26/03/2009

مواضيع الحل - هم التحالف

تحديث
::::::::::::

التحالف قرر المشاركة بالإنتخابات بحملة وطنية توعوية ومساندة المرشحين الوطنيين

ما أقول إلا

كفو عليكم يا عيال الديره

هذا السنع

:::::::::::::::::::::
أول شي

رسالة عاجله من عاجل يقول فيها

تحياتي لجميع الزملاء والزميلات الحلوات
عندي حالة مستعجلة
هي معاريس يريدون الذهاب الى ماليزيا
مشكلتهم هي كثرة المعلومات وليس قلتها
فهم لفوا بالنت لما تعبوا وما عندهم احد يرشحهم بكلمتين
احسن وانسب فندق في كوالالمبور
وهل هناك اماكن اخرى مثل الجزر تنفع يروحون لها

مشكلة اخرى هي انهم متابعين سفرات البلوغرز في وقتها
ومو ذاكرين منو وأي مدونة
تدرون معاريس
المهم يا اخوتي الاعزاء
افيدونا برسالة مختصرة


والميزانية تكفي لأربع نجوم والمدة اكثر من اسبوعين

أتمنى إن اللي عنده خبر يفيد عاجل وربع عاجل على شرط يردون يصوتون

:)

ذكرنا بالموضوع الأخير

التحالف الوطني الديمقراطي

ودوره وأخطائه برايي الشخصي

وطبعا البعض من اللي ما نشرت تعليقاتهم لقوها خوش جنازة عشان يشبعون فيها لطم

عموما بالنهاية هم قلة والله يشافيهم

تكرار انتخابات المجلس خلال سنة يعتبر حلم

يعني وايد ناس يتمنون يرجع الزمان لتصحيح الهفوات

صج ان في اشياء انكسرت بس برايي ان اللي انكسر ممكن يتصلح

اللي مفروض يحصل من القيادة اليديدة للتحالف حاليا اهوا عدم النزول بقائمة هذا اول شي وذلك للاسباب التالية

اذا كانوا بينزلون على شكل قائمة فهذا راح يطيحهم بحرج شديد وسؤال ملح من الناخبين بالدائرة الثانية تحديدا

واللي كانت قائمة التحالف فيها متشكلة من الصقر - الراشد - العنجري - العبدالجادر

إذا نزلوا قائمة حاليا اكيد انها راح تخلو من العنجري والراشد

وعلى حسب علمي ان الراشد قرر ينزل بشكل منفرد

وهذا راح يخلي الناس توجه سؤال للتحالف علامكم كشيتوا؟؟

واذا كانت الاجابة دبلوماسية بشكل ان الراشد يفضل ان ما ينزل مع التحالف

ردة فعل الناخب العادي واكرر العادي وما اكثر هالنوعية من الناخبين

راح يقولون اذا صاحبهم ما قدر يكمل معاهم شلون اعطيهم صوتي

اما بالنسبة للدائرة الاولى والثالثة فبطبيعة الحال ما راح يكون المدعج او الخالد مرشحين بحكم ان الناس قالت كلمتها بحق هالرجلين قبل اقل من سنة مع تقديري لهم

وبهالحالة يحتاجون ان يغيرون الاسماء

وفي حال تغيير الاسماء راح يتبادر لذهن الناخب فورا ان ترشيح هؤلاء كان قرار خاطئ من التحالف

وعدم نزولهم مرة ثانية اقرار بالخطأ

وهذي هم مشكلة

هذا بالنسبة لمسألة النزول على شكل قائمة

اما ثاني شي مفروض يحصل برايي اهوا اعلان التحالف عن دعم عدة مرشحين كبديل عن النزول بقائمة

وترسيخ كل الامكانيات البشرية اولا والمادية ثانيا لدعم المرشحين الاكفاء بنظر قيادة التحالف

ومنهم على سبيل المثال صالح الملا - علي الراشد - محمد العبدالجادر - احمد السعدون - اسيل العوضي و

محمد الحفيتي
:)

وهذا الشي طبعا راح يؤدي حق وايد اشياء مهمة وايجابية

واحد تذويب او الاسهام في تذويب الخلافات بين الاقطاب المتصارعة

اثنين توحيد الصف الليبرالي الوطني

ثلاثه واهوا الاهم نعرف منو طقاقنا

آخر شي من موضوع التحالف اهوا امل ورجاء وطلب

تكفون تكفون لا تفكرون - تلعبون سياسة - على حد تعبير البعض

يعني مو استراتيجيات وهالسوالف

هذا نعطيه هني ربعه يعطونا هناك

لأن التيار الوطني افشل اللاعبين استراتيجيا

قال البعض نصوت حق 29 واحد قبل اربع سنين

البعض لبس برتقالي بمقر وليد الطبطبائي؟؟؟

ولو هايف كان موجود حزتها وقايل نو نو جنغل لو

جان هم شفنا جم برتقالي بمقره

قال البعض نعطي السلطان نائب رئيس ومادري شنو المقابل

كان هالشي سبب من اسباب خسارة التحالف لعلي الراشد

وغيره وغيره من امور يت عايدي علينا لأن البعض فكر يلعب سياسة

مو لعبتنا لا نلعبها

بعد ما يصير بدر المطوع يلعب سلّة

عموما خلصت من التحالف والدور الياي على الراشد والملا وغيرهم

ويالله السلامة

نيو من الدقيقة 4.50 وطالع اهداء لك شايبنا
:)

15 comments:

Anonymous said...

عزيزتي بيت القرين استغرب من اطلاق مسمى التيتار الوطني على التوجه الليبرالي دون غيره من التوجهات بعتقادي هي تنطبق على جمبع التوجهات لانها جميعها تلهج بحب الكويت

Anonymous said...

رايي بالموضوع ببساطه
الكويتيين يكرهون الاحزاب اذا قلنا انهم يكرهون التحالف ممكن تقولون لي منو التجمع الاخر الي يحبونه الناس ؟ ماكوا



ببساطه اعتقد ان الكويتي يعتقد ان اي تجمع يموجود اوراح ينوجد يدور مصلحته ومو مصلحة الديره

هل كيف said...

أتفق معاج
يجب على القوى الوطنية
دعم هذه الأمثلة وليس الإقتصار
على نفس الأشخاص
ولكن يجب أن ننسى علي الراشد
فعلي الراشد اليوم ليس بعلي الأمس
فقد أصبح نسخة طبق الأصل من مرزوق
وجاسم
وأراهن أنه في حال نزوله سيكون مدعوم بقوة من قبلهم كما هو حال سيناتور ديميتري 2008

Hamad Alderbas said...

انا اقترح انهم يقعدون مع الكل , معك والملا والراشد والعنجري ويتفاوضون على الاسماء

Anonymous said...

احد اسباب الردى اللي يمر فيه التحالف اهو اعتماده بشكل كامل وقول هالكلام وانا معايشه وعارفه ..اعتماده على ماجد جمال الدين المستشار السوري لغرفة التجاره من ايام عبد الله السالم ( صج مو مبالغه ) لان محمد الصقر ما شك خيط بابره ولا يصرح ب حرف الا بعد شوره وهذا هو سبب الجمود والخمول الذي يمر به التحالف .. انا ما هاجم الريال بس قصدي كافي خلاص التقيد بالفكر التقليدي القديم وشكرا

ديرة بطيخ said...

للاسف الراس العود مو نازل

محمد الصقر

وهذي ضربه كبيره للتحالف

Anonymous said...

الفلم المبدع وعد الأحرار لطلبة أمريكا
تم تمويلة من قبل محمد الصقر لتلميعه للأنتخابات القادمة وهناك مدونات مثل أم صدة تعمل بوضوح لتلميع صورته بين الشباب

محمد الصقر وراء تأسيس التحالف وأصدار جريدة الجريدة وتوزيعه مجانا لقدرته المالية على الأنفاق وليس لكفائته

ورث الكرسي الأخضر عن المرحوم والده بمجلس الأمه أضافة الى رئاسة لجنة الشئون الخارجية

هذه المعلومات تؤكد للأسف أن شباب التحالف القادمون من الأسر الكويتية البسيطة ما لهم أمل في قيادة التحالف ودورهم ينحصر فقط في دعم أبناء الأسر الغنية خلال فترة الأنتخابات

Hashemy said...

كلام سليم المفروض من التحالف اليوم ان يدعم مرشحين خارج التحالف مثل الاسماء اللي انذكرت لانها اسماء وطنيه ولها مواقفها

والقوائم اللي نزلت العام ماتنزل هالسنه لانه التحالف مانجح الا بدائره وحده من اللي نزل فيهم وسياسة الاستراتيجيات هذي اليوم ماتصلح كلش معاهم خسرو فيها اكثر من اللي اكسبوه

نتمنى نشوف هالشي يصير بالايام اليايه
شكرا على الموضوع ويعطيكم العافيه

Ibn-Seena said...

القوائم تجمع المرشحين تحت إطار فكري و مبدئي، فتكون الكثير من الأصوات اللي يحصلونها بناء على توافق فكري معاهم، اما الظروف اللي فرضت ان المرشحين ينزول منفردين فتخلي مجمل الاصوات اللي يحصلونها بناء على اقتناع فردي او ضغط عائلي او قبلي او ما شابه.

للأسف ان الظروف تخليهم يتجهون لحالة أقل تطورا من اللي كانوا عليها الانتخابات الماضية.

Anonymous said...

دانه

التحالف قرر المشاركة بالإنتخابات بحملة وطنية توعوية ومساندة المرشحين الوطنيين

س : هل هدفهم فعلا مساندة المرشحين اليدد من الشباب والشابات الكويتيين أم مساندة القيادات القديمة التى فقدت صلاحيتها بسبب عوامل السن ؟

اذا هم فعلا يبون النجاح فليراهنوا على قوائم الشباب . عطوا الشباب الفرصة وما راح تندمون . صالح الملا وأمثاله كثيرين وبحاجة الى المساندة

إمـرأة لا تُنسـى said...

بعيدا عن السياسة

السفر الى ماليزيا، ممتع.. يمكن تجنب التكاليف العالية عن طريق حجز الفنادق والطيران الداخلي عن طريج الانترنت

خل تحجز الفنادق من اهني
http://www.expedia.com/default.asp

وإذا يبون تفاصيل المناطق والجزر والفنادق

http://www.arab-traveler.com/vb/showthread.php?t=18543

هذا ملف وورد، فيه كل منطقة وشنو يميزها وبأي الفنادق ينزلون، حتى ارقام سواق تاكسي موجودين

بعدما يحجزون تذكرتهم الى كوالامبور يبلشون حجز الفنادق وبعدين الطيران الداخلي

بالنسبة للطيران الداخلي في عندهم موقع الطيران الماليزي.. يوديهم من منطقة الى ثانية
http://www.airasia.com

nEo said...

بالصميم بوخالد

شكرا على الاهداء :)

كويتي متعصب said...

الفلم المبدع وعد الأحرار لطلبة أمريكا
تم تمويلة من قبل محمد الصقر لتلميعه للأنتخابات القادمة وهناك مدونات مثل أم صدة تعمل بوضوح لتلميع صورته بين الشباب
... hatha klam '3air 9a7ee7 ... tam tamwela men mezanyat alet7ad ... ana wedi a3arif shloon et2alfoon !!! ... oo om 9eddah blog yaktib 7alah 7al ay blog .. lah raya elle ye8tni3 feeh .. sawa2 m3 alt7alof aw '3aira ..

عاجـل said...

المعاريس سافروا وانا ارتحت من المهمة
وشكرا للمساعدة

الحين يقولون عندهم مطر

وانا قلت لهم هم عندنا مطر
يا القبسات من رحتو المطر نزل

عاجـل said...

تذكرت

التحالف الحين صار مظلة

لذلك رجعت الامور الى مسارها