ابي معلومات

اللي عنده معلومات عن محمد ابراهيم ومسيرته بالمنتخب والقادسية

خل يدز لي ياها رجاءا اليوم اليمعة لأني باجر بكتب موضوع عنه

danatelq8@gmail.com

طماشة

اليوم الثلاثاء الساعة 7 في ندوة بجمعية الخريجين بعنوان

مالجديد في الحكومة الجديدة؟

يحاضر فيها النائب السابق مشاري العصيمي

المهم

في شي ماني فاهمته 

واحد من سنتين يقول صواريخنا تصل لحيفا وما بعد حيفا وما بعد بعد حيفا

والثانيين

خطفوا طيارات وفجروا اهم مبنيين اقتصاديين بالعالم ووين بأمريكا

ومسوين لوية بالعراق صار لهم 6 سنين

 

ومسوين لوية بباكستان وأفغانستان

ابي هذيل كلهم وينهم عن اسرائيل

 

وليش ما يطقونهم

ويطبقون جهادهم الإسلامي اللي يدعونه؟؟؟

انزين الحين خالد السلطان قائد السلف يبيع خمر بلبنان

ووزير التجارة احمد باقر تابع لخالد السلطان بالتجمع السلفي

شلون يحرم فترينة المحلات ورئيسه بياع خمر؟؟؟

مو مشكلة

يقولون ان في اسهم بالبورصة صار سعر مليونها ب اقل من 10000 دينار

ليش ما ينقلون البوصة حق المحاميد

لأن التنافس اقوى هناك

باجر لعبة المنتخب مع عمان بستاد الصداقة والسلام بالعديلية الساعة ست

ويقولون الدخول مجاني

وهذا اغبى قرار

يعني دشة الملعب ما تعدي دينارين ليش تخلونها ببلاش

دام مو هامتكم الفلوس

خلوّا الدشة بفلوس ومردودها حق اللاعبين بس

يعني متوسط سعر التذكرة دينار ونص بعشرين الف مشجع هذي 30.000 دينار

وزعوها على اللاعبين بدال شغل البلاش الغبي اللي قاعدين تسوونه

انزين سؤال الحين اسرائيل شبعت قتل ووقفت اطلاق النار

قبل لا يدش فبراير

يصير نسوي حفلات ولاّ خالد السلطان وربعه ما يرضون

بيني وبينكم في مشاكل وايد

وكلها تستاهل موضوع كامل

لكن الربع مكتفين بالطماشة والانتقاد بدون فعل

محد يبي يسوي شي

فنتطمش معاهم ونشوف المشاكل يوم عن يوم تكبر

خنشوف نية التحرك متى تصير

عموما

هذي مدونة يديدة اسمها معمعة

وهذا فيديو يديد كان ممكن يكون احلى لكن نشجع كل الجهود

خمّة فجر

أمس للأسف شفت قناة خمّة فجر

أسميها قناة خمّة فجر لأنهم فعلا دخلاء على الكويت وعلى أهل الكويت

كان مذيعهم مقابل الوشيحي

فتكلم الوشيحي والمقابلة ماكان فيها اي زود

 

بس الوشيحي يسأل المذيع المخضرم شنو معنى الليبرالية 

يرد عليه بأن الليبرالية اهيا فصل الدين عن السياسة؟؟؟

حق اللي يتبوسمون وما يدرون شنو ليبرالية

هذا تعريفها العربي

وهذا الإنجليزي بعد

المهم

مشت المقابلة ليما ياب المذيع طاري حلقة الوشيحي ويّا القلاف

 

وقال له انت ما عطيته المجال يتكلم والقلاف قال لنا هالشي بقناة خمّة فجر

فرد عليه الوشيحي ان القلاف بدعوته لتعليق الدستور كان غير موفق

 

فقال له المذيع المخضرم

انت مو ملاحظ ان النوّاب قاعد يسيئون للمجلس

قال له الوشيحي نعم

 

بس انا احمل المسؤولية على الحكومة ورئيسها

هني إختبصت القناة كلها

وكأن الوشيحي قال كلام  غريب على الكويت وعلى سياسيينها

المذيع يقول له ليش يبت سيرة الحكومة انا ما سألتك عن الحكومة

وناصر المحمد خط احمر

رد عليه الوشيحي ان رئيس الوزراء على الصعيد الشخصي والإنساني يستحق تزوجه بنتك

بس على الصعيد السياسي تطلقه منها

رد المذيع وقال لا تقول مثل هالالفاظ عن رئيس الوزراء؟؟؟

وصار الحديث بين شد وجذب الوشيحي المسكين يحاول يشرح ان هذا حق وشي طبيعي الانتقاد

وقناة خمة فجر مثل القطيع لا ما يصير ولا تقول ولا تسوي ولا تتكلم

ليما يات الطامة الكبرى عاد

لما استشهد المذيع بمتصلة بأحد برامجهم اللي اثنت على مكالمة سلطان بن فهد

حق قناة السعودية الرياضية

وقال ان يجب ان يكون للأسرة الحاكمة هيبة مثل ما سوّى سلطان بن فهد؟؟؟؟

وهذا اللي يخليني اقول انها قناة خمّة

لأن الخرفان يبون واحد يطقهم على راسهم

ويكونون قطيع يمشيهم الواحد على كيفه

شلّة دخلاء على الديرة ما يعرفون شنو يعني كويت وشنو يعني كويتي

كل يوم واحد يحط لي خط أحمر

 

مرة حق الشهيد الوحيد

 

ومرة حق رئيس الوزراء

 

ومرة حق راعي الحرشا

الا صج يعني شنو الحرشا خل افهم

الكويتي مو خروف حق احد وما عنده خطوط حمر غير الدستور والقانون

اذا احد شاف شي غير جذيه من اي شخص فتأكدوا هذا مو كويتي وما تتشرف الكويت بوجوده

قال خط أحمر قال

تعالوا ليش محّد دز لي بنر يديد محّد يعرف يصمم يعني؟؟

انزين الحين نروح حق القضية اللي بتصير طائفية غصب طيب

لأن محركينها بالعادة ناس اصحاب نفس طائفي من امثال هايف وعاشور ووليد

الفالي ويا طلاّبة الفالي

وليد وهايف بعد ما طلع حكم البراءة للفالي قالوا احنا ما استجوبنا رئيس الوزراء عشان هذا عليه حكم

لا بس لأن عليه قيد امني وما يصير يدش الكويت

كلام جميل

انزين القيد الأمني صدر بصدور الحكم على الفالي

والحين الفالي طلع برئ

 اذا تلاشى القيد الأمني 

شرايكم تخلونه يدش الحين يا المتكلمين بإسم القانون يا هايف ووليد

ام ان لحاكم كاذبة كعادة الكثير من اللحى

ادري قبل لا احد يستل كيبورده من غمده

الفالي سب شخصيات من الدولة الإسلامية واليوتيوب يشهد

لكن يا جماعة في شي اسمه قانون

حتى لو ما عجبنا لازم نحترمه

ونتخذ القنوات القانونية ليما النهاية

يا تحقق لنا اللي نبيه او نحترم قراراها المخالف لآراءنا

خل اعطيكم مثال

واحد باق الناقلات والاستثمارات

حرامي يعني

وعندنا ادلة تقول جذيه

وارقام حسابات وهالسوالف

لكن المحكمة حفظت القضية لأن الأدلة ما كانت كافيتها 

هل نقدر نقط الحرامي بالسجن الحين واحنا متيقنين انه حرامي؟؟

طبعا لأ

لكن اللي نقدر نسويه ان نتابع الإجراءات القانونية للطعن بالحكم وغيره من إجراءات

جذيه مفروض نتعاطى مع القضية مو 

لا الفالي سب السنة

او لا الفالي مظلوم

شنو هالكلام الفاضي

في قانون اذا في احترام له

نقطة

 

وشكر لازم نقوله بالنهاية حق الداخلية انها نجحت بما يسمى بالقمة بدون زحمة

او على الاقل انا ما حاشتني الزحمة

خوش تنظيم ومشكورين

ليش قمّة

هذي الشوارع المسكّره طوال فترة ما يسمى بالقمّه

من العشر الصبح ليما الوحده الظهر

ومن ثلاث العصر ليما تسع المسا

عموما رديت التصميم القديم للمدونة بعد نهاية كاس الخليج

بس البنر اختفى للأسف

اللي يقدر يسوي بنر يديد حق المدونة اكون ممنونه له

وخل يدزه على

danatelq8@gmail.com

المهم وصلني خبر ان قناة فجر السعيد بعد خسارة المنتخب من السعودية

إشتغلت أغاني وهجوم على منتخب الكويت

خلاص عافك الخاطر واشياء جذيه

انا اقول حق فجر وشلّتها إستحوا على ويوهكم شوي

وشبابنا ما قصّروا ولا فجر ولا شلّتها يوصلون لمواصيل شباب المنتخب
واللي يعطونه حق ارضهم رغم كل الظروف الصعبة

وانتوا اللي صج يبيلكم مكالمة من سلطان بن فهد

على طاري المكالمة من سلطان بن فهد اللي حاطينها ام صدّه

هذا حق كل اللي يتمنى ويطالب بحل غير دستوري

شوفوا شنو ممكن يصير اذا تم تغييب صوت الأمة

على الرغم من بلاوينا بس محّد يتجرأ يتكلم بهالإسلوب معانا

واللي يفكر يسوّي جذيه

ويله يا ويله مننا

إنزين وصلني مسج من كويت نيوز توّه يقول إن محكمة الإستئناف حكمت ببراءة الفالي من سب الصحابة

أدري إن الحكم مو نهائي بس هذا حكم الإستئناف والفالي غير مسموح له حضور المحاكمة

انزين لنفرض ان طلع حكم التمييز انه الفالي براءة

شنو نستنتج مثلا

ان الحكومة خافت من انها تخلّي واحد يقعد بالكويت واهوا برئ

وإن الطبطبائي وهايف والمطير والعجمي دخّلوا الديره بأزمة وعطلوا الحياة التشريعية بدون اي سبب

وان الكويت ظلمت شخص ماله ذنب؟؟؟

معقولة كل هذا عشان تتحقق اهواء جم لحية؟؟؟؟

آخر فقرة

من أول ما إنولدت وأنا أسمع عن شي عربي اسلامي اصيل اسمه قمّة

كلما اجتمعوا الزعماء العرب او على مستوى اكبر زعماء الدول الاسلامية صار الاسم قمّه

إي ليش إسمها قمّه عاد؟؟

اذا القصد ان رؤوس الهرم في الدول يجتمعون خنسميها اجتماع الزعماء

لإن القمّة لازم توصلنا لقمة القرارات المفيدة

وانا بأمانة ما شفت قرارات مفيدة مع اني سمعت عن اجتماعات وايد اسمها قمّة

قمة اول امس بالدوحة تشجب وتدين

قمة قبلها تستنكر

قمة باجر تطالب

شنو هالقمم هذا

وآخرتها بس فيتو امريكي يلغي كل هالشجب والادانة

والحين بعد على قولة مطقوق

قمة اقتصادية ثروات كل دولها ما تعادل ثروات مايكروسوفت وجوجل "جذي اسمها بالعربي" مو بيدي

على شنو وفوق هذا شوارع مسكّره

ما اقول بالختام الا رائعة احمد مطر

ارفعوا أقلامكم عنها قليلاً
واملئوا أفواهكم صمتًا طويلاً
لا تجيبوا دعوة القدس .. ولو بالهمس
كي لا تسلبوا أطفالها الموت النبيلا
دونكم هذه الفضائيات فاستوفوا بها -غادر أو عاد
وبوسوا بعضكم .. وارتشفوا قالاً وقيلاَ
ثم عودوا .. واتركوا القدس لمولاها .. فما أعظم بلواها
إذا فرت من الباغي .. لكي تلقى الوكيلا
طفح الكيل .. وقد آن لكم أن تسمعوا قولاً ثقيلاً
نحن لا نجهل من أنتم .. غسلناكم جميعًا وعصرناكم .. وجففنا الغسيلا
إننا لسنا نرى مغتصب القدس .. يهوديًا دخيلاً
فهو لم يقطع لنا شبرًا من الأوطان لو لم تقطعوا من دونه عنا السبيلا
أنتم الأعداء يا من قد نزعتم صفة الإنسان .. من أعماقنا جيلاً .. فجيلا
واغتصبتم أرضنا منا وكنتم نصف قرن .. لبلاد العرب محتلاً أصيلاً
أنتم الأعداء يا شجعان سلم .. زوجوا الظلم بظلم وبنوا للوطن المحتل عشرين مثيلاً
أتعدون لنا مؤتمرا ؟ كلا كفى شكرًا جزيلاً
لا البيانات ستبني بيننا جسرًا ولا فتل الإدانات سيجديكم فتيلاً
نحن لا نشتري صراخًا بالصواريخ ولا نبتاع بالسيف صليلاً
نحن لا نبدل بالفرسان أقنانا ولا نبدل بالخيل الصهيلا
نحن نرجو كل من فيه بقايا خجل .. أن يستقيلا
نحن لا نسألكم إلا الرحيلا
وعلى رغم القباحات التي خلفتموها
سوف لن ننسى لكم هذا الجميلا
ارحلوا أم تحسبون الله لم يخلق لنا عنكم بديلا ؟
أي إعجاز لديكم؟
هل من الصعب على أي امرئ ..أن يلبس العار وأن يصبح للغرب عميلا ؟
أي إنجاز لديكم ؟ هل من الصعب على القرد إذا ملك المدفع ..أن يقتل فيلا ؟
ما افتخار اللص بالسلب وما ميزة من يلبد بالدرب .. ليغتال القتيلا ؟
احملوا أسلحة الذل وولوا .. لتروا كيف نُحيلُ الذلَّ بالأحجار عزًا
ونذلُّ المستحيلا

أنا رضيت

ما عندنا ملاعب

آخر نادي كويتي تأسس بأول السبعينيات

ما عندنا حوافز حق اللاعبين

لاعبين ما عندهم إستقرار وظيفي او دراسي

مدرب متسلفينه من نادي القادسية

معسكر لعبنا فيه مع فرق متواضعة ومدته عشر ايام

والقبّسه بتروح المباراة بعد

أنا من ناحيتي راضية تمام الرضا في ظل هالظروف إن نكون من الأربعة الكبار في خليجي 19

وإذا خسرنا من السعودية اليوم انا وايد متقبلة وماكو أي مشكلة

يعطيهم ألف عافية عيال الكويت

والله يرضى لي عليكم

مشكورين وايد

آخر شي

عجب المثل الإنجليزي يقول

When it rains it pours

Its raining in Oman ya 3ajab

شفيكم

أول شي معركة خالدة دارت رحاها اليوم 10 محرم بين الحسين بن علي بن أبي طالب عليهم السلام وأصحابه ضد عصبة من الأشرار

إنتهت بإستشهاد الحسين وأهله وأصحابه

بس المفارقة ان اللي خسر هذي المعركة جسديا اهوا اللي يذكر بالخير على مدى الأزمان

عظم الله أجر كل إنسان على وجه الأرض في هذا اليوم

ودامنا بهالسيرة يا جماعة الرفاعي قاعد يحن ويوزع ستكرات ويحط اعلان بالوطن صفحة اولى صوموا العاشر من محرم

عسى صايمين بس؟؟

انا بيني وبينكم خفت ما اصوم فيطقني

فما صمت

:)

مشكور يالرفاعي على التذكير وفي ميزان حسناتك ان شاء الله التذكير اللي قاعد تسويه وعظم الله اجرك في وفاة يدّك

اليوم الأربعاء مباراة المنتخب مع البحرين الساعة سبع

واقولها بكل ثقة وفخر مبروك عليكم الفوز إن شاء الله اليوم يا كويتيين

ودامنا بالكرة وخليجي عيل ابشركم ان الرفاعي صاحبنا يقول الكرة حرام

شوفو المطوية بموقعه واستمتعوا

واذا خسرنا بكاس الخليج ترى اشوه لأنها كلها فسق وفجور

والخير بقبال بعد

خنشرع للرفاعي وربعه البيبان زود وراح يحرمون المدونات مو يمنعونها لا يحرمونها

يالله خل ادش بالموضوع

كل شي يمنع بالكويت

هلا فبراير استهبلوا ومنعوها عشان غزة وهذي قمة الإستهبال

انا بسأل بالذمة شتفرق اذا كويتي راح هلا فبراير او ليالي فبراير واذا ما راح

هل راح تتحرر غزة جذيه؟؟؟

انزين الكويتيين او اي دولة عربية ما راح يحررون فلسطين ولا راح يروحون يحاربون الصهاينة وهذا شي خالصين منه بدون نقاش

اذا عندهم حلّين يا إما ان يتبرعون لهم ونص الفلوس او ثلاث ارباعها ما ندري وين تروح

او ان يقعدون ساكتين ويرفعون جواتيهم وبراقعهم

شنو احسن؟؟

اعتقد ان الاجابة المنطقية اهيا ان يتبرعون بفلوس تساعد في انقاذ الناس سواء صحيا او غذائيا او حتى مأوى لهم

انزين محلولة خلّوا ريع هلا فبراير نصه او كله حق غزة ومنكوبيها؟؟

طبعا الطبطبائي وكل من شمّر عن لحيته لإلغاء هلا فبراير كانت السالفة لهم حجّة عشان يلغون هذا المهرجان المحارب من 99

بحجة ان ما يصير نفرح واهل غزة يتعذبون

انزين عيل ما ابي اسمع او اشوف صورة الطبطائي او اي لحية رايحة عرس خلال فترة ازمة غزة

ولا ابي اشوف اي واحد منكم تارسين صفحات المجتمع بالجرايد

بس طبعا السالفة كلها تأليف بتأليف

لا والمضحك ان غير الغاء هلا فبراير مهرجان الدوحة هم تم الغاءه

والدوحة مشرعة بيبانها حق اولمرت وشلّته تلغي مهرجان الدوحة !؟؟

صج يا أمة ضحكت من جهلها الأمم

عموما أحمد عيسى كاتب مقال جميل عن هالموضوع بالجريدة اليوم


انزين هذا خبر وخلصنا منه


موقع الأمة من يومين كاتبين عن حملة جريدة الوطن اليديدة على مؤسسة البترول ورسم لها سيناريو ما سيحدث بالمستقبل

وأنا أتفق معاهم بالسيناريو اللي متصورينه

بس اقول ان المشكلة مو من الوطن بس

المشكلة من الرئيس اللي حتى وزارة مو عارف يشكل

هذا اللي ينفع يدير الديرة؟؟

ونروح حق الطامة الكبرى اللي اهيا القرار اللي طلع امس من اللجنة التشريعية بالمجلس

يقول القرار يا محفوظين السلامة

ان اللجنة التشريعية ترفض رفع الحصانة عن نواب الفرعيات ؟؟؟

هذي لجنة تصون وتحمي القانون

بعد شنو في أسوأ بعد بيصير

شوية جذّابين ماسكين لجنة مهمتها حماية القانون

لكن المأساة كل المأساة اهوا هدوء التيار المدني

التحالف من يوم الإنتخابات الى اليوم ما سوّا ولا شي الا غبقة وندوة؟؟؟؟

حتى ديوانيتهم الإسبوعية ما قاموا يقعدون

هذا تحالف مفروض يحرك التيار يعني؟؟

والمنبر مستانسين كل اربعا يقعدون بالعديلية يسولفون مع صالح الملّا ؟؟

وتجمع بشارة ينّ وقعد

وتجمع معك صار تجمع حق زايد الزيد وفتنته بالآن

وصوت الكويت شوي شوي قاعدين يصيرون رابطة أدباء يديدة؟؟

علامنا

شصاير

يالله احد خل يتحرك

خل نسوي شي

خلاص راحت الديرة

اللي يسوي جماعة امر معروف واللي يطق البنات عند التجاري

واللي يلغي حفلات هلا فبراير

واللي يحرم فترينة المحلات

واللي يحرم كرة القدم

وماشيه العملية

واحنا نسوي ندوات بو ست ساعات

ونستلم الأوادم وقلتله ورحتله

والدستور خط احمر

خلاص لاعت جبودنا من هاللحايا وحماقاتهم

عمومام بعد ساعة المباراة وارد واقول مبروك الفوز مقدما

واللي عنده اغنية بسم الله مالت عبدالكريم خل يحطها عاليوتيوب ما عليكم امر

أوه يالأزرق

ما تغير شي

بعدكم بالمدونة نفسها

بس من باب التشجيع للمنتخب أغير تصميم المدونة مؤقتا

وإن شاء الله الله يوفق عيال الكويت

اليوم الأحد الساعة خمس أول مباراة لهم جدّام عمان

يستاهلون الدعم أهلنا وإخواننا

و أوه يالأزرق