23/04/2009

حرام على علي حلال على الباجي؟

بداية صدر حكم استئناف لصالح جمال العمر ان ما يشتري أصوات

وأنا أشكر جمال العمر

إن وصل لنا رسالة مهمة مفادها

ان مو كل بريء... بريء

الا على الطاري الحين مو علي الخليفة طلع براءة؟

انزين ليش الوطن ليما الحين ما تتكلم ان اكو ناقلات انباقت؟

ترى عادي براءة كتبوا
:)


علي الراشد مع مجموعة من النواب السابقين

راحوا واستقبلوا سيد حسين القلاف بالمطار بعد رحلة علاج طويلة

ووايد ناس اعتبروا ان اغرب ما في الصورة اللي فوق وجود علي الراشد

مع ان اغرب شي اشوفه بالصورة ان لاري موجود بدون
ولي أمره
:p

المهم

شنو كان احتجاج الناس على وجود علي الراشد باستقبال القلاف

الاحتجاج كان ان شلون بو فيصل يروح يستقبل واحد كان يطالب بتعليق الدستور من جم شهر؟؟

واللي يطالب بتعليق الدستور يتعدى على قانون البلد فما يصير نروح له ونستقبله بالمطار

وعشان نبتدي صح

القلاف ماله حق يطالب بتعليق الدستور وغلطان من عمامته لأخمص القدم خصوصا ان السيد نفسه اقسم على احترامه

بس تعالوا يبا

الراشد ما انتهك القانون ولا أيد القلاف بكلامه ولا مرة على موضوع تعليق الدستور

شنو المشكلة عيل

مشكلتنا صارت التعامل مع المتعدين او غير المحترمين للدستور؟؟

التكتل الشعبي واللي اهوا بطل بعيون وايد ناس وضمير الأمة وصوت الشعب وابطال القانون

عضوهم بالتكتل مرزوق الحبيني شارك بفرعية العوازم بالخامسة بدون لا ينطقون ببنت شفه لا احمد السعدون أسد القانون ولا مسلم البراك !!؟؟

حدس ملوك الألوان شاركوا بالفرعية وجمعان الحربش يقول عادي تتغير اساليبنا بإختلاف المناطق والدوائر؟

والسلف كذلك؟؟

مو بس هذي

كان في اجتماع لعايلة الصباح وكان فيها مطالبة من البعض بالحل الغير دستوري يعني تعليق الدستور والانقلاب عليه مثل ما طالب القلاف

وتسربت بعض الاسماء مثل جابر المبارك واحمد العبدالله وعلي الخليفة وغيرهم

احمد العبدالله نفى الخبر اللي بخصوصه

وجابر المبارك كذلك


اما علي الخليفة فما قال ولا كلمة للدفاع عن نفسه مع ان عنده جريدة وقناة

وهذا يعتبر اقرار ضمني باللي حصل منه ومن غيره من عيال الصباح اللي ما نفوا الخبر

معناته ان هم علي الخليفة من المطالبين بالانقلاب على الدستور

وكاهو التحالف يتعامل مع الوطن تلفزيونا وجريدة ونفس الشي المنبر من خلال النيباري

ونفس الشي هم شباب العمل الوطني

كاهم الوسط والوحدة مالت امريكا مرتمين باحضان الوطن

ونفس الشي المستقلة

لي متى بننافق انفسنا

شالنظام بالضبط يعني خل افهم؟؟

شنو اللي سواه علي الراشد وما سووه كل الكتل والمجاميع السياسية؟؟

اذا كان تصرف علي تهمة فكل التيارات والكتل متهمين

واذا كان ما فيه شي ليش مسلطين السنتكم عليه!؟

على فكرة انا من اللي انتقدوا علي الراشد

وما زلت انتقده على موضوع غير منطقي مثل القرض العادل على قولتهم

لكن ما انتقد ممارسة اجتماعية سوّاها ان راح واستقبل زميل مريض

آخر شي رسالة من الإستاذ الشاعر نايف الأزيمع وصلتني وأنشرها مثل ما إهي تقديرا له

توقفت طوعا عن الكتابة منذ فترة .. حسبتها تكاد تكون نهائية .. فما بقى بالعمر اكثر مما مضى ..! لكن الشعر المتدفق يرفض الإستكانة , والقصائد المتمردة لا تعترف بالتقاعد ..!وهذه سداسية متمردة رافضة... الى محمد الصقر


تاريخ يختصر الزمن فيك واشهد
في دفتر اهلك كل صفحه تجدًد
إن كان عمك*عاف من كثر ما شاف
عمك ** غدا لكويتنا ستر ولحاف
وابوك رمز الحق والعلم ينضاف
لحب الوطن معنى وصوره ومسند


الفارس اللي عن حصان ترجًل
عنده خيول مسرجه قول مع فعل
أعطى ويعطي للوطن دون منًه
صوت لشعبه والصحف يعرفنَه
حب الوطن يا ناس فرض وسنَه
قولة هله وآمن بها ما تردَد

*عبدالله الصقر** عبدالعزيز الصقر

ما بغى ينشرها بالجريدة عشان لا يوصف بالتطبيل لصاحب الجريدة مثل ما قال

وسلف ودين

35 comments:

Bad-Ran said...

عين العقل

Anonymous said...

هل يعقل ان يتم وضع اسم أحمد السعدون والتكتل الشعبي في مصاف حدس بانتهاك القوانين

للتوضيح فقط.. التكتل الشعبي هو تجمع لتنسيق مواقف داخل البرلمان لا أكثر من ذلك

ولذلك فإنه خارج البرلمان لا يوجد هناك ما يجمعهم رسمياً والدليل هو عدم نزول قوائم ولعل أبرزها في العام الماضي بالدائرة الرابعة بين مسلم البراك ومحمد الخليفة.. كان ممكن ينزلون قائمة ترفع من مستوى نجاح الخليفة لقاعدة مسلم الكبيرة بالرابعة

وعلى فكرة في ندوة بوعبدالعزيز الانتخابات الماضية قالها بالحرف المليان نحن ضد ضد ضد الانتخابات الفرعية ويقولها اليوم وسيقولها مدى العمر

أما تشويه صورة أحمد السعدون فهو مرفوض إذا ما علمنا بـ مفهوم التكتل الشعبي بالمعنى الصحييييييييح

وعلي الراشد ما سوى شي غلط

b said...

لا

ديرة بطيخ said...

هذا حقد التحالف عليه لان كشفهم وطلع منهم ولا شوفي الصوره معاه 10 اعضاء ليش ماقالوا عنهم شي


مايهزك ريح يا بوفيصل وفايز انشالله رغم أنف الكل

حنطفيس said...

كلامج يجمد عالشارب

MOODMAANI said...

قد نتفق احيانا كثير مع الراشد وقد نختلف احيانا قليله معاه
الا ان الراشد يظل رجل من القله اللي تعطينا امل بالديمقراطيه وبمجلس الامه

مهما اختلفنا معاك يابوفيصل لكن لانملك غير ان نحترمك ونعزك , ومهما اثاروا عليك اعدائك بقضايا تافهه فهذا ان دل فيدل على انهم مولاقين عليك ممسك او مقضب

موفق يابوفيصل

الدســتور said...

عادة اجتماعية لو حضر المطار حاله حال غيره

لكن يصرح بتمنى فوزه بالانتخابات
فهذه القوية

Haneen said...

من هو كاتب القصيدة؟

Anonymous said...

كل المرشحين اللي بالصورة راح يفوزون

بس المجلس الياي عمره من عمر الزهور !


دانه

مدونتك فقدت بريقها السابق !

: )

al-nokhitha said...

Teslmeen Teslmeeen Teslmeeeen ma agdar agool shay ezyada 3ala ele gelteeeeh :):):)

Q80 Blogger said...

ودي بس اتخيل واحد من التكتلات الي ذكرتهم مستقبل احمد الفهد بعد رحله علاج ومصرح يتمنى رجوعه لقبه عبد الله السالم
جااااان صارت قصه وخيانه وبلاوي

بس علي الراشد مرفوع عنه القلم

انا مو قادر افهم عقب كل تصرفاته هذي اشلون قادرين تعدونه من ربعكم وتدافعون عنه
صج صج نفااااااااق

الشق عود said...

ذهاب الراشد الى المطار يدل على اخلاقه واحترامه لزملائه وهذا احد الاسباب اللي يخلي الراشد محبوب من
جميع التيارات

عزيزي ابو الدستور
المجامله شي متعارف عليه بأطباعنا ككويتيين , يعني اذا زارك دميثير الى ديوانك هم راح تقول له بالتوفيق او الله يوفقك , فمابالك الراشد اللي يتمتع بعلاقة صداقه حميمه بالقلاف وقادم من علاج ايضا ؟!؟

almar7om said...

من المؤسف أن يتم اقحام السياسه في العلاقات الاجتماعيه و الانسانيه

DiLLi O MiLLi said...

صــــــح ألســــانك



علي الراشــد
ماااافي أدنى شك في وطنيته وأخلاصة لوطنة
الله يوفقه ياااااارب

Anonymous said...

يا عزيزتنا الغالية
من قال ان تصرفات باقي التيار صحيحة بالتعامل مع الوطن لكن تصرف الراشد ما هو ألا اخر الانحرافات وما حبيتها منك غمزك ولمزك لحصننا المنيع القضاء الكويتي اتمنى منك الرد لاستئناسي بردك الكريم
شكرا

Anonymous said...

اتظنين لما علي الراشد يشهد للقلاف ويقول الصادق بو صادق ويتمنى فوزه بطريقة بها من التملق والتزلف ما يوضح للعيان مقياس واضح للحكم على التصريح

Anonymous said...

http://whatkuwait.blogspot.com/2009/03/blog-post_16.html

علي الراشد: "وبسؤاله عن احتمال حل مجلس الأمة بشكل غير دستوري، أكد الراشد أن هذا الأمر يعودإلى حضرة صاحب السمو أمير البلاد ولم نسمع من سموه شيئا يتعلق بهذا الجانب"

Anonymous said...

اختي دانة كلنا نعرف علي الراشد .. واللي بيبكبر من هالسالفة ما عنده سالفة
-----------------

صج عاشق وطن وانتي شخص واحد؟ طالعة اشاعة يقولون ان اسمج علي خاجة مو دانة صج هالكلام؟ أتمنى تنزيل بوست رسمي حول هذا الموضوع

Coffee said...

والله تقرين افكاري انا من يومين على هالطاري مع رفيجتي.. شايشين شيشه على الراشد والمشكله لي قلتي ليش ما عطوج حجوه عدله! ليش تتهمون الريال بنفاق وغيره .. هل باق؟ هل ردح؟
وليش الزين تقل شعبيته بدون سبب والا لازم الواحد يصرخ يالله يصير زين!
للاسف يليت نحكم بالواقع مو بالهوى

Abdul said...

9a7 ilsanich, ba3th ilnas eshoufon nafs'hum ohma ilwa7edeen ily ekhafoun 3ala ma9la7at lq8 welbajee ya we9ouleya fasdeen

جبريت said...

والله يعني انا ما اقدر اعلق الا على مجموعه من الناس الي ارتمو بحظن الوطن تلفزيون وجريده كانو قله قليله لك فعلا مشوهه للموقف ومنهم علي الراشد رغم اني متأمل فيه الخير دائما

اما عن التكتل الشعبي ففعلا هم لا يريدون انتهاك القوانين لكن الحبيني فرعيه شنو نقوله من قبل الاسلام ينزل من غير فرعيه ولما طاح على الصحابه يسوون فرعيه دش بالفرعيات ونجح يحليله

بيت القرين said...

بدران
نزلوا موضوع بشكل اسرع انا اقول

انو
التكتل الشعبي ما ادان تصرف مرزوق الحبيني واذا فاز بالانتخابات على الرغم من مشاركته بالفرعية هل سيتم فصله من التكتل كما حدث لغيره؟

بي
شكرا

ديرة بطيخ
أختلف معاك لأن منتقديه مو من التحالف بس

حنطفيس
شكرا

مودماني
يستحق الإحترام لأن يمثل قناعاته بوضوح

ابوالدستور
ممكن التصريح لو سمحت

حنين
الإستاذ نايف الأزيمع

انو
عزيزي
بالفعل تغيير خط المدونة افقدها جوها العام
وهذا شي سويته بتعمد والسبب ان ما كنت ابي ادور في اطار التعليق على مهازل جريدة الوطن بشكل دائم
لمدة سنة كاملة تقريبا وانا ارد عليهم واركز على هالمحور لفضح أكاذيبهم
وصار عندي يقين ان الناس خلاص كشفت هالموضوع وماله داعي لتكراره
وتعمدت التحول لمواضيع الساحة بشكل عام
شكرا على صراحتك اللي اعتز فيها

نوخذانا
الله يسلمك

كويتي
غبقة أحمد الفهد ومناسباته الاجتماعية الكل يحضرها
الجريدة استقبلته بندوة
عادي ما قلنا شي ولا هاجمناهم
علامك الله يهداك؟

الشق عود
صح لسانك

المرحوم
اي والله

دللي ومللي
الله يوفقه

انو
ما غمزت ولا لمزت على القضاء
حالة جمال مثل حالة الكثير من القضايا اللي رغم وجود الأدلة تكون غير كافية او غير معتد بها مو أكثر
يعني احنا ندري ان جمال يشتري الأصوات وفيه فيديو بهالشي
بس الفيديو ما يعتد فيه
وهذا اللي حصل ماهو تشكيك أبد

وبالنسبة لموضوع الوطن وتعامل الجميع معه
هذا اللي ابي اوصل له
ما يصير الناس تنتقد علي الراشد وتترك غيره
فاما تنتقدهم كلهم او تخليهم كلهم
مو جذيه؟

انو
ممكن مصدر التصريح عشان اعلق عليه لو سمحت

انو
قالوا دانة النصار ودانة السالم وبشار الصايغ وراكان النصف وعلي خاجة لا وبالبدايات قالوا عني نواف الفزيع بعد
ارد على شنو ولا اخلي شنو
من البداية قررت ان الهوية تكون مو معلنة وما تغير هالقرار الى اليوم
المهم شنو ينكتب مو منو يكتبه
هذا رايي

كوفي
صح لسانج

انو اللي حط لي عنوان مدونة اي كويت
الراشد خانه التعبير اكيد وراح اكتب هالشي بموضوعي القادم
مشكور على المصدر

بيت القرين said...

حمول
صح بدنك

عنيف
اي يمكن هذا عذره
:)

Faisal said...

مافيها شي، الرسول كان يزور جاره اليهودي لما يمرض مع العلم إنه كان يأذيه !!

حجي فاضي

الشق عود said...

فقط لتوضيح موقف الراشد عن التصريح المنسوب له وقد كتبت نفس التعليق بأحد المدونات قبل فتره وسأعيده مره ثانيه:

لقد تضايقت مثلما تضايق الكثير من اللي قريته بالجرايد من التصريح اللي عن حل المجلس بشكل غير دستوري بيد صاحب السمو
فذهبت الى ديوان علي الراشد وسألته عن التصريح فأقسم بأن سؤال الصحفي هو هل تتوقع حل للمجلس بدون ذكر كلمة غير دستوري ولكن الصحافه اضافت كلمة غير دستوري او ان السائل لم يكن واضح بالسؤال .
وعلى فكره موقع الراشد حط تصريحه بالصحافه دون تعديل لأن تحديثات الموقع تكتب بواسطة شركه اعلاميه متقاعد معاها الموقع ودورها ينقلون تصاريح الراشد مثل ما انكتبت .
وتأكد بان الراشد كان ومازال من اشد المدافعين عن الدستور وهذا من اشد الاسباب اللي تخليني ادافع عنه .

وسلامة عمرك يالغالي

ماكو أمل said...

الحين أحمد السعدون تنتقدونه ..

بس والله


راح تبكون عليه دم إذا الله خذا أمانته


وتقولون .. راح المشرع والرمز والرئيس


إسأل أستاذك أحمد الخطيب عن السعدون وعن شموخه

احنا كل واحد فيها يتكلم

والرجل طول عمره يشرع

****

***

خالد الهلال .. جاك الدور

جديد مدونة ماكو أمل

http://makoamal.blogspot.com/

مَـــــعْــــمَــــعَـــــه said...

والله يستاهل علي الراشد كل خير بس ليش تغير شنو السر ما ندري والايام راح تبين لنا ان شاء الله

Anonymous said...

الاخ العزيز بيت القرين

ممكن تذكرنا متى الشيخ جابر المبارك نفى انه مع الحل غير الدستوري

وياريت لو توثق كلامك برابط حق تصريحه

Anonymous said...

رحبا عزيزتي تصريح علي الراشد لما قال الصادق بوصادق ويتمنى نجاحه (يقصد القلاف) في قناة سكوب لحظة استقبالة بالمطار وفي تصريح مغتضب له
اشكرك على ردودك

بيت القرين said...

فيصل
لايكون انت ولد بوفيصل
:)

الشق عود
شكرا على التوضيح

ماكو امل
حضرتك عندك موضوع عن اغتصاب القانون
وأحد مغتصبيه مرزوق الحبيني عضو كتلة العمل الشعبي
اللي يتزعمها احمد السعدون
ما تعتقد ان هذي هفوة من التكتل الشعبي واحمد السعدون؟؟

معمعه
شنو اللي تغير فيه؟؟

انو
عزيزتي
البحث عن تصريح جابر المبارك ومصدره
ما اشوفه يغني الموضوع
يعني لو جابر المبارك ما نفى الخبر
هذا يضاف لصالح الموضوع
بمعنى ان جابر المبارك يضاف للائحة من لا يجب التعامل معهم ولازم ننتقد المتعاملين معاه حالهم حال علي الراشد بنظر البعض
اما اذا كان مصرح بنفي الخبر
فالموضوع يبقى كما هو
بس ما فهمت شنو تبين توصلين له؟

انو
مشكور وراح احاول استفسر عن الموضوع من علي الراشد نفسه

Faisal said...

يمكن !!

بس ولده جم عمره ؟ أتوقع أنا أكبر منه

مَـــــعْــــمَــــعَـــــه said...

والله تغير وايد يا اختي عيل هذا علي الراشد الاولي بذمتج ما تشوفين ان تغير لا نقص على روحنا ونقول تهدأه والمصلحه تبي جذيه

Anonymous said...

http://blajat.com/ali/index.php?option=com_content&task=view&id=376&Itemid=2

http://www.aljareeda.com/aljarida/Article.aspx?id=101588

btw u can easily go to the link elli 7a6aita o tshofeen il masdar !
willi ygol enni kallamta o madri shino fa kalama mo moqni3 ma3a e7tirami lah !
kan il mafrooth ynazzil tawthee7 b nafs il jarayid elli nizal feeha il thasree7 yanfi !
tara elli galah mo shwayya enna yi6la3 min wa7id dayman ynadi bil 7ifath 3la il distoor !

الشق عود said...

اخوي غير معرف

موقع الراشد قام بتعديل التصريح وكتب تصريحه الحقيقي دون تعديل والرابط اللي انت حاطه يشهد

راجع الرابط اللي انت حاطه لموقع علي الراشد وتأكد

Anonymous said...

الشق عود

abeek ta7lif enna mo gabil cham sa3a m3adleena!
ana ams machayyik 3la il site o kan..

وبسؤاله عن احتمال حل مجلس الأمة بشكل غير دستوري، أكد الراشد أن هذا الأمر يعودإلى حضرة صاحب السمو أمير البلاد ولم نسمع من سموه شيئا يتعلق بهذا الجانب

dana
abi ur comment plz