمت

:)

مشكور يالرفاعي على التذكير وفي ميزان حسناتك ان شاء الله التذكير اللي قاعد تسويه وعظم الله اجرك في وفاة يدّك

اليوم الأربعاء مباراة المنتخب مع البحرين الساعة سبع

واقولها بكل ثقة وفخر مبروك عليكم الفوز إن شاء الله اليوم يا كويتيين

ودامنا بالكرة وخليجي عيل ابشركم ان الرفاعي صاحبنا يقول الكرة حرام



شوفو المطوية بموقعه واستمتعوا


واذا خسرنا بكاس الخليج ترى اشوه لأنها كلها فسق وفجور

والخير بقبال بعد

خنشرع للرفاعي وربعه البيبان زود وراح يحرمون المدونات مو يمنعونها لا يحرمونها

يالله خل ادش بالموضوع


كل شي يمنع بالكويت

هلا فبراير استهبلوا ومنعوها عشان غزة وهذي قمة الإستهبال

انا بسأل بالذمة شتفرق اذا كويتي راح هلا فبراير او ليالي فبراير واذا ما راح

هل راح تتحرر غزة جذيه؟؟؟

انزين الكويتيين او اي دولة عربية ما راح يحررون فلسطين ولا راح يروحون يحاربون الصهاينة وهذا شي خالصين منه بدون نقاش

اذا عندهم حلّين يا إما ان يتبرعون لهم ونص الفلوس او ثلاث ارباعها ما ندري وين تروح

او ان يقعدون ساكتين ويرفعون جواتيهم وبراقعهم

شنو احسن؟؟

اعتقد ان الاجابة المنطقية اهيا ان يتبرعون بفلوس تساعد في انقاذ الناس سواء صحيا او غذائيا او حتى مأوى لهم

انزين محلولة خلّوا ريع هلا فبراير نصه او كله حق غزة ومنكوبيها؟؟

طبعا الطبطبائي وكل من شمّر عن لحيته لإلغاء هلا فبراير كانت السالفة لهم حجّة عشان يلغون هذا المهرجان المحارب من 99

بحجة ان ما يصير نفرح واهل غزة يتعذبون

انزين عيل ما ابي اسمع او اشوف صورة الطبطائي او اي لحية رايحة عرس خلال فترة ازمة غزة

ولا ابي اشوف اي واحد منكم تارسين صفحات المجتمع بالجرايد

بس طبعا السالفة كلها تأليف بتأليف

لا والمضحك ان غير الغاء هلا فبراير مهرجان الدوحة هم تم الغاءه

والدوحة مشرعة بيبانها حق اولمرت وشلّته تلغي مهرجان الدوحة !؟؟

صج يا أمة ضحكت من جهلها الأمم

عموما أحمد عيسى كاتب مقال جميل عن هالموضوع بالجريدة اليوم


انزين هذا خبر وخلصنا منه


موقع الأمة من يومين كاتبين عن حملة جريدة الوطن اليديدة على مؤسسة البترول ورسم لها سيناريو ما سيحدث بالمستقبل

وأنا أتفق معاهم بالسيناريو اللي متصورينه

بس اقول ان المشكلة مو من الوطن بس

المشكلة من الرئيس اللي حتى وزارة مو عارف يشكل

هذا اللي ينفع يدير الديرة؟؟

ونروح حق الطامة الكبرى اللي اهيا القرار اللي طلع امس من اللجنة التشريعية بالمجلس

يقول القرار يا محفوظين السلامة

ان اللجنة التشريعية ترفض رفع الحصانة عن نواب الفرعيات ؟؟؟

هذي لجنة تصون وتحمي القانون

بعد شنو في أسوأ بعد بيصير

شوية جذّابين ماسكين لجنة مهمتها حماية القانون

لكن المأساة كل المأساة اهوا هدوء التيار المدني

التحالف من يوم الإنتخابات الى اليوم ما سوّا ولا شي الا غبقة وندوة؟؟؟؟

حتى ديوانيتهم الإسبوعية ما قاموا يقعدون

هذا تحالف مفروض يحرك التيار يعني؟؟

والمنبر مستانسين كل اربعا يقعدون بالعديلية يسولفون مع صالح الملّا ؟؟

وتجمع بشارة ينّ وقعد

وتجمع معك صار تجمع حق زايد الزيد وفتنته بالآن

وصوت الكويت شوي شوي قاعدين يصيرون رابطة أدباء يديدة؟؟

علامنا

شصاير

يالله احد خل يتحرك

خل نسوي شي

خلاص راحت الديرة

اللي يسوي جماعة امر معروف واللي يطق البنات عند التجاري

واللي يلغي حفلات هلا فبراير

واللي يحرم فترينة المحلات

واللي يحرم كرة القدم

وماشيه العملية

واحنا نسوي ندوات بو ست ساعات

ونستلم الأوادم وقلتله ورحتله

والدستور خط احمر

خلاص لاعت جبودنا من هاللحايا وحماقاتهم

عمومام بعد ساعة المباراة وارد واقول مبروك الفوز مقدما

واللي عنده اغنية بسم الله مالت عبدالكريم خل يحطها عاليوتيوب ما عليكم امر

26 comments:

ديرة بطيخ said...

فايزين انشالله

يارب

abu eldestor said...

اهم شي المنتخب
و غيره مانبي لا جريدة الوطن او غيره الحين

Anonymous said...

الحمد لله و الشكر على الرفاعي

عندنا مجانين وايد في هالديرة

Anonymous said...

بس ليش ما ذكرتي منو اللي قتل الحسين؟

صج اللي قال يقتل القتيل و يمشي بجنازته

وعمار يا كويت ..و مبروك للمنتخب .. وايد ناس بجو من الفرحه بس انشالله مو كثر اللي بجو على الحسين لأنه الحزن يكون بالقلب مو بالعلن


هذا ولد الشهيد و انجازاته .. شنو انجازاتك ياللي مسميه روحج بيت القرين؟

و صح اهم شي المنتخب يا ابو الدستور .. وغيره ما نبي لا جريدة الدار ولا قناة الأنوار

Anonymous said...

مرحبا ومبروك الفوز

الحين لما نذكر الامام الحسين نقول سلام الله عليه او رضي الله عنه؟؟ وشنو الفرق بينهم؟ وهل نعرف مذهب الشخص من طريقه لفظه لهذه الجمله؟؟

انا عن نفسي صمت عاشورا لانه فيه حديث وارد عن الرسول ص انه صامه لانه الله انجى سيدنا موسى من الغرق ومادري ليش يتظايقون اخوانا الشيعه لما يعرفون انا صمنا هاليوم؟؟ تهقين ليش دانه؟؟؟

عبدالله الهاجري
كيفان

al-nokhitha said...

ne6ray 3ala el manbar o enshalah lah 3awda o 3awda qawiiya ba3ad
le2anhum e3arifaw qala6athum enhum ma hayii2aw jeel thani o
al7een ga3id e9al7on el qal6a o ana metfa2il 5aiir :)

Mabrook 3ala el fooz !

tawaqo3ich ena el monta5ab efooz o el theqa ele
ga3id etiikalimain feeha athbatay enich a7san men el aloosi ;p

فريج سعود said...

خليتي شي ما سولفتي فيه

:)

بالنسبة للجنة التشريعية شوقفي منو اعضائها ويبطل عجبج مو عجب الي ضيّع خمس انفرادات لأ عجبج انتي

وعجب يا عجب

احمد سالم said...

الرفاعي وما أدراك ما الرفاعي
تكفه يعني حتى الكره صارة حرام ليش إحب النكد ؟
أنا أـعاجب إنه إشلون الناس تبي إتسمعك إذا إنت عسر جذي

ketchub said...

عبدالله الهاجري .. ليش وايد محتر من جريدة الدار و قناة الأنوار ؟؟ هل سبّوا الصحابة أو لعنوا واحد من المبشرّين بالجنة ؟؟

إيه صج نسيت أقولك .. عليك بالعافية صوم عاشوراء .. أهم شي إنه مسح سيئاتك كلها مالت السنة اللي طافت

ويا جماعة .. وصلوا سلامي للرفاعي .. سلام الله على جده

Anonymous said...

ketchub الاخ

منو ياب طاري جريده الدار او قناة الانوار ؟!؟ شكلك توك راد من الحسينيه وفيك تعب وارهاق عشان جذيه قريت تعليق الي فوقي وتلخبط عليك الموضوع

اتمنى من رب العالمين ان يغفرلي ويمسح سيئاتي بصيامي لهذا اليوم

مع اني اشم ريحة طنازة بتعليقك مادري منو الي المفروظ يتطنز على الثاني الي يصيوم ولا الي يطق ويدمم عمره لييين صلاة الفير !!!

Anonymous said...

البراقع شكو !!
استغفر الله
ياب لك الحمد و الشكر
علي نعمة العل

wa6an-alnhar said...

دانه

مبروك عالنيو لوك توني اشوفه وايد حلو
:)

انا اقول خل يستريح بس
حتى الطمباخيه صارت حرام
بفهم اشبقى ما حرموووووووووه اشبقى ؟؟؟؟؟؟؟؟؟؟؟؟؟؟؟؟

يالرفاعي ... يازينك وانت ساكت والله

Anonymous said...

بنت المليقة

بو سالم said...

الف مبروك!!

ذكرتي في بوست سابق ان المنتخب خسر بسبب عدم حضور صالح الملا للمباراة

الان صالح الملا حضر المباراة الماضية في عمان، فهل هو سبب فوزهم؟

لي هلدرجة تتفاءلين بصالح الملا؟؟

عموماً! مبروك للجميييييع! ما عدا شاوي الاسطبل، ابو العصا البلوشية، احمد الفهد و باقي الاخوان المتشبهين بالپشتون

فليشجعوا منتخب افغانستان

بيت القرين said...

ديرة بطيخ
ان شاء الله دوم

ابو الدستور
الأزرق صاير مخدر لنا

انو
الحمدلله على كل حال

انو
انت تعرف منو يعني

انا اعرف بس اخاف من هايف


عبدالله الهاجري
من كيفان سيتي

الرسول عليه وآله افضل الصلاة والسلام قال حديث اكيد تعرفه

اللي اهوا لا تصلوا علي الصلاة البتراء سألوه شنو الصلاة البتراء
فرد عليهم
ان تقولوا اللهم صلي على محمد وتسكتوا
بل قولوا اللهم صلي على محمد وآل محمد

وآل محمد هم تم تحديدهم بحديث معروف انهم فاطمة وعلي والحسن والحسين عليهم السلام

عشان جذيه انا اقول عليهم السلام
ومفروض هاللفظة ما تحدد المذهب لأن هذا نص متفق عليه من المذهبين

اما موضوع الصيام بالعاشر
فبعض الشيعة يعتقدون ان حديث صيام العاشر حديث موضوع ومو صحيح واللي وضعوا هذا الحديث اهما نفسهم اللي قتلوا الحسين عليه السلام
ويكون يوم استشهاد الحسين يوم فرح وهذا سبب عصبيتهم من هذا الموضوع
ويبقى طبعا صيام العاشر على النية اذا فعلا في ناس تصوم العاشر بتعمد اغاظة اهل الشيعة فهذي مشكلة اما اللي يصومه طلبا للأجر فهذا مأجور ان شاء الله

نواخذانا
ننطر على المنبر بس ترى الوقت يمر والديرة بانحدار
وعندي بلورة اقوى من الألوسي
وتذكر اسم صالح الشيخ عدل قبل مباراة العراق
وبعد المباراة كلمني

فريج سعود
علي الراشد والرومي معاهم
ياللعجب

احمد سالم
حبيت اسمك الصراحة
والله يهدي الرفاعي

كتشب
مو الهاجري اللي انتقد الدار والأنوار
النمرة غلط
اتمنى تعتذر للهاجري

الهاجري
من كيفان سيتي

ميخالف اهوا غلطان بس هم لا تنزل لي مستوى انتقاد المعتقدات عد المذهب الآخر
انت اكبر من جذيه
ولا تكتب حرف الظ وال ض تكفه
:)

وطن النهار
ويا زينج وانتي تسيرين علي
:)

انو
الحين قعدت اسبوعين عشان تقدر تسب سبّه ما يطلع فيها اسمك
ولا ردة فعلك قوية
لوول


بو سالم
روحة صالح ومرزوق لعمان هذا الفعل الطبيعي اللي مفروض يصير من زمان
والصراحة اللي عاجبني اكثر شي اهوا الشايجي لمؤازرته المنتخب وقعدته مع الجمهور مو بالمنصة
يعطيه العافية

ketchub said...

الهاجري باشا .. وايد أبرك لك ولنا لو تسوّيلك يوزر بدال ما تشارك كـ أنومينس .. لأن ردّك يه بعد رد واحد هم أنومينس فتوقعت إنك إنت نفس اللي قبلك .. فور غيف مي مسيو هاجري .. وأوجه كلامي السابق حق الـ أنومينس الحلو اللي قبلك :)

بس تعال .. شدراك إني توني ياي من الحسينية .. عيال كيفان مو هينّين .. عاد صج كنت توني راد من الحسينية وداق سدر بعد .. بس ما طبّرت :)

Anonymous said...

بعد هذا الرد منج ما أعتقد راح أرجع و أتابع بلوقك لجهلك بدينك اللي قاعده ادافعين عنه بنفس طائفي واضح وخجل وضعف من مواجهة الحقيقة

أولا : أهل البيت

http://ar.wikipedia.org/wiki/%D8%A3%D9%87%D9%84_%D8%A7%D9%84%D8%A8%D9%8A%D8%AA

أنا ما أتكلم عن أهل السنة اللي شهادتي فيهم مجروحه .. أنا اتكلم عن أهل البيت عند الشيعة اللي ذكرتيهم لأنج ما أعتبرتي الأئمة الإثنى عشر من ضمنهم

أما من اللي قتل الحسين وخايفه لا أتقولينه من هايف .. فآنا أقولك منو اللي قتله

http://www.alwatan.com.kw/Default.aspx?tabid=164&article_id=474277&AuthorID=1101

أتمنه تكون عندج الجرئه في نشر التعليق

Anonymous said...

كتشب

واذا خاطبك الجاهلون قولوا سلاما

لا يكون علبالك مو شايف ردك في البوست اللي طاف و ساكت عنك ؟

صج الحقران يقطع المصران

:)

al-nokhitha said...

afaaa balooortich e6la3at
5arboo6a ;p

عبدالله الهاجري said...

اخت دانه
انا شخص محب ومتابع لمدونتج ومؤيد لطرحج ولمبادئك ....بس اعتبر هالموضوع سقطه لج...وعكس اسلوبج وعلمانيتج(ان صح التعبير) في تناول المواضيع لانج افصحتي عن مذهبج ودافعتي عنه واستهزئتي بمذهب غيرج بصورة او بؤخرى بطريقه غير مباشره ويبتي حق نفسج الكلام ولاحظي التعليقات....اتمنى انج تستمرين على خطج المدني ولا تعلقين على امور هيه مسلمات عن الطرف الاخر والي اقصده اهو صيام عاشوراء الي اهو وارد حديث صحيح فيه بصحيح مسلم ورواة احمد واهو من الاحاديث الصحيحه عند اهل السنه وانتي تهكمتي فيه من خلال نقدج للرفاعي ...انتقدي الاشخاص ولا تنتقدين معتقداتهم

وراح استمر بمتابعتج وتقبلي نقدي

عبدالله الهاجري
قم :)

ketchub said...

أنومينيس - مع أني ما أدري أي واحد إنت - بس تكفه لا تخلّينا :)

يا المجهول .. منو عبدالله الهدلق هذا اللي مستانس بمقالته ومعترف فيها كأن اللي كاتبها واحد صحابي أو واحد من المبشرين بالجنة !!

عبدالله الهدلق كتب مقالة قبل فترة يتمنى لو كان جندي إسرائيلي يغتصب عن طريقه شرف فلسطين .. هل هذا إهوه اللي تعتبره مثلك الأعلى ؟؟ هذا رابط لمقالته

http://www.alwatan.com.kw/Default.aspx?tabid=164&article_id=265253&AuthorID

وهذا رابط من موقع وزارة الخارجية الإسرائيلية المتفاخرين بوجود كاتب .. إنت تحبه بعد

http://www.altawasul.com/MFAAR/opp+eds/op+eds-+arab+writers/if+i+were+an+israeli+soldier+11072006.htm

هنيئا لك العقل اللي تفكّر فيه :)

ketchub said...

أنومينيس .. حلاتِك ساكت .. حرّفت الآية وقعدت .. بسم الله الرحمن الرحيم .. إذا خاطبك الجاهلون -قالوا- سلاما .. آمنا بالله صدق الله العلي العظيم .. سلاما يا جاهل .. سوري أقصد يا مجهول :)

Anonymous said...

شفت نفاق و استكبار .. بس كثرك يا كتشب بالمايونيز ما شفت

ان شاء الله لو كاتب المقال كافر مرتد .. اذا عند حجه رد عليه لكن واضح أنه ماعندك رد يا جاهل

:)

بس دام إنك مو معترفين بالإئمة الإثنى عشر بنسبة لي النقاش منتهي وأخلي الحكم للقراء يشوفون المنطق اللي بيني و بينك .. مع ألف سلامه

ButterFlier said...

أول شي معركة خالدة دارت رحاها اليوم 10 محرم بين الحسين بن علي بن أبي طالب عليهم السلام وأصحابه ضد عصبة من الأشرار

إنتهت بإستشهاد الحسين وأهله وأصحابه

بس المفارقة ان اللي خسر هذي المعركة جسديا اهوا اللي يذكر بالخير على مدى الأزمان


----------

شنو اسم المعركة ؟ و منو الاشرار ؟؟

ketchub said...

أنومينيس .. وين النفاق والإستكبار بـ كلامي .. تصدق شككتني بـ روحي :)

البدليات مشكلة بهالزمان .. الصراحة كلامك مو مفهوم بالمرة يا جويهل :)

عندك تهريب صوب الكابريتر .. أنصحك تسيّر على الشويخ بأقرب وقت قبل لا تطق مكينتك وياخذون عليك زايد بعدين :)

Anonymous said...

الحين البنت كاتبة موضوع شكبره وشعرضه وانتوا ما نقيتوا الا هال5 اسطر من موضوعها تحاججونها فيه؟؟!!!
بس معذورين لان نوعيتكم من تقرا كلمه مرتبطة بهالموضوع تقيمون القيامه وتقعدونها ناس فاضيه ماوراها الا الفتن يبا روحوا للبذالي- اعووذ بالله - قولوله يشرككم بأي عمليه انتحاريه وفكونا من اشكالكم


وهذا الي يقول انها غلطت على مذهبك قوم اقرا ردها عدل بعدين بطل حلجك
وبالنسبة لكاتب المقال هذا الرجل قمممه بالذكاء احييه على ذكائه ف اهو أغبى ما انجبت بطون الأمهات كل مقالاته نفس ويهه

الحمدلله الذي عافنا مما ابتلى به كثير من الناس

سلام