الفالي

منو محمد باقر الفالي

محمد باقر الفالي واحد من أشهر الخطباء بالحسينيات الكويتية

وبناءا على كلامه إهوا للراي وما أعتقد إن يجذب فيه فهو يحاضر بالحسينيات الكويتية من 21 سنة

يعني من قبل الغزو

المهم وقبل لا نطيح بفتنة احنا مو ناقصينها ابد

لأن مثل ما انتوا شايفين الديرة بخير وايد

برميل النفط ارخص من تلفون بشار القديم

الرياضة وصرنا ورقة بيضه

سفينة بنك الخليج يبيلها قلاف سنع

بورصتنا غيرت نشاطها وبيسوونها ستاربكس عود

وحتى جناسينا على قولة بوجسوم بسيف العرب

أنام كويتي وأصحى خكري

لأنها سايبه

يعني الوضع مو محتمل كــلّش

بإختصار خنبين لكم شي مفيد جدا حق اللي ما يعرف

المعسكر الشيعي بالكويت خاصة ينقسم إلى قسمين رئيسين

معسكر الشيرازي نسبة للسيد محمد الشيرازي ويتكون عناصره من مجموعات شيعية بارزة وأبرزهم حاليا النائب صالح عاشور وأشهر معاقلهم الحسينية الكربلائية ومسيد الشيرازي

والمعسكر الإيراني اللي يأيد وبشدة سياسة إيران وولاية الفقيه والسيد علي الخامنئي وأبرز قياداته عدنان ولاري وأشهر معاقله مسيد الإمام الحسين ومسيد شعبان

طبعا بالإضافة إلى معسكر الحساوية اللي كافين خيرهم شرهم ويازينهم وأبرز معاقلهم مسيد الإمام الصادق وحسينية بوحمد

ترى والله انا مو حساوية

معسكر الشيرازي يختلف وبقوة مع المعسكر الإيراني بحكم إن السيد الشيرازي كان يخالف سياسة الحكومة الإيرانية بعد ثورة الخميني

ونتايج هذا الخلاف كان السيد الشيرازي محاصر وتحت الإقامة الجبرية ما يقدر يطلع من ايران

وطبعا الخلاف وصل للكويت وانتوا شايفين شلون عدنان وعاشور صايرين يني وعطبه

المهم

محمد باقر الفالي اهوا خطيب من خطباء المعسكر الشيرازي

وبالتالي كلام فهد الخنة اليوم غبي جدا لأن يقول عن ايران

تصدير فكرها التكفيري ونشر الأحقاد الدفينة وزرع الفتن الطائفية ومثال ذلك ما قام به الشيخ محمد باقر الفالي ايراني الجنسية وهو خطيب الحسينية الكربلائية

لأن الفالي لا يتبع سياسة إيران وما يتفق معاها بحكم إنتمائه لمعسكر الشيرازي

إنزين

الشيعة بشكل عام عندهم مشكلة مع مجموعة من شخصيات الدول الإسلامية وخصوصا الأموية يعني مثل يزيد ومعاوية وقبلهم ابوسفيان و هند وهالمجموعة من شخصيات الدولة الإسلامية

وطبعا عندهم خلاف بمسألة الخلافة وإن اللي أحق فيها إهوا الخليفة الرابع مو الأول ولا الثاني ولا الثالث

وغير جذيه عندهم موقف حسب روايتهم من الخليفة الأول والثاني وموقفهم مع السيدة فاطمة الزهراء -ع- هذي المواقف

بالنسبة لهم ثابتة والخلاف ثابت عند أي شيعي

السنة بالمقابل ما عندهم خلاف مع اي شخصية اسلامية حتى لو كانت شخصيتين اسلاميتين متحاربين مع بعض ووصلت المسائل الى سفك الدماء

فاهما يذكرون الطرفين بالخير ويقولون اجتهدوا وواحد فيهم اصاب وواحد فيهم اخطأ

طبعا بإستثناء بعض الناس اللي لا السنة ولا الشيعة يتشرفون بوجودهم واهما اللي ينصبون العداء لبعض الشخصيات الاسلامية المتفق عليها

انزين الحين شنو سبب اللويه على الفالي

بعض النواب مثل هايف والطبطبائي والشلة الحلوة شافوها فرصة للفتنة واشتغلوا ان ما يصير يدش الكويت

وطبعا صالح عاشور خاصة وبعض النواب الشيعة الآخرين بس على استحياء مثل لاري وعدنان لأن الفالي مو من لوبيهم خذوا موقع المدافع عن الفالي

المسألة والله بسيطة جدا ولازم من نوابنا العقلانين ورجال الدولة الوقوف موقف موحد تجاهها

الفالي وافد على الكويت

حاله حال اي وافد من ايران او مصر او اوكرانيا او الفلبين او الهند او كندا

اذا عليه قيد امني يمنعه من الدخول للكويت ما يدش وخالصين مهما صارخ القلاف او اعتصموا الشيعة او بعضهم

اما اذا ما عليه قيد امني فيعامل معاملة اي وافد ما عليه شي ويدش الكويت بكرت زيارة او فيزا او اي اسم

مهما هدد الطبطبائي او هايف او حتى محمد المطير شخصيا

طبعا انا اشك ان حكومتنا بتتصرف بسرعة

لأن سمو الرئيس طال عمره لازم ينطر تشب الديرة وتنفجر مثل ما صار بسالفة مغنية عشان يتكلم

وما عنده الا وزير واحد كله مستعيل وبس اللي اهوا وزير داخليتنا

والخوف ان يندقر هالمرة بعد

يعني صرح على طول على سالفة مغنية وبعدين يه بوصباح وقال ما عندنا دليل ضده

وهم صرح على ياسر الصبيح ووقف وياه

ويه بوصباح وسحب جنسيته

الحين اذا وقف بوصباح مع الفالي اعتقد ان واجب على جابر الخالد الإستقالة بغير رجعة

ونرد ونقول

ما قاله الفالي عن يزيد ومعاوية وهند هو قناعة راسخة لدى الشيعة ومحمد العوضي بعد (بالنسبة ليزيد فقط) ولن تتغير ببقاء او ابعاد الفالي

فموهني السالفة ابد

السالفة والسؤال كالتالي

هل الفالي عليه قيد امني او لأ؟؟

اذا اي سفروه واذا لأ عاملوه مثل الباجي ولا تسوونها قصة

تكفه بوصباح مرة وحدة خلك جرئ واتخذ قرار حازم

وأرد وأقول أشك بهالشي وأنا بعدي معارضة

الحميدي أنا ما أشتغل ببنك الخليج وخالد العبدالجليل هبّه وبتنتهي حالها حال كبّوس بو حديده