صار لنا 829 يوم على عدم تسليم مجموعة الخرافي لإستاد جابر المقرر إنتهاءه ب نهاية أكتوبر 2006 وطبعا هذي الشركة يملكها جاسم الخرافي وإخوانه
جاسم الخرافي رئيس مجلس الأمة السابق وإن شاء الله بعد شهرين يكون الأسبق يالله يا كريم
يجمبز الدولة
مشروع يكلف الدولة 50 مليون دينار لدى توقيع العقد
تقدر تكلفته ليما اليوم 85 مليون دينار
ونواقصه يحتاج لها مادري جم مليون
هذا الرجل الثالث بالدولة والحريص على مصالحها يعني
ملعب مو عارف يسوي أو بالأصح ما يبي يسوي
هذا شي
الشي الثاني عبدالله النيباري متردد بين الأولى والثانية يا ليت اللي عنده راي حول افضلية وحده فيهم على الاخرى يدلو بدلوه الله يخليكم
ترى النيباري يقرى ويتابع
بالنسبة للي بينتقدون ترشيحه الرجاء ما يعلقون بهالخصوص بحكم ان استطلاع الراي عن افضلية وحدة من الدائرتين مو الترشيح من عدمه
انزين ذاك اليوم تشرفت ادارة الجوازات بمادري منو الصباح
شباب الصباح أضاؤوا قلطة الوطن
ازدانت الحلقة الاولى من حلقات »قلطة الوطن« بحضور شباب اسرة الصباح الذين أضفى حضورهم لونا مميزا وعطرا خاصا فاض عبقه في نادي النصر الرياضي الذي شهد افتتاح »قلطة الوطن« الثانية بحضور كثيف تابع الحلقة الاولى بحب وشغف
شصاير شالسالفة ؟؟؟
مرة ينورون مرة يشرفون؟؟
انزين ندش بالسالفة
مشكلة الرياضة بقيادة طلال الفهد وعصابته اللي طولت من فبراير 2007 وما انتهت أو تصورنا ان انتهت الا لما الامير تدخل بشهر 12 اللي فات
عاد يه راعي الحرشا وقتها وتعين رئيس مؤقت للاتحاد على ابو ان يحل المشكلة
ويخلي المتمردين يعني اخوه وربعه يوافقون على قوانين الدولة
وعطوهم 6 اشهر يعدلون الوضع
لكن راعي الحرشا أحمد الفهد وبدال ما يحل المشكلة ويفكنا من بلوة الايقاف الكروي
قرر ان يصير مفتاح انتخابي حق شيخ بحريني ويحارب اللي سعى لرفع الايقاف عن الكويت
اللي اهوا رئيس الاتحاد الاسيوي محمد بن همام
وجان زين فالح عاد بهالشغلة قاعد يفتر الدول
ويلبس هدومهم اللي تضحك
وبالنهاية قرر الاتحاد الاسيوي منع الكويت من المشاركة بالتصويت بحكم انها لجنة معينة
اللي ابي افهمه الحين
مرت اربع اشهر وراعي الحرشا ما سوى ولا راح يسوي شي كالعادة
بس كلام على قولة غلام
والحين الكويت انحرمت من التصويت
وما ندري غضب رئيس الاتحاد الآسيوي شراح يسوي على الكويت زود
بسبب صبيانية راعي الحرشا
وهذي كرتنا على الخازوق
بسبّة راعي الحرشا
يعني لا رياضة فلحت قبل ولا فالح الحين
لا طاقة لا اعلام
لا امن وطني
حق شنو تنفع انت بالذمة؟؟
دامك تحب الفرارة خل يعينونك سفيرنا ببوتان او مكاو او ديرة ما تقدر تغزونا او تأذينا
هم نفتك من شرّك وهم نضمن ان الديرة اللي انت فيها ما تضرنا
والبس اي شي يعجبك هناك وطول شعرك كثر ما تبي بعد
وطبعا كالعادة قناة الوطن ماخذه ارشيف تلفزيون الكويت كله
وببلاش
ومر يا حلو
28 comments:
و الله اني شفت خبر تنويرهم بقلطة الوطن و قلت ما راح تطوف على دانة
شنو الموديل تكفون فهموني؟؟؟
و اللي مطول شعره يعني من الشلة؟؟؟
الله يعينهم على عمرهم
أعتقد الــنــيــبــاري أفضل له ينزل بالأولى و حظوظه هناك واضحة بالنسبة لي و لقد كتيت عن هذا الموضوع من اسبوع تقريبا
الرجل الثالث على البلد
هذي عمايله
على قولة المثل
هذا الملا شحال حنا
!!!
بالنسبة للنيباري
أعتقد الأولى هي الأفضل , خصوصا بعد فوز النائب الرومي بمركز متقدم في الانتخابات السابقة
طبعا اذا صدقت الاشاعات و نزل بقائمة مع الوسمي + بو شهري ممكن تكون قائمة قوية جدا خاصة و أنها قد - ق- - ق- تستجلب اصوات العيم و العوازم
اقول قولي هذا و استغفر الله لي و لكم و السلام عليكم و رحمة الله و بركاته
النيباري رمز وطني كبير
ونجاحه بأي دائرة مشكوك فيه لأن الوطنين أصبح نجاحهم أصعب من السابق
أعتقد أن الدائرة الثانية حظوظه أكبر فيها لوجود قاعدة انتخابية ليبرالية كبيرة فيها
أما الأولى فالوضع مشكوك فيها جداً ويتعسر على الخبير قرائتها
دائرة طائفية وقبلية قد تكون حظوظه فيها قليلة ولا يمكن التعويل على أصوات الشيعة لأن هناك ضغوط كبيرة عليهم للتصويت لطائفتهم وكذلك السنة سيفضلون أي قبلي على الليبرالي النيباري
اتحدث بالعموم
عن نفسي اتمنى ان يترشح بالاولى ويفوز فيها
لكن الفوز صعب من وجهة نظري
لذلك الثانية قد تكون انسب إلا ان نزوله سيساهم في تشتيت الاصوات الوطنية ( الصقر ما اعتبره منها ) وعلى العموم اتمنى له وللتيار الوطني التوفيق
تحية
حسب تصوري الشخصي في الدائرة الاولى من الصعب ان يدرس النوايا والحظوظ خلال فترة بسيطة و هي فتره ال 60 يوم ....
اذا كانت هناك دراسة سابقة تدل على زيادة الحظوظ بالاولى فهذا شي زين ..
الامر الاهم هو كيفية الوصول للفكر الموجود في الدائرة سواء كان طائفي ام قبلي .. طبعا مو الكل شفنا اصوات مشتركة واااايد بين مرشحين محد له شغل بالثاني لا من قبيلة ولا من طائفه لكن الالتزام بهذي المعايير سمه من سمات الدائرة الاولى
اي نسيت لحظة فالاهم اهوااا الانتشار الجغرافي في مناطق الاولى هل هو على استعداد بالانتشار و تعريف برامجه و نشر اهدافه طبعا اتوقع قادر بس انا اتكلم جغرافيا و التغلغل و التقرب من الحياة الطائفية و القبلية لنشر الوعي و مفهوم الديمقراطية للي ناقصه هالشي و هذا مو نقص ب ناخبين الاولى بالعكس لكن ميولهم ل القبيلة و الطائفة واضح من خلال نتائج الانتخابات السابقة .....
بالنهاية رايي الشخصي اذا فكر ب خوض الانتخابات بالاولى انشالله يكون حليفه التوفيق اما الثانية كل الي اعرفه عنها ان للنيباري قاعده ممكن يرتكز عليها لكن فيها اسرار ماعرفها والي كانت السبب ب سقوطه فيها
rwatan
فالك وما قبلناه ! أنت نازل بالثانية وودك تبعد النيباري للأولى حتى يخلو لك الجو على أمل كسب أصوات أبناء الثانية ! بس بعيد عن شنبك ! بومحمد حظه كبير بالثانية وأنت مثل ما تركت أمانة التحالف أنصحك بترك الأنتخابات لأنك مو قدها
حتى بمدونتك حاط صورتك على صور عمالقة الديموقراطية الكويتية . قليل من التواضع .
كثرة الأوامر التغييرية على المناقصة لصالح المقاول الرئيسي للمشروع وبدون محاسبة أي مسئول بالهيئة عن السبب في طلب التعديلات المطلوبة على المشروع الأصلى خلال فترة التنفيذ يتسبب في الهدر وارتفاع كلفة أي مشروع حكومي
المناقصة الحكومية حسب الأسلوب الحالي ما هي الا طريقه من طرق توزيع الثروة على التجار
للحد من ذلك بأمكان الدولة الأعلان عن المناقصات الكبرى مباشرة للشركات العالمية كما يحدث في دول الخليج
العم بومحمد النيباري فرصته كبيرة بالثانية واذا ما حالفه الحظ بالثانية لا سمح الله فاللوم يقع على أهل الدائرة لأنهم أستبعدوا الأصلح وأختاروا أعداء الكويت والحرية . فرصته بالأولى ضعيفة لأنها فعلا وفق التقسيم الحالي هي دائرة طائفية وقبلية
الدائرة الواحدة ممكن تكون الحل لكل هذه الأمراض المزمنة
اي نعم ينورون وشرفون لي متى هالغل اللي تارس قلبج او قلبك .. ناس احترمونا واحترمناهم ...عاملناهم بالمثل وبالند للند دون اي مشيخه منهم انا بس بفهم شنهي عقدتج او عقدتك منهم والا بس مع الخيل يا شقرا ،،، اوكي علي الخليفه فعلته تركته احمد الفهد فعلته تركته م، معناته خلاص نعادي الكل منهم ونتصيد على الكل منهم !!! بابا اللي بيتهم من جام ما يحذف الناس بصخر روحي شوفي البلاوي اللي عندكم بالتحالف ورموز التحالف وبعدين تهكمي على الناس .... مر وقت كانت هالمدونه علج بين المدونين واظن تذكرين اللي صار لج حزتها اشوف ما طلع لج لسان او طلع لك - كله انسى - واللحين صار الوضع مخولف !!! اتمنى نشر هذا التعليق والرد عليه وشكرا
رأيي أن ينزل النيباري في الدائرة الاولى
لانني أريد أن انتخب أحداً يمثل توجهي السياسي
بدونه سينتهي المطاف - بي و بالكثيرين من أبناء الدائرة - إلى إلقاء أوراق خالية في صندوق الاقتراع لعدم رغبتنا في التصويت على أسس قبلية او طائفية تحظ عليها بوصلة الترشيحات حتى الآن
معازيب المستقبل في قلطة الوطن!!
إلتم المتعوس على خايب الرجا.
وراح نشوف النهاية المأساوية لما تبقى من الرياضة الكويتية على يد أندر تيكر وإخوانه
و مع إني بالثانية, إلا إني أتمنى نزول النيباري بالأولى لأن أهل الثانية ضاعوا بين راعي السياكل وشهبندر التجار
أولا سواء نزل بومحمد بالأولى أو الثانية
يجب دعمه والوقوف معه لتاريخه المشرف
على طاري راعي الحرشا بو فهد
ادعوكم لقراءة بوست (رأس الأفعى)ا
مدونة بيت الشعب
يقال ان الدائرة الثانية افضل له والله اعلم
صح ألسانج على هل بوست الطيب
كل الكلام الي قلتيه 100% صح
الله يفكنه من شره
يبا شركة الخرافي ما تبي تخلص المشروع لسبب غير معلوم، واللي يبط الجبد إن الحكومة ساكته والمجلس بكل أعضاءه (راح أستثني الخرافي) ساكت !! وماكو أحد غير الرياضيين يتكلمون بهالشي !!
أما بالنسبة لكلامك عن أحمد الفهد، فأعتقد لو كان عندك مجلس أمة فيه أوادم عدلين جان عدلوا القوانين من أكثر من سنة وشافوا الإختلافات بينها وبين القوانين الدولية، ولكن للأسف أعضاءنا بس فالحين نبي نستجوب هالشيخ ونبي نطب بذاك الشيخ، وأغلبهم ما همتهم الكويت بأي شي !! يا أخي عندك مشكلة صار لها سنتين و انت لما الحين ما سويت شي !! ما أقول إلا خلف الله على الناس اللي صوتوا لهم بس !! أنا مادري احمد الفهد شنو يبي يسوي علشان يحل المشكلة، لأن المشكلة طلعت من مجلس الأمة وما يحلها إلى مجلس الأمة أو مرسوم ضرورة لأن بقا لنا أقل من شهرين على المهلة والله يستر.
أما بالنسبة للنيباري، فأعتقد إن ترشيحه بالدائرة الثانية أنسب له لأن فرصته أكبر في ذيج الدائرة، وخاصة إنه فاز جم مرة هناك، أما الدائرة الأولى فهي لا تتقبل هذا النوع من المرشحين لأسباب معروفة، أما سالفة القائمة اللي راح ينزل فيها فأعتقد إذا النيباري نزل مع هذيلا فأبشروا بسقوطه لأنه راح يعتمد على أصوات الشيعة والعوازم اللي ما أعتقد أكو أحد فيهم راح يصوت حق هالقائمة واللي شكلها راح يكون طائفي !!
النيباري افضل مكان لنزوله هي الدائره الثانيه
لان الدائره الاولى اغلبية توجهاتها قبليه طائفيه
شكرا
اللي ساب داره .. قل مقداره
الثانية .. ثابته
النيباري بالاولي افضل حسب اعتقادي
اما باجي البوست فكلام صحيح
تصرفات احمد الفهد ... شي غير عادي
حبيت أضيف شغله
هل بن همام فاد الكويت ؟ وشنو اللي سواه بن همام أصلا ؟ و كاهو اليوم يمنع الكويت من التصويت لأنها ما راح تصوت له !! صج مشكلة إذا الشخص كره واحد و يبي يحط عليه !! أنا بعد ما أحب أحمد الفهد و أعتقد إنه فاشل بس هذا مو يعني إني أطب فيه حتى لو ما كان غلطان !! شويه حياد
ياليت بس تحطيلنا صورهم اللي حاطتها الجريده... تقولون صور ناس من الجاهليه وإلا القرن السادس عشر!!! وين كويتيين الخمسينات وويين الحين. اشكال تفشل استحي اقول هذول يمثلونا
بما أن النائب السابق محمد الصقر قرر الأعتزال
لذلك أشوف فرصة العم الرمز عبدالله النيباري أقوى بالثانية
و اللي يقول بومحمد كبر و ما راح يسوي شي هذا ما عندة سالفة
كفاية مداخلة الأخيرة في مؤتمر التأزر هذي أقوى رد على اللي يقول ما راح يأدي
المجلس بحاجة حق رموز بحجم العم عبدالله
الله بوفقة و إنشاالله نشوفة مشعلل بالمراكز الأولى
تحياتي
كويتي شعبي
و بالمناسبة للتصحيح
رئيس مجلس الأمة يعتبر الرجل الثاني بالدولة و ليس الثالث
محمد الصقر اعتذر و ما راح ينزل بالثانية
فرصة بومحمد صارت أقوى بالثانية
shakoo jassem il khrafi ib istaad jaber, mala shiqil ib shiqil ilmajmo3a kilish.
lo bas allah yfikna min il 7asad inkon ib khair!!!
بن همام صار فراس الخطيب على أحمد الفهد ;Pp
لا و تصريحه الي قبل يومين الله يهداه مادري ليش احسه مفسر جمومه و قاط الغترة و يبي يتفلت ,, تيك ات ايزي يا عزيزي الهوى غلاب و أمر الله غالب و أوم اوئف و انته بتكلمني << هذي من عند بن همام ;Pp
أختيار النيباري للثانية جاءت خطوة موفقه ومبروك مقدما للرمز الكبير بومحمد وكيك آوت كبيرة للعنجري وخله يجابل نفسه بالمنظره وهات يا رغي
يستضيف برنامج مجلس الأمة 2009 على قناة الراي اليوم الاربعاء الساعة العاشرة والنصف مساءا النائب السابق ومرشح الدائرة الثانية علي الراشد
البرنامج من تقديم عبدلله بوفتين
Post a Comment