أشوفها جذيه + شخصية الإسبوع

ليش طلاقك ما مر مرور الكرام؟

والله مادري أنا أشبه نفسي بالأميرة ديانا سبنسر لما خطبها الامير تشارلز ولي عهد بريطانيا صارت ضجة، ولما تطلقوا هم صارت ضجة، وفي الحالتين الاميرة تركت اللي يبي يكتب أو يتكلم ومشت في طريقها.

والله العظيم والله العظيم والله العظيم إن اللي قايله هالكلام إهيا هذي

أمس الاثنين بجريدة السياسة ص 49 وهذي صورتها مع تشارلز

عقب هذي الديباجة المتصلة بالموضوع تماما

وعقب ما شفت وقريت التحلطم بقول لكم شلون أشوف نتايج الإنتخابات

شوفوا بالمجلس اللي طاف الله كان مبتلينا بثلاثه وليد العصيمي - سعدون حماد - دعيج الشمري

وليد العصيمي قص الحق من نفسه وقص اول اجنحة إبن الشهيد الوحيد وما نزل لان راح تطلع عليه الإنتخابات أغلى من بيع السوق

بقى أثنين

واحد منهم كان خبير نفطي بقدرة قادر إنت يا رامبو المجلس سعدون حماد

هذا النائب اللي الظاهر كان حالف ان ما تمر مخالفة بالدولة الا ويسويها

يعني ديوانية مو مرخصة وعلاج بالخارج من دون وجه حق ودفاع عن سرّاق مال عام وشكله حتى يتكلم بالموبايل بدون سماعه بالسيارة

هذا هم إستانس ليما آخر صندوق وإندقر

أما الدكتور دعيج الشمري فشقول له

يعني اللي ييبلي صورته بعد اعلان النتايج بحطه شخصية الإسبوع

نروح حق النتايج

التيار المدني الليبرالي كان بالمجلس اللي طاف 3 والحين صار 4

الصقر - صالح الملا - الراشد - العبدالجادر

الحين اللي بيقول صالح مو معاهم بقوله انت اثول وغبي

مو معناته ان مو بقائمة التحالف ان مو نفس التوجه والتيار

السالفة مو سالفة العربي والقادسية أو مستقلة ووسط مثل ما يروجها بعض المتخلفين

بما أنهم نفس الخط ونفس النفس الوطني اذا نواب التيار المدني زادوا ما نقصوا ولله الحمد

بالنسبة لحدس كانوا 6 خضير - الصانع - دعيج - جمال الكندري -الحربش - البصيري

الحين اهما الصانع - الحربش - الشايجي يعني خسروا نص كراسيهم بالاضافة الى خسارة 2 او 3 بانتخابات فرعية متنوعة

اي ويقولون إن من أسباب الخسارة ان حاطين اغاني ببعض اعلاناتهم

المهم

الكل يقول عن ان الملتحين وايد

تدرون شالمشكلة ان من يوم النتايج ليما اليوم

وصلتني مسجات مالها والي منها

يقول أحد الحكماء..لويسوون إنتخابات في قندهار ما يطلعون مطاوعه هالكثر

وهذا مسج ثاني

مجلس الأمة الجديد يقدم حزمة قوانين جديدة

إغلاق جميع المعاهد والثانويات والجامعات

صيام الأثنين والخميس إجباري

تقديم دعم مالي لقناة المجد

منع إنجاب الإناث

إنشاء هيئة تفسير الأحلام

طبعا هذا غير المسج مال جمال العمر اللي ماكو واحد بالكويت الا وصله المسج

اللي يبط الجبد شنوإن الكل يدز هالمسجات على طنازة

انزين ليش صوتوا لهم وفوزتوهم؟؟

ليش ما صوتوا حق الحريات بدال المسجات؟؟

تتحلطمون على تيار الدين السياسي ومفوزين عشرين او اكثر منهم

تتحلطمون على جمال ومحصل 4000 صوت وأكثر

استحوا على ويوهكم وبدال الشماته جان غيرتوا

انا صار عندي قناعه نسبية تقول

ان الكويتيين يسمعون وياخذون بالكلام لما يتم مهاجمة احد من قبل اصحاب الراي والمدونين

بس ما ياخذون بكلام اصحاب الراي لما يتم مدح احد

ودليلي ان على مر السنتين اللي طافوا اكثر ناس كلوا هجوم من اصحاب الراي اهما سعدون والعصيمي وحدس

وكلهم خسروا هذا بالاضافة الى من تم تعريته بالانتخابات مثل عسكر وهيثم

لكن تم مدح مرشحين التحالف الثمانيه وفاز منهم 3

هالمجلس بنيشن على واحد من شلة الفساد داخل المجلس وبكشف اكاذيبه واشوف الانتخابات اليايه عشان اعرف تترسخ قناعتي او تنتفي

أبي اللي مصوت حق اسيل والطبطبائي مع بعض بشنو كان يفكر بالضبط؟؟

شوفوا انا مادري ليش اشوف هالمجلس معقول

على الاقل نسبة المتلونين قلّت وصار الخصم ثابت على المبدأ

اي اقصد السلف انهم ثابتين على خط حتى لو اختلفنا معاهم

وهذا اللي يخلينا نعرف نتواجه معاهم

واللي كان متوقع ان الخمس دوائر بتغير من اول مرة هذا شي مو منطقي ابدا

نطروا شوي وصبرواومثل ما ال 25 طولت سنين على ما خربت الاوضاع

الخمس يبيلها وقت على ما تعدل الاوضاع

صبروا شوي

اما بالنسبة حق رقم 23 اللي يسمع يقول ديفيد بيكهام

فما اقول له الا انت يا بطل الابطال وضمير الشعب والقوة والجرؤة في الطرح والناس كلها تبيك

هاجمت السعدون وفاز اي صج السعدون اتمنى انها تكون اخر انتخابات تشارك فيها بسبب العمر وعشان لا تشوه سجلك بخسارة

هاجمت مسلم واكتسح

هاجمت مرزوق وفاز على خاله بعد

هاجمت الصقر وفاز مع 2 من قائمته الرباعية

هاجمت عدنان ولاري وفازوا

هاجمت الصرعاوي واكتسح

مدحت سعدون حماد وخسر

يبت 1789 بالمركز ال 23بينك وبين العاشر 4500 تقريبا

وناس ينزلون اول مرة يابوا فوقك

صج يعني اثبت انك يكيكي

وتشابه يكيكي بكل شي حتى بالانتخابات

مبروك يا صوت الشعب

ودامنا بطاري كتاب الوطن

خنشوف بلبل شيقول

الخاسر الاكبر في هذه الانتخابات هو التكتلات السياسية. فحدس خسرت نصف نوابها وانتهت الى كتلة ضئيلة من ثلاثة نواب، والتكتل الشعبي »راح ملح«، والجريح الأكبر هو التحالف الوطني

حدس خسرت من 6 ليما 3 فهمنا الشعبي راح ملح شلون مع ان خسارته نفس حدس

ما عليه حاقد يبي يقول اي شي

مع ان قال ببرنامج الوشيحي ان اذا مسلم ياب رقم قوي بهالانتخابات اهوا ما يفهم

وطبعا احنا ندري من زمان ان ما يفهم

ونبشره مسلم ياب رقم قوي والاول بعد

يالله اعترف انك ما تفهم

المهم شلون الجريح الاكبر التحالف؟

كانوا 3 ومازالوا 3 وين الجرح بالسالفة

ولا بس بتعبي المقال وتطلع حرتك؟

شخصية الإسبوع

مر بمحن طوال حياته المتعبه سواء على الصعيد العملي او الشخصي

الله ابتلاه بوفاة بنتين له وهذا يعتبر من اقسى الأمور على الانسان ان يتوفون عياله

الله ابتلاه بمرض مزعج انهكه من نص التسعينيات

واجه محنة الغزو وفقدان الهوية وشال المسؤولية للملمة الشتات

فكان فعلا بطل التحرير

الشيخ سعد العبدالله السالم

الله يرحمك يا بوفهد ويدخلك فسيح جناته