19/01/2009

ليش قمّة


هذي الشوارع المسكّره طوال فترة ما يسمى بالقمّه

من العشر الصبح ليما الوحده الظهر

ومن ثلاث العصر ليما تسع المسا

عموما رديت التصميم القديم للمدونة بعد نهاية كاس الخليج

بس البنر اختفى للأسف

اللي يقدر يسوي بنر يديد حق المدونة اكون ممنونه له

وخل يدزه على

danatelq8@gmail.com

المهم وصلني خبر ان قناة فجر السعيد بعد خسارة المنتخب من السعودية

إشتغلت أغاني وهجوم على منتخب الكويت

خلاص عافك الخاطر واشياء جذيه

انا اقول حق فجر وشلّتها إستحوا على ويوهكم شوي

وشبابنا ما قصّروا ولا فجر ولا شلّتها يوصلون لمواصيل شباب المنتخب
واللي يعطونه حق ارضهم رغم كل الظروف الصعبة

وانتوا اللي صج يبيلكم مكالمة من سلطان بن فهد

على طاري المكالمة من سلطان بن فهد اللي حاطينها ام صدّه

هذا حق كل اللي يتمنى ويطالب بحل غير دستوري

شوفوا شنو ممكن يصير اذا تم تغييب صوت الأمة

على الرغم من بلاوينا بس محّد يتجرأ يتكلم بهالإسلوب معانا

واللي يفكر يسوّي جذيه

ويله يا ويله مننا

إنزين وصلني مسج من كويت نيوز توّه يقول إن محكمة الإستئناف حكمت ببراءة الفالي من سب الصحابة

أدري إن الحكم مو نهائي بس هذا حكم الإستئناف والفالي غير مسموح له حضور المحاكمة

انزين لنفرض ان طلع حكم التمييز انه الفالي براءة

شنو نستنتج مثلا

ان الحكومة خافت من انها تخلّي واحد يقعد بالكويت واهوا برئ

وإن الطبطبائي وهايف والمطير والعجمي دخّلوا الديره بأزمة وعطلوا الحياة التشريعية بدون اي سبب

وان الكويت ظلمت شخص ماله ذنب؟؟؟

معقولة كل هذا عشان تتحقق اهواء جم لحية؟؟؟؟

آخر فقرة

من أول ما إنولدت وأنا أسمع عن شي عربي اسلامي اصيل اسمه قمّة

كلما اجتمعوا الزعماء العرب او على مستوى اكبر زعماء الدول الاسلامية صار الاسم قمّه

إي ليش إسمها قمّه عاد؟؟

اذا القصد ان رؤوس الهرم في الدول يجتمعون خنسميها اجتماع الزعماء

لإن القمّة لازم توصلنا لقمة القرارات المفيدة

وانا بأمانة ما شفت قرارات مفيدة مع اني سمعت عن اجتماعات وايد اسمها قمّة

قمة اول امس بالدوحة تشجب وتدين

قمة قبلها تستنكر

قمة باجر تطالب

شنو هالقمم هذا

وآخرتها بس فيتو امريكي يلغي كل هالشجب والادانة

والحين بعد على قولة مطقوق

قمة اقتصادية ثروات كل دولها ما تعادل ثروات مايكروسوفت وجوجل "جذي اسمها بالعربي" مو بيدي

على شنو وفوق هذا شوارع مسكّره

ما اقول بالختام الا رائعة احمد مطر

ارفعوا أقلامكم عنها قليلاً
واملئوا أفواهكم صمتًا طويلاً
لا تجيبوا دعوة القدس .. ولو بالهمس
كي لا تسلبوا أطفالها الموت النبيلا
دونكم هذه الفضائيات فاستوفوا بها -غادر أو عاد
وبوسوا بعضكم .. وارتشفوا قالاً وقيلاَ
ثم عودوا .. واتركوا القدس لمولاها .. فما أعظم بلواها
إذا فرت من الباغي .. لكي تلقى الوكيلا
طفح الكيل .. وقد آن لكم أن تسمعوا قولاً ثقيلاً
نحن لا نجهل من أنتم .. غسلناكم جميعًا وعصرناكم .. وجففنا الغسيلا
إننا لسنا نرى مغتصب القدس .. يهوديًا دخيلاً
فهو لم يقطع لنا شبرًا من الأوطان لو لم تقطعوا من دونه عنا السبيلا
أنتم الأعداء يا من قد نزعتم صفة الإنسان .. من أعماقنا جيلاً .. فجيلا
واغتصبتم أرضنا منا وكنتم نصف قرن .. لبلاد العرب محتلاً أصيلاً
أنتم الأعداء يا شجعان سلم .. زوجوا الظلم بظلم وبنوا للوطن المحتل عشرين مثيلاً
أتعدون لنا مؤتمرا ؟ كلا كفى شكرًا جزيلاً
لا البيانات ستبني بيننا جسرًا ولا فتل الإدانات سيجديكم فتيلاً
نحن لا نشتري صراخًا بالصواريخ ولا نبتاع بالسيف صليلاً
نحن لا نبدل بالفرسان أقنانا ولا نبدل بالخيل الصهيلا
نحن نرجو كل من فيه بقايا خجل .. أن يستقيلا
نحن لا نسألكم إلا الرحيلا
وعلى رغم القباحات التي خلفتموها
سوف لن ننسى لكم هذا الجميلا
ارحلوا أم تحسبون الله لم يخلق لنا عنكم بديلا ؟
أي إعجاز لديكم؟
هل من الصعب على أي امرئ ..أن يلبس العار وأن يصبح للغرب عميلا ؟
أي إنجاز لديكم ؟ هل من الصعب على القرد إذا ملك المدفع ..أن يقتل فيلا ؟
ما افتخار اللص بالسلب وما ميزة من يلبد بالدرب .. ليغتال القتيلا ؟
احملوا أسلحة الذل وولوا .. لتروا كيف نُحيلُ الذلَّ بالأحجار عزًا
ونذلُّ المستحيلا

16 comments:

ZooZ "3grbgr" said...

أنتم الأعداء
يا من قد نزعتم
صفة الإنسان .. من أعماقنا
جيلاً .. فجيلا


اختصر الفلسطيني وسبب تصرفاته بهالجملة

مبدع احمد مطر



بس تبين تسمعين شي قوي

دشي يوتيوب شوفي "قمم" لمظفر النواب

هذا اللي قيل له: أنت بذي

فقال: أنا بذيء كهزيمتكم

:/

Mohammad Al-Yousifi said...

اكو شعر حق مظفر النواب تحت عنوان قمة لأو قمم

تجدينه في اليوتيوب

:)

MARSHAL Q8 said...

أي إنجاز لديكم ؟ هل من الصعب على القرد إذا ملك المدفع ..أن يقتل فيلا ؟


:)

Anonymous said...

السلام عليكم و رحمه الله و بركاته
العزيزه دانه لكويت تحيه طيبه و بعد

أنا من أشد المتابعين لمدونتكم العزيزه و آتمنا من الله عز و جل أن يوفقكم

المنتخب الكويتي كفا و وففا و الحمدالله نتيجه مشرفه الجايات أكثر آما عن فجر السعيد و من لف لفها من الغوغائيون هذا مستواي تفكيرهم و مستوي عقولهم و ما تدل إلا علي البيئه الشوارعيه إلي تربو عليها



آما المهم و الاهم المقارنه بين سلطان بن فهد و شيوخنا مقارنه مجحفه و مالها اي اساس من الصحه و يا إختي الكريمه الدستور مهم نعم الدستور لا بديل عنه نعم لكن آن تقولي إن الدستور هو إلي إمخلي الشيوخ يحترمونا و يعاملونا كآوادم آكبر زله و إنتقاص للمواطن الكويتي قبل الاسره الحاكمه
إختي العزيز شيوخنا متربين علي حب الكويت و حب الشعب الكويتي و لم يتربو علي إستعباد الشعب الشيوخ لم يستعبدو الشعب الكويتي سواء آيام الدستور آو ما قبل الدستور لان الشيخ شيخ باخلاقه و الشيخ شيخ بهتمامه بإخوانه و خواته الكويتين

و لكي توضح الرسالله أكثر حكم الشيخ مبارك الكبير كان حكم الرجل الواحد يشاور الشعب لكن ليس بضروره ياخذ برائيهم.... لم يكونو شيوخ الاسره أسياد و الشعب الكويتي عبيد....لان الشعب و الاسره واحد
لان الاسره متربيه علي حب الشعب و الشعب متربي علي إحترام الشيوخ

الحمدالله الحمدالله إن بالكويت ما تفرقون بين الشيخ آو المواطن بالاماكن العامه الله لا يغير علينا إلا بالافضل و بالمزيد من الحريات

Anonymous said...

السلام عليكم دانه,

اسمها قمه ليش ان الأجانب يسمونها ساميت summit فالتسميه أجنبيه

و بخصوص الفالي فالريال شبع و هو يشتم الصحابه (مع تحفظي و عدم موافقتي على تشنجات الطبطبائي و ربعه) و دمتم

ديرة بطيخ said...

هذا لسلوقن مال مدونتي طلع ولد مطر بايقه مني :)

سلام

Someday said...

I was thinking what would be the translation of qemmah!!
it's ejtema3yat all over again, I remember they force us to study their decision which were even for a kid sounded useless!

ZooZ "3grbgr" said...

لول مطقوق

توارد خواطر

عاش بو سلمى

:")

Anonymous said...

الدانة

حكم الفالي نهائي لأن اذا ماني غلطان جنح الصحافة ما فيها تمميز

العرزالــــــه said...

المحكمة بعد برأت علي الخليفه

يعني بريء؟

:)

Anonymous said...

الله الله الله... الفيديو نشف ريجي.. شنو هذا... الله

والله احنه في نعمه محد عارفها. الله يستر بس لانوصل على هالحال بعد كم سنه

Anonymous said...

ولاتزعلين .. مره ثانيه نسميها قم و ننادي نجاتي عشان ينفخ البلاليم للميلاد

خبر الفالي بالكامل

http://www.assawt.com/AssawtPortal/UI/Article.aspx?ArticleID=10443

بيت القرين said...

زووز
انتي ومطقوق بسكم يوتيوب وجابلوا دواماتكم
:)

مطقوق
نفس الكلام اللي فوق

مارشال
عجبتك وايد شكلها
:)
بس من يقصد؟

إتش إس إس
التاريخ الكويتي يشهد على محاولات بعض ابناء الاسرة على ممارسة الدور القمعي
ومعاملة البعض كعبيد
لكن الدستور اهوا اللي كان الحصن الرسمي والمكتوب والموثق لاهل الكويت كلهم من الاسرة ومن الشعب

انو
هل ساميت معناها الحرفي قمّة؟
وثاني شي بالنسبة للفالي
اللي كان سبب القيد الامني عليه اهوا قضيته بالمحكمة
والحين تبرّأ منها
عاد اهوا خوش ريّال أو مو خوش ريّال مو مهم
القضية قضية عدالة ومنطق بس

ديرة بطيخ
لا تفضحه حرام

سومداي
اي والله حتى حق اليهال ما تنبلع
والقهر لما نغلط بسبة قرار من قراراتهم
:)

زوز
عن المغازل
:p

سيفوه
بعد؟؟
خلننطر ترقيعاتهم كل يوم شي يديد

العرزاله
وين حكم علي الخليفة؟؟؟
عطني ياه وارد عليك

انوا
لا تحاتي ما نوصل دامنا موجودين

مختصر
خوش رابط
يسويى اجهز له بوست

Anonymous said...

شلونج دندونه, نعم ساميت يعني قمه حرفيا, و ترى الفالي مشاكله وايد و ماكو دخان بدون نار و الريال قاعد يخمبج وين ما سافر و له فيديوات وايد

Z.

Anonymous said...

تعليق بسيط على موضوع الفالي حتى ولو كان بريء الاجرآت التي حصلت بدخوله للبلد كانت خاطأ فلا بأس ان كان بريء مع العلم اني لا اتفق مع الطبطبائي وهايف والمطير والعجمي ولاكن القلط ما ينسكت عنه
شكرا

Anonymous said...

الفالي حكمه نهائي لان الشتم جنحه والجنحه استئنافها امام المحكمه الكليه ولا يجوز الطعن بعد ذلك اتمنى ما يدش هالشخص المختل الكويت لان من شأنه ان يخلق توتر طائفي في الديره خلال خمس دقايق اتوقع ما يكمل خطبته الا وتصير حرب شوارع بالديره

اما بالنسبه لشيوخ الكويت والممارسات القمعيه انا اضن انج اتكلمين عن الحقبه اللي قبل صدور الدستور في ذاك الوقت ظروف الحياة قاسيه تحتاج ان الواحد يستخدم نفوذه عشان يقدر يبسط سيطرته

* مادري شفيج على احمد الفهد بصراحه مع اني اشوفه بقمة التواضع خصوصا بعض المعلومات (الاستخباراتيه) هذا مو تقليل من الاحترام حشا بس انصدم احيانا من بعض المعلومات اللي عندج ومن مصادرج

اما عن بواقين الكويت الحبيبه انا متفق معاج في كل صغيره وكبيره لان البواق الحرامي هو الكلب ابن 16 كلب اللي شرا جريده وقام يسب النواب اللي يوقفون ضده واللحين مدري منو متسمم اهو مادري ولده اشرب واذبح عمري عيل ليش اجمع فلوس

وانا اشوف ان القانون الكويتي فاشل بشهادة دكاترة الجامعه اللي قالو ان الدستور في كثير من المواد يناقض نفسه مما جعل من هالديرة ديرة بطيخ
اللي محاكمها ما قدرت تصيد البواق اللي بايق مليارات وعندها الادله الي تتغاضا عنا في ظل بعض التوصيات