05/05/2008

مانبي شيعة بالتحالف


تم تغيير اسم منطقة المسيلة إلى إسم المرحوم سالم صباح السالم

عيال الأسرة والحكومة خل يوسعون صدورهم شوي

ومو يعتبروني مشاغبة ويسكروني بعد ما يندرى تصير

أما حسني مبارك عمره 80 هذي غريبة ما يبين عليه

ماشاء الله
بعد مو يموت وابتلش

المهم نرجع حق تغيير اسم المسيلة

أول شي مادري على الأقل بالنسبة لي المسيلة حالها حال شرق والمرقاب والصفاة

اسامي ثابته وغير قابله للتغيير

يعني مع احترامنا للمرحوم سالم الصباح لكن مو لازم يكون اختيار المسيلة كمنطقة يتغير اسمها

وبعدين تعالوا هم ما يصير نقول شاطئ سالم الصباح بدال المسيلة

ولا فندق سالم الصباح واهوا مال مبارك الحساوي

يعني مادري شلون ما تنبلع

هذا جزء من المشكلة

الجزء الثاني من المشكلة

الكل يعترف ان سالم صباح السالم الله يرحمه عطى وقدم للكويت سواء اللي يختلفون او يتفقون مع آليات عطاءه

ونفس الموضوع ينطبق على المرحوم أحمد الربعي عطى وقدم للكويت وهذا شي من المسلمات سواء كانوا بعض الناس يختلفون بآليات العطاء وأشكالها او يتفقون

انزين

شاللي يميز سالم الصباح عن أحمد الربعي

الله يرحمهم

ليش قاعد نرسخ مفهوم ملكية الدولة لفئة معينة من الشعب

يعني الخالدية - السالمية - ضاحية فهد الاحمد - صباح السالم - عبدالله السالم - الجابرية - سلوى - مبارك العبدلله - صباح الناصر - الاحمدي - جابر العلي - وغيرهم وايد

انا مو قاعد اقول نتجاهلهم او نتجاهل اي احد قدم شي للكويت لا حشا بس هم اقول ان ابناء اسرة الصباح وغيرهم قدموا للكويت

ويستحقون ترسيخ اسماؤهم بالذاكرة مثل غيرهم من أبناء الأسرة

يعني اللي اعرفه ان المنطقه الوحيده اللي مو على اسم احد من ابناء الاسره اهيا الفروانية

اذا ما خاب ظني

ويمكن في منطقه او ثنتين بعد انا ما ادري عنهم

اللي ابي اوصل له

ان ممكن تكون النوايا حسنه من تسمية المناطق باسماء ابناء الاسرة

لكن من يضمن بالمستقبل ان ما يتولد اعتقاد عند الاجيال القادمة من عيال الاسرة

انهم يملكون هالبلد والدليل ان كل المناطق باسامي اهلهم

الكويت للجميع

بما ان كلامي بجزئه الثاني ما راح يطبقونه المسؤولين على الاقل خل يسمعون الجزء الاول ولا يغيرون اسم المسيلة خل يدورون اي منطقه يديده يسمونها باسم المرحوم سالم صباح السالم

ننتقل حق الموضوع الاساسي بس قبله




هذي الصور مأخوذه من قسم الاعلان بجريدة الوطن

ولما سألوا المسؤول عن سبب وجود هالاسامي قالوا هذيل الاسامي ينحط لهم الاعلان باي وقت يبون حتى لو الصفحات مكتمله

طبعا الصورة واصلتني من زمان

بس عشان لا ينفضح اللي صوّر ما نزلتهم من زمان

على فكرة ممكن ان المرشحين مالهم شغل ولا ذنب اقول ممكن

بس الظاهر هذي القائمة الذهبية للوطن

المهم ندش بموضوعنا

المليق كتب مقالة ذاك اليوم بعنوان
أصبأت عن آلهتنا يا..؟

وكالعاده قاعد يكتب باسلوبه الساخر المحبب لقلوب كل مليق على هذه الارض

طبعا المقالة مجندها للهجوم على التحالف من خلال شخص المرشح عبدالمحسن المدعج

يقول ان المدعج قال عن التحالف ان ما يفرق بين شيعه وسنه وبدو وحضر

فالمليق يقول شنو بالضبط

ان التمييز الطائفي يا د.عبد المحسن المدعج.. لم يستشر ويستفحل عندنا، الا بعد نشر بعض الصحف المحسوبة على التحالف الوطني.. نشرها لمقالات بعض مؤيدي التحالف الوطني.. التي لا تستطيع التخلي عن نعت الوزير او النائب بتياره السياسي او الديني! وسكوتها عن تشجيع اقتراح تجريم التمييز الطائفي والعنصري المنتشرة في جميع دول العالم

يقول ان محد نشر التمييز الطائفي الا الصحف المحسوبه على التحالف

حلو حلو حلو

المليق منزل
مقاله اليوم بعد

على فكرة ترى المليق سلفي

لماذا لم يرشح التحالف الوطني الديموقراطي ـ ذي الاخلاق السماوية والفاضلة ـ اي مرشح ينتمي للطائفة الشيعية

يا سلام اثاريك محسوب على التحالف واحنا ما ندري

انت ما تقول لي شنو هالتمييز بكلامك

ليش قاعد تقسم الكويتيين لمذاهب وانت اللي تنتقد صحف التحالف ان اهيا اللي سوت هالتمييز

انت واشكالك اهما اللي خربوا البلد لا بارك الله فيك ولا بأشكالك

بدال لا يقول طالعوا الكفاءة واحترموا القرار الجماعي يقول ليش ما تنزلون شيعي

ونعم الطرح

بس على مفهومك العنصري بسئلك

ليش تيارك ما ينزل شيعه

طبعا انا مو مقتنعه بهالمنطق

بس اخذك على مستواك

اما التحالف

فيا تحالف راح يزيد الضرب كل ما حسوا بقوتكم

واحد وسائل هالضرب راح تكون ليش ما نزل شيعه وبعدين ليش ما نزل عنزي وبعدين ليش ما نزل عنبري

لا عنبري مو قبيله

يا تحالف ويا اي قوى تحترم الكويت

مانبي ينزل هذا لاني شيعي وبس ولا هذاك لأن سني وبس ولا هذيك لأنها إمرأة

نبي خدمة الوطن نبي الكويت وبس

اللي يسأل ليش ما نزلتوا من هالمذهب أو هذاك

قولوا له احنا عندنا تنظيم والقرار جماعي والترشيح والاختيار مكفول لكل اعضاء التيار ولا عندنا مشكلة بمرشحين من فئة او قبيلة او جنس واحد

ومثل ما قال جمال العمر المهم الكويت

طبعا كلمة جمال صح بس اهوا طبعا مو صح

يالله الى اللقاء

واخليكم مع هالصورة ومنو الشاطر اللي يعرف هذي صورة منو

بدران مو تقول صورة احمد الفهد ترى انت تسويها

:)
ملاحظة الصورة بمثابة قدوة لجريدة الوطن

37 comments:

kuwaitawy said...

السلاااام عليكم

اول شي يشرفني ان اكون اول المعلقين ولو انها اول مرة ماشاءلله

فعلا المليق قاعد يناقض نفسه والله لا يجيب اليوم اللي يصير فيه حب الكويت يعتمد على الطائفه وهذي غاية جريدة العفن

اللهم احفظ الكويت وشعبها من كل مكروه


تشكراتي

kuwaitawy said...

وبالنسبة لتسمية المسيلة فلا تعليق



:)))

Anonymous said...

مناطق ليست بأسماء الشيوخ

حطين
الشهداء
السلام
الزهراء
الصديق
خيطان
الرقة
العدان
القرين
مشرف
بيان
السره
العديليه
الشويخ ...... ترى مومعناها الشيوخ

Yousef Khaja .. said...

Haatha Simiyyi Joseph Goebbels. Kan rfeej Hitler !! Oho kan isawwee il thajja wil da3aaya !

Ee sij .. Il Shi3ib mo 3ala asamy shyookh ! 3ad sij min kithir ma saraw asamee thawaa7y gimna man3arif kil wa7da ayhee :\

ya36eech il 3aafya btw ;P

3emey she3ey ebdewey e7therey zbairey naydey jna3ey a9el beyasir kuwaiti kuwaiti said...

wazer ilda3aya ilseyaseya fey 3ahd hitler :P sheno ja2eztey ? :P

senni she3ey 3emey a9el beyasir ebdewey e7therey kuwaiti kuwaiti kuwaiti said...

wazer ( ilda3aya ) ayam ilnazeya w hitler :P ( allah ekhaley google :P )

kila ma6goog said...

حسافة على اسم المسيلة

مع احترامنا للمرحوم سالم الصباح


بس الشباب ذكروني بالغزو و الطريقة اللي غير فيها العراقيين اسامي مناطقنا

انا كنت بحي الأحرار

حمودي said...

قايلكم الممكله العربيه الصباحيه بس ماتطيعون
http://the-3-monkeys.blogspot.com/2007/10/blog-post_02.html
-------------
احتريت

بيت القرين said...

كويتاوي
اللهم آمين
ومبروك اول تعليق

انو
اقصد ان كل المناطق الكويتيه المسماة نسبة لاشخاص او بالاصح السواد الاعظم ينسب لابناء الاسرة
ترى شدعوه يعني افهم ان مناطق وايد مو باسماء

يوسف
شاطر على الاجابة
واقرى ردي على انو
والله يعافيك

عيمي
صح بس سبقك يوسف

سني
الله يخليه

مطقوق
زين انك مو بالخنساء
:)

حمودي
ادري انك قايل بس لا تحتر

Bad-Ran said...

احمد الفهد :)

.............

قريبا جدا
قرطبة = ضاحية سالم العلي
السرة = ضاحية سعاد الصباح

bunaz said...

بيت القرين، أو دانة
أولا - من زمان كنت بارد على دعوتك لي بعرض أفلامي على احدى القنوات. ولكن لم يطلبهم مني أحد إلا مؤخرا وقبلت، ولا أعرف نزلوا ولا لأ . لكن الفكرة كانت تراودني ولما طلبوهم ما مانعت
ثانيا - بالنسبة لتسمية المناطق، أنا وياك ، وطويل العمر بعد شهرين أو ثلاثة من استلامه الحكم أمر بإزالة صوره من بعض الأماكن العامة وكان لهذا الأمر وقع حسن على المواطنين، لكن شتسوين بالمنافقين؟
ألحين نتمنى لفتة من سموه بالنسبة لإبقاء تسمية المناطق القديمة على حالها
وبو ناصر قدها وقدود

ثالثا - مشكورة على الجهود الطيبة ويعطيك ألف عافية

أنا كويتي said...

مناطق مو بإسماء شيوخ

فيلكا
عوهة
كبر
قاروه
بوبيان
مسكان
أم النمل
أم المرادم
الحيشان
الأرياق
البوية الطبعانة
الخيران
الدبدبة
اللياح
أمغرة

أكثر من جذي شتبون بعد؟
بتنهبون؟؟

al-nokhitha said...

wala 9ej 7asafa 3al esiim el messila bas etha ma 5ab thani ena mas2alat el mana6i'3 o asameeha beed a3thaa2 el majlis el baldii bas mo mit2akid :)

Sheno nesaiitaay esiim ajmal o ahda o a7la o awnas o ashra7 o ele feha a7la sekan man6aqtii el shamiiya ;p


3ala fekra tara el maleeq bara el tajamoo3 el salafi aw bel a7ra
ma6rood :)

ya dana 7esnay el neya momkin hal ash5a9 ekonoon dfee3a ;p

ana men9edim men shay el e5wan men wain lehum eflooos el youm ga3ed
a3iid e3lanathum bel wa6an men kethiirhum ma gedart akamilhum malait o kelhum ne9
9af7a :S:S


Allah ya36eech el 3afya :)

Eng_Q8 said...

لا حول الله

بس لفتت نظري الاسماء خوش صيده :)

Anonymous said...

وين ال100 دينار اللي اقرها سمو الامير للطلبة الدراسين بالجامعات الخاصة بالخارج ؟

تم اقرار صرفها من 1 يناير والحين دخلنا شهر مايو هل سيتم صرفها بأثر رجعي ؟

Anonymous said...

السلام

وايد وايد سهلة هدي صورة جوزف جوبلز

وزير التنوير و الدعاية يعني وزير

الأرشاد و الأعلام في حكومة ألمانيا

النازية في عهد هتلر و كان داهية في

تلفيق الأكاديب وكان عالي القدرة على

قلب الحقائق

نور said...

منطقة الصالحية

الملا صالح الملا - رحمه الله -


وديوانه بمنطقة الشرق، شارع الخليج العربي

bunashii said...

إذا كان توماس جفرسون قد كتب إعلان الإستقلال الأمريكي

وإذا كان كارل ماركس قد كتب البيان الشيوعي في أوروبا

فإن إلا نبيذي قد كتب بيان الوحدة الوطنية في الكويت

www.bunashii.wordpress.com

As YoU LiKE said...

مع احترامي لسالم الصباح
بس المسيلة اسم مخلد بتاريخ الكويت

اتمنى لا يتم تغييره .. وتسمية منطقة اخرى بإسم الشيخ سالم الصباح.

او يسوون له منطقة جديدة !

che said...

عدنا بعد طول غياب عن مدونتك الجميله
اما موضوع تغيير الاسامي للمناطق ما أأيد هالاسلوب مو بالمنطقه ولا غيره نخلد الناس لان الشخص الزين مهما عملتي راح تذكره الناس بالطيب اما الشين لو مهما عملتي ماراح يمدحونه

اما الصوره فهي لرئيس تحرير جريده الوطن السابق المرحوم سليمان المطوع يوم كانت الوطن جريده الوطن

حمودي said...

أنا كويتي
لوووووووووووووول احلا كومنت ظحكتني

فتى الجبل said...

منو يذكر الدمنة
وام الهيمان
والحين المسيلة
تراث دولة يمحى نهائيا

Fahed said...

بالنسبه لتسمية مناطق الكويت معظمها على اشخاص وبما فيهم الفروانيه على ابن فروان من قبيلة المطران وكذلك الصليبيه على احد افراد قبيلة المطران والعضيلية القديمه على فخذ العضيلات من مطير وبالنسبه للحساوي على مبارك الحساوي وما اعتقد التسميه مشكله بيني وبينكم الشيخ سالم الصباح نختلف معه او نتفق يبقى صاحب القلب الحنون ومن منا ينسى مواقفه في العلاج بالخارج عندما كان العلاج بالخارج تحتاج لعصى موسى لكي يتم توقيع معاملتك عكس مو حاصل الان اذلال مابعده اذلال انا اتكلم من واقع تجربه شخصيه ذهبت بنفسي الى وزارة الدفاع ايام ماكان الشيخ سالم الصباح وزير الدفاع ويعلم الله ماعندي لاواسطه ولا شي وكنت ذاهب مع صديق لي بنته في مرض هشاشة العظام ومايوجد لها علاج الا في كندا وكما تعلمون تكلفة العلاج هناك فتم على الفور توقيع القرار الوزاري لانه التقار ير واضحه بحالتها والله يرحمه له وقفات طيبه لن تنسى والله يرحمه ويرحم اموات المسلمين

Anonymous said...

أشوى مو بروحي اللي قهرني موضوع المسيله... و الله يا جماعه ان النفاق صار معلب و جاهز للتوزيع

Z.

مكوكس said...

صورة أخو محمد صبحي؟

أنا كويتي said...

حمودي

ضكحة فيها العافية أخو قلبي.

مرادي إن الشيخ سالم عسى الله يرحمه مو كثير عليه يطلق إسمه على أحد مناطق الكويت, بلاكت إسم المسيلة تراثي وحسافة عليه. كان من الممكن إطلاق إسمه على إحدى المناطق الأخرى الجديدة.

كذلك مو كثيرة على شهدائنا اللي ضحوا بأرواحهم أن تطلق أسمائهم على أي مكان أو شارع أو سكة. يا معود حتى لو على المقبرة اللي مدفونين فيها

العرزاله said...

ماني فاهم الشباب اللي قاعدين يحطون اسامي المناطق اللي مو باسم شيوخ وكأنها منة وكأن الديرة ديرة الصباح مع كل الاحترام لهم واسمها الصباحيه مثل السعوديه وان المفروض كل شي باسمهم بس شوفوا في اسامي مناطق مو عليهم ففف..سكتوا يعني

ياحبيبي المفروض المقارنه بالعكس ونعد جم اسم منطقه عليهم ونشوف جم واحد منهم له فضل او يستاهل ان تتسمى المنطقه باسمه مقارنة بباقي الكويتيين اللي لهم فضل وانجازات

والله يبا حاله

بيت القرين said...

بدران

الله يستر لا يسموني باساميهم
:)

بوناز
الله يعافيك
وصدقت الله بلانا بكثرة المنافقين
وننتظر فيلمك
يقولون في جزء ثالث صج؟

أنا كويتي
لا لا خلاص خل يسوون اللي يبونه دام جذيه

النوخذه
يعني اذا السلف طاردينه من يتحمله
وبالنسبة لاعلانات حدس
احد يقول لأ حق البلاش

مهندس
شفت شلون

أنو
مادري روحوا اشتكوا عليهم

أنو
صحيح شكرا على معلوماتك بس سبقوك وايد
:)

نور
شكرا على المعلومة
صاروا منطقتين
بس تدرين اظن ماكو منطقة بالكويت اسمها الصالحية مادري مخرفة ولا اكيد
بس ما اذكر اني شفت لافته بالشارع باسم الصالحية

بوناشي
بالفعل موضوع مخطوط بقلم وطني يستحق الثناء

آز يو لايك
اي والله صدقت

تشي
حياك الله ونورتنا
بس حرام عليك هذي صورة وزير الدعاية النازي اقرى التعليقات اول قبل لا تشبه المرحوم المطوع فيه
:)

فتى الجبل
صدقت

فهد
شكرا على المعلومات
وكلنا مقدرين دور سالم الصباح الله يرحمه
بس ميخالف نبي مساواة
كل من يقدم للوطن من داخل او خارج الاسرة خل يكرم مو اكثر

أنو
اي للأسف

مكوكس
من أمه بس مو أم وأبو
:)

العرزاله
اي والله حاله

Anonymous said...

في نادي الصيد و الفروسية على الدائري السادس

تم تسمية مضمار السباق باسم مضمار سالم صباح السالم للربع ميل

عشان مغثة بعض الناس راح يسمون منطقة الخالدية باسم ضاحية محمد عبدالله المبارك

Kuwait Karma said...

متى آخر مرة تم تسمية شارع أو من منطقة بأسم شخص من غير الاسره الحاكمة؟؟ وكم عددهم؟

اعتقد هذه خطوات استبقائية لاعلان مملكة الصباح!!

أرجو اني اكون مخطىء

Zaydoun said...

شفيكم نسيتوا الروضة؟؟؟؟ عسى ما سيمونها على شيخ دين من جماعة الإصلاح... ضاحية عبدالله العلي المطوع!! لا يحوشكم


شيوخنا الله يهداهم ما يدرون انهم لما يغيرون اسامي المناطق اللي تعودنا عليها، يسيئون لأنفسهم ويعطون الشعب سبب إضافي للتحلطم عليهم... كأنهم ناقصين

SPiDy said...

hatha ahwa جوزيف غوبل
http://ar.wikipedia.org/wiki/%D8%AC%D9%88%D8%B2%D9%8A%D9%81_%D8%BA%D9%88%D8%A8%D9%84%D8%B2

حسافتج يا كويت said...

كل التقدير لبو باسل رحمة اللة

ولكن مو المسيلة

عطوة المهبولة على الاقل اسمها عرة

وبعدين بس كافي

واللة ماقمنا نحفظ اي اسم منطقة يديدة من كثرهم


وانا قايل ماني ساكن باي منطقة باسم شيخ؟؟


شسوي يعني وين اروح؟؟؟؟

وباي حق يسمونها؟؟؟

اوكي كل شيخ بالكويت خدمها يعني كل الديرة اتسمى باسماؤهم؟؟؟

ومثل ما قلتي وايد ناس خدموا الكويت اكثر من الشيوخ

مالهم نصيب؟؟

mantovani said...

بعيدا عن الانفعال و التجريح

ولكن نحن كشعب له ثقافة

نتمنى ان تكون لدينا منطقة
تحمل اسم مستوحى من البيئة
او الموروث الادبي بمختلف انواعه

انا شخصيا ارفض رفضا تاما
تسمية المناطق او الشوارع
بأسماء اشخاص , بغض النظر عن اصولهم

و ذلك انصافا لكل افراد و اثنيات المجتمع

مانتوفاني

Bin3aqool said...

حثالة المجتمع راح اييهم يوم امثال المليق

المادة السادسة من الدستور الكويتي said...

خوش موضوع
و اتمنى زيارة موقعي الجديد


http://q80ies.blogspot.com/

مشكورين

ضد الجمبزه والتجمبز said...

موضوع جيد مع العلم انى شيعي لكنى مقتنع من كلامكم وعلى راسى احترمكم واكره الجمبازية اللى يتجمبزون علينا وعليكم

كفو عليك وعلى البلوغ