21/01/2009

خمّة فجر


أمس للأسف شفت قناة خمّة فجر

أسميها قناة خمّة فجر لأنهم فعلا دخلاء على الكويت وعلى أهل الكويت

كان مذيعهم مقابل الوشيحي

فتكلم الوشيحي والمقابلة ماكان فيها اي زود
 
بس الوشيحي يسأل المذيع المخضرم شنو معنى الليبرالية 
يرد عليه بأن الليبرالية اهيا فصل الدين عن السياسة؟؟؟

حق اللي يتبوسمون وما يدرون شنو ليبرالية


المهم

مشت المقابلة ليما ياب المذيع طاري حلقة الوشيحي ويّا القلاف
 
وقال له انت ما عطيته المجال يتكلم والقلاف قال لنا هالشي بقناة خمّة فجر

فرد عليه الوشيحي ان القلاف بدعوته لتعليق الدستور كان غير موفق
 
فقال له المذيع المخضرم

انت مو ملاحظ ان النوّاب قاعد يسيئون للمجلس

قال له الوشيحي نعم
 
بس انا احمل المسؤولية على الحكومة ورئيسها

هني إختبصت القناة كلها

وكأن الوشيحي قال كلام  غريب على الكويت وعلى سياسيينها

المذيع يقول له ليش يبت سيرة الحكومة انا ما سألتك عن الحكومة
وناصر المحمد خط احمر

رد عليه الوشيحي ان رئيس الوزراء على الصعيد الشخصي والإنساني يستحق تزوجه بنتك
بس على الصعيد السياسي تطلقه منها

رد المذيع وقال لا تقول مثل هالالفاظ عن رئيس الوزراء؟؟؟

وصار الحديث بين شد وجذب الوشيحي المسكين يحاول يشرح ان هذا حق وشي طبيعي الانتقاد

وقناة خمة فجر مثل القطيع لا ما يصير ولا تقول ولا تسوي ولا تتكلم

ليما يات الطامة الكبرى عاد

لما استشهد المذيع بمتصلة بأحد برامجهم اللي اثنت على مكالمة سلطان بن فهد

حق قناة السعودية الرياضية

وقال ان يجب ان يكون للأسرة الحاكمة هيبة مثل ما سوّى سلطان بن فهد؟؟؟؟

وهذا اللي يخليني اقول انها قناة خمّة

لأن الخرفان يبون واحد يطقهم على راسهم

ويكونون قطيع يمشيهم الواحد على كيفه

شلّة دخلاء على الديرة ما يعرفون شنو يعني كويت وشنو يعني كويتي

كل يوم واحد يحط لي خط أحمر
 
مرة حق الشهيد الوحيد
 
ومرة حق رئيس الوزراء
 
ومرة حق راعي الحرشا

الا صج يعني شنو الحرشا خل افهم

الكويتي مو خروف حق احد وما عنده خطوط حمر غير الدستور والقانون

اذا احد شاف شي غير جذيه من اي شخص فتأكدوا هذا مو كويتي وما تتشرف الكويت بوجوده

قال خط أحمر قال

تعالوا ليش محّد دز لي بنر يديد محّد يعرف يصمم يعني؟؟

انزين الحين نروح حق القضية اللي بتصير طائفية غصب طيب

لأن محركينها بالعادة ناس اصحاب نفس طائفي من امثال هايف وعاشور ووليد

الفالي ويا طلاّبة الفالي

وليد وهايف بعد ما طلع حكم البراءة للفالي قالوا احنا ما استجوبنا رئيس الوزراء عشان هذا عليه حكم

لا بس لأن عليه قيد امني وما يصير يدش الكويت

كلام جميل

انزين القيد الأمني صدر بصدور الحكم على الفالي

والحين الفالي طلع برئ

 اذا تلاشى القيد الأمني 

شرايكم تخلونه يدش الحين يا المتكلمين بإسم القانون يا هايف ووليد

ام ان لحاكم كاذبة كعادة الكثير من اللحى

ادري قبل لا احد يستل كيبورده من غمده

الفالي سب شخصيات من الدولة الإسلامية واليوتيوب يشهد

لكن يا جماعة في شي اسمه قانون

حتى لو ما عجبنا لازم نحترمه

ونتخذ القنوات القانونية ليما النهاية

يا تحقق لنا اللي نبيه او نحترم قراراها المخالف لآراءنا

خل اعطيكم مثال

واحد باق الناقلات والاستثمارات
حرامي يعني

وعندنا ادلة تقول جذيه

وارقام حسابات وهالسوالف

لكن المحكمة حفظت القضية لأن الأدلة ما كانت كافيتها 

هل نقدر نقط الحرامي بالسجن الحين واحنا متيقنين انه حرامي؟؟

طبعا لأ

لكن اللي نقدر نسويه ان نتابع الإجراءات القانونية للطعن بالحكم وغيره من إجراءات

جذيه مفروض نتعاطى مع القضية مو 

لا الفالي سب السنة

او لا الفالي مظلوم

شنو هالكلام الفاضي

في قانون اذا في احترام له
نقطة
 
وشكر لازم نقوله بالنهاية حق الداخلية انها نجحت بما يسمى بالقمة بدون زحمة
او على الاقل انا ما حاشتني الزحمة

خوش تنظيم ومشكورين

26 comments:

moodless said...

الحرشا ناقة .. مافيها زود يعني بس راعيها كان يتغنى فيها "انا راعي الحرشا" مع الوقت صار الكل راعي الحرشا على قولتهم
الى ان تطورت الحرشا وصارت سيارة، يسمي سيارته الحرشا و يصير اهو راعي الحرشا
يجي يوم يطلع لنا فيه طيار يقول انا راعي الجت حرشا

..

كلامك عن خمة فجر يبرد الجبد، بس ترا اهم مو بروحهم، اقصد مو شذوذ، اعتقد انها القاعدة، هناك الكثير ممن يؤمنون بسكوب على انها صوت الحق ومنبر من لا منبر له!!

..

اما البانر ، مادري

العرزالــــــه said...

حامض على بوزهم يسوون فينا مثل ماسوا سلطان بمقدمي قناة الرياضه

احنا الوحيدين بين الدول اللي اخترنا وزكينا حكامنا

لكن هالكلام بعيد عن اشكال قناة سكوب والمستحدثين على مجتمعنا..فداوية العصر اليديد

وشاكر لكم اتزان وهدوء طرحكم بالنسبة لقضية الفالي

:)

Anonymous said...

مرحبا دانه

مادري شكلي هاليومين بصير طائفي شوي :)...تابعت مدونتج ومدونه فريج سعود وانتوا تطرقتوا لنفس الموضوع واهو الفالي..اختي الي يعرف في اجراءات التقاضي والقانون الكويتي يعرف انه من الصعب ادانه متهم الا بأدله واقعيه وملموسه يحدد ايطارها القانون ومواده..مثال جريمه اتجار بالمخدرات وانصاد التاجر لكن طلع في خطا باجراءات القاء القبض من قبل المباحث هني لانه ماتم القبض عليه وفق الاجراءات القانونيه وتبراه المحكمه (لعبة محاماين) الفالي سب وشتم وانابنفسي مره كنت بحسينيه وسمعته يسب ويتهكم على عائشه زوجه الرسول ص يعني احنا متيقنيين انه الريال ساب وشاتم ومو لمه يبراه القانون يعني معناته انه احنا ظلمناه...وهذي موحرية معتقد هذي طعن وتقليل من قدر المعتقد الاخر!!

اسف عالاطاله بس اتمنى انه صوتي وصل :)

دانه انتي ويا فريج سعود تحسسوني انكم طائفيين بس متغلفين بغلاف الليبراليه والمدنيه!!

والاختلاف بالراي لايفس للود قضيه...هالمره ال ض صحححح :)

Mohammad Al-Yousifi said...

شفت المقابلة امس بس بعد الكلام اللي قلتيه

بس حسيت ان الجو متشنج

غريبة يجيبون ضيف و التعليقات شغالة سب بالضيف و تهديد فيه

اكو واحد كاتب ترى نرميك يالوشيحي

تهديد بالقتل على مسج بالقناة

!!!

وين الفلتر

Anonymous said...

السلام عليكم,

البوست اللي فات كنت ناوي أقول اللي قاله أخوي عبدالله الهاجري بس ما كان لي خلق الصراحه, كفيت و وفيت أخوي عبدالله.

ياما غير قضايا technicalities موضوع ال

Z.

Anonymous said...

مقال موفق للاخت دانه

العرزاله..............

السالفه مو سالفت حامض علي بوزهم آو ما يقدرون اي واحد يقدر يسب و يصارخ و يبربر بالحجي.. لكن ربعنا متربين عدل و شايفين خير معندهم عقده النقص و النرجسيه لانهم حكام و آبناء حكام من ٣٠٠ سنه و بعدين إذا شفنه شيء زين بالاسره الحاكمه المفروض نقف و نصفق لهم مو نذمهم و نتكلم بإسلوب جهال.. والله حامض علي بووزهم و هل مجره

شكرا

Anonymous said...

lol ana ma sheft el moqabala lakin ana adri ena qanat scope the7ik
ya3ni faj2a 9arat seyasiiya ya3ni hatha ele 3ala golathum eb facebook malik jamal el mothee3en
a7mad el fathli (wel kooba) kan eqabil fananeen o faj2a 9ar seyasii mokhathram o 3ala fekra tara el akh "bedoon" ya3ni bedoon o yetkalam bel seyaasa el kuwaiitiya wala deeerat ba6eeekh bas a7la ma bel qanat o mel7 el qanat el kalakchi el 3ood bo
3eda ;p


3ala fekra tara fajir el s3eed bent lekuwait o ahalha men
mo2asseen lekuwait o ehya abad mahii da5ela 3ala lekuwait o ehi
7alha 7al ay kuwaiti laha 7oriyat ray o men 7agha enha tarsim 6reej
7ag qanatha wet7adid ay 5a6 a7mar tabeeh le2anha eb e5ti9ar molkiyatha el 5a9a o hatha 7ag men e7googha fa maa7ad yegdar eloomha lakin el '3ala6 ena mothee3 '3air mo7adad el jensiya o mokhalif leqanoon el eqama eqadim baramij seyasiiya :)

Anonymous said...

من صجكم تتابعون قناة العقد؟
شنو ماعندكم هوتبيرد؟
زين شوتايم؟
كلش كلش أوربت؟

ماتبون شفرات قناة XXL ؟

حاضرين, هذي القناة الللي راح تنسيكم سكوب

خل أروح الحق على الفلم الإباحي توه بادي

خخخخخ

ButterFlier said...

wondering about the country's future. I realized there is no difference between conservatives and liberals! Everyone here is stupid.

Anonymous said...

الشرهة مو على الدخلاء، الشرهة على الذي دخّلهم و سرق البلد من اهلها ليضع مصيرها بيد غرباء لا يمتون لها بصلة!

ليتهم يكلفوا انفسهم ليفهموا الثقافة الكويتية قليلاً قبل ان ينظّروا علينا بها من خلال وسائل الاعلام و من داخل المجلس و غيره

Anonymous said...

بالنسبة لموضوع الفالي، اعتقد ان قانون المطبوعات الجديد -نسبياً- الذي سوّقه علينا انس الرشيد و الذي يؤلّه الصحابة و الرسل و آل البيت و زوجات الرسول!! قانون جائر و بائس.. و أضيفت اليه تلك الفقرة لإرضاء الاسلاميين -سنة و شيعة- من اجل تمريره. طبعا على حساب حقوق المواطن و حرية اعتقاده المكفولة دستورياً

الخطأ الذي نتحمله جميعاً، هو سماحنا بوجود قانون مثل هذا الذي يتبنى خزعبلات الاسلاميين و يفرضها علينا

nEo said...

الصورة ؟

نار !

أنا كويتي said...

أنا أحتج..

الخرفان ما لهم علاقة بالموضوع؟

والصورة دخيلة على ثوابت مجتمعنا الخرفاني؟؟

لو سمحتي..الخروف خط أحمر

العرزالــــــه said...

HSS

والله الجاهل اهو اللي يقرا التعليق ومايفهمه

انا كلامي كان و اضح وقاعد اتكلم عن الفدواية اللي يبون يوصلونا لهالمرحلة

وبعدين الصباح اكيد بيصيرون زينين اصلا مو بكيفهم

لاتنسى واعيدها مره ثانيه..احنا اللي حطيناهم

:)

wa6an-alnhar said...

هذي مشكلة فجر واللي وراها انهم
للحين عايشين بزمن القبيلة وشيخ القبيلة والفداوية

ما يدرون ان احنا من زمان عايشين بدولة مؤسسات
!!!!

احنا كويتيين احرار ما يمشي علينا هالكلام

مركبنا said...

قولي يالله
عسى المخمة الي تشيلهم كلهم

انا ماادري شللون تشوف نفسها هل الانسانه والي معاها

يجذبون ويصدقون الجذبه هوليله على الفاضي جنبزة وقلة حيا
والله صج صج ما يستحون لما يجذبون ولا يحرفون ولا يشعلون الديرة

Anonymous said...

1) راعي الحرشا هو الشهيد فهد الأحمد الله يرحمه فقد كان لديه حصان أسود مشهور في سباقات الخيل بقوته اسمه الحرشا كان يهتم فيه كثيرا لذلك أطلقوا عليه راعي الجرشا

2) قضية الفالي انتهت ولكن ( قضايا) الفالي لم تنتهي بعد

3) لم تعرض لحد الآن المشاهد الموجوده في قناة الأنوار والعروضه في اليوتوب التي تم تصويرها في الكويت على المحكمة وهي ضمن القضايا المرفوعه ضد الفالي من قبل النواب

4) الجدير بالذكر أنه حكم البراءه هي لقضية مرفوعه من قبل مواطن كويتي لا ينتمي لأي كتله سياسيه

بكل بلدان العالم المتخلفة و المتحضرة هناك تمييز واضح و لا لبس به بين حقوق المواطن و حقوق المقيم أو الزائر

الفالى مقيم...و بالتالى ليس من المستغرب أو من المستهجن أن يتم منعه من دخول الكويت مرة أخرى...و لأى سبب تراه السلطات الكويتية و دون حتى إبداء أى سبب

كثيرون من الكويتيين رفضت السفارات الأجنبية مثل الأمريكية و الإنجليزية إعطاءهم فيز أو تصاريح دخول لأراضيها...و باغلب الأحوال دون حتى إبداء أسباب الرفض...و لم تقم القيامة و تتحرك الأمم المتحدة لمعاقبة تلك الدول ...الكل عض على لسانه و تقبل الأمرالواقع

حق رفض دخول أى مواطن أجنبى..حق مشروع و أصيل لكل بلد حر و مستقل نعم الفالى ليس أول شخص مذنب بقوة الأدلة و برئ بنظر القضاء لكنه يبقى شخص أجنبى و لا يمكن أن نساوى بين حقوقه و حقوق المواطنين أمثال عدنان عبد الصمد و عبد المحسن جمال و الشيخ على الخليفة

Fair.chair said...

بوست موفق ورائع جدا

اتمنى لج الاستمرار

بهذا الاسلوب الرائع

ومحاربة اعداء الكويت وحرامية الكويت

صج يعني خمسين دليل يثبت ان علي الخليفة حرامي وموجودين بالنت

لكن حفظت القضية لعدم كفاية الادلة نحترم القضاء الكويتي النزيه ومانقدر نقول لاننا لاكلمة فوق كلمة القضاء

bof-10 said...

واااو واااو وااااو

لو اب اقدر اصفق واوقف من الكرسي اللي انا قاعد عليه .... جان والله وقفت وصفقتلك ..... واااااو
يزاك الله خير على هالبوست

وعلى فكرة جنه تسكرة قناة الخمه

Anonymous said...

جنسية بوعيدة
http://www8.0zz0.com/2009/01/23/18/483107388.jpg

لا تطوفكم
صج مسخره

مستفسط said...

نعم يجب أن نحترم القانون ونعلن عن نزاهة القضاء
حتى لو كان الأخير مستفسد على وزن مستفسط

لا اتحدث هنا عن قضية علي بابا والناقلات
بل يمكنك أن تسأل أي محامي عن قضاتنا

رغم ذلك نحترم القانون والقضاة على راسنا

فريج سعود said...

الي لابسه بو فهد خروف صجي ولا بس فرو ؟

Anonymous said...

خوش بنر بس بنرنا احلا
;pP

Anonymous said...

WOW .. el logo 7adaa qawi teslam eeed ele sawah :)

Anonymous said...

انتي هيلقية وسوقية ومليقة وما تقلين ابتذال عن فجر وبوعيدة

تجمع الحقوق said...

حسافه ما شفت المقابلة

(الحريه في قناة سكوب نوعيه)

و الحرشا = جَمَللْ