عظم الله أجوركم + ملاحظة جدا مهمة

تحديث على ردود الافعال آخر شي

يــا بــو فــهــد عـز وفـخــر فـقـدنـاك


عندي ملاحظة بسيطة بس

أول شي عظم الله أجوركم بوفاة الشيخ سعد العبدالله السالم الصباح

لاحظت ان كل المرشحين أو على الأقل الغالبية العظمى منهم ألغوا ندواتهم الختامية حدادا على المغفور له سعد العبدالله

طبعا الموضوع حسّاس شوي بس بقول رايي

الانتخابات راح تكون بيوم السبت الياي

والحداد راح ينتهي بنهاية يوم اليمعه

يعني بالغالب محد راح يسوي ندوة ختامية

وبالعادة الندوات الختامية تعتبر من أقوى الندوات تأثيرا على الجمهور وصنع القرار النهائي لهم

ادري ان المرشحين يحطون بعين الاعتبار مسألة إن اذا عقدوا ندواتهم ممكن الناس يقولون ما قدّروا أيام الحداد

بس انا شخصيا اعتقد إن هذي الندوات ممكن تحدد إختيار الناخبين

يعني تحدد مصير دولة لمدة أربع سنوات كاملة

ويمكن اللي يترتب على هالاربع سنوات يمتد لعمر اطول على مسيرة الدولة

لهذا السبب اعتقد إن المرشحين يحتاجون لجرؤة اكبر ويعقدون ندواتهم الختامية حتى لو كانت بيوم اليمعه او باجر الخميس

اي نعم الحزن موجود وتقديرنا للفقيد أيضا موجود

والندوة الانتخابية ما تعبر بأي شكل من الأشكال عن مظهر من مظاهر الفرح او عدم الإحترام

حتى لو استلزم الامر الطلب من الحضور عدم التصفيق او الوقوف دقيقة حداد أو تلاوة آيات من القرآن على روح المرحوم سعد العبدالله

بس مو الإلغاء

أتمنى إن الرسالة توصل للمرشحين

وحتى النااخبين عشان الكل يتفهم هالامر

عظم الله أجورنا وأجوركم مرة ثانية

وإلى جنات الخلد يا بو فهد

التحديث
:::::::::::::::::::::::::::::

رد عام على كل من يعارض رؤيتي بسالفة الندوات

مو لازم اقول لكم شكثر احب واقدّر الشيخ سعد الله يرحمه
لأن هذا شي يخصني انا


شفيكم

انا بالنسبة لي الندوة ماهي مظهر من مظاهر الفرح

ولا الاحتفال ولا شي من هالقبيل

الندوة هي عبارة عن ايصال برنامج وأفكار المرشح للناخب

هذا اللي افهمه انا

المرشحين واصلوا نشاطهم امس واليوم حتى باجر راح يواصلون نشاطهم بزيارة الدواوين

وطبعا زيارة الدواوين عبارة عن ايصال افكار المرشح للناخب على نطاق اضيق من الندوة

يعني ما تغير شي

اللهم ما سووا ندوة

اذا كانت الندوة واللي اهيا مثل ما قلت من اجل ايصال الافكار من مظاهر عدم احترام الفقيد

اذا زيارة الديوانيات واللي اهيا ايضا من اجل ايصال الافكار من مظاهر عدم احترام الفقيد ايضا

يمكن تعارضوني او تتفقون بس انا هذا رايي مادري ليش البعض استنفر للاسف

ثاني شغله

اذا الناخبين كلهم حددوا آرائهم يعني مفروض كل مرشح يقعد بمقره وينطر يوم الانتخابات وخلاص ليش الاعلانات والمصاريف عيل؟

مو معقوله ان كل الناخبين حددوا رايهم

ممكن انا حددت وممكن غيري حدد

لكن هذا بحكم ان احنا متابعين عن كثب

ادري حلوه عن كثب

بس في غيرنا وايد مو متابعين مثلنا ويحتاجون لتحديد الآراء

أحب اقول كلمة آخر شي

ترى إحنا المدونين يضرب فينا المثل بسعة الصدر

وسعوا صدوركم شوي حتى وان اختلفنا

وبس