07/10/2007

إنتخابات الجامعة -2

هلا

الــــواقــــع


وقفنا عن الكلام المباح أمس عند إحتجاج الإئتلافية قبل نهاية الفرز

وكان الرد عليهم إن ما يصير تطعنون قبل نهاية الفرز

وطبعا اصحاب الإسلام المسيس ما عجبهم الكلام

فقاموا وقسموا نفسهم حق ميمنة وميسرة وقلب

زين ما حفروا خندق بعد

ودشوا القاعة وهوشة وطق كالعادة


وهذا اللي خلّى ادارة الجامعة تجمد انشطة الإتحاد داخل الجامعة

بسنة 78 واستمر التجميد لغاية مايو 79

وطبعا القرادة كانت ان ب 79 كانت الثورة الايرانية ببدايتها

وطبعا تاثرت الكويت مثل كل دول المنطقة بهالشي

وبلشت الطائفية تعم بالكويت

ناهيكم عن انقسام التيار القومي اللي قلنا عنه في الحلقة اللي طافت وهذا هم أثر على انتخابات الجامعة


وبالفعل كانت النتيجة متوقعة

يابت الائتلافية 1241 صوت

الحرة الاسلامية الحرة وهي عبارة عن قائمتين شيعيتين متحالفتين 730 صوت

والوسط الديمقراطي 417 صوت

على فكرة قائمة الاتحاد الاسلامي انسحبت في 79 لصالح الائتلافية بعد

وطبعا من 79 ابتدى العهد الجديد لانتخابات الجامعة وليما اليوم مستمر

بس المشكلة كانت بسنة 80 لما قررت قائمة الوسط الانسحاب من الانتخابات احتجاجا على انتخابات 79

وهذي اظن اكبر غلطة بتاريخ الحركة الطلابية الكويتية كلها

واللي قرر القرار بذاك الوقت بالوسط لازم يتحمل المسئولية ليما اليوم

المهم طبعا بفترة الثمانينيات والحرب العراقية الايرانية اللي قسمت الكويت شيعة وسنة وليما الحين بعض الآثار موجودة

وظلت المنافسة بين الشيعة والسنة بالانتخابات حدها قوية لدرجة ان بسنة 84 صار الفرق بين الائتلافية والحرة الاسلامية الحرة 700 صوت بس

وبسنة 85 نزل مرشح مستقل بكلية الهندسة يقولون إن إهوا مرزوق علي الغانم بس ماني متأكدة

وبسنة 86 عيال بطنها على قولتهم استثمروا فكرة المرشح المستقل ونزلوا القائمة المستقلة وكانت فكرتها الاساسية

إنها تكون قائمة التجار

يعني اذا واحد بوكه سعره أقل من 100 دينار ما يدش القائمة

حتى في واحد ليما الحين منقهر ان سعر بوكه 99 دينار وما دخلوه القائمة

وطبعا هالشي عادي يعني مو عيب

كل واحد وطريقة تفكيره ورؤيته

بس انا الفكرة ما تعجبني

شنو المسلسل اللي مافيه الا ضابط واحد من بدايته ليما حلقة أمس؟

واستمر الوضع جذيه لنهاية الثمانينيات

وبسنة 89 استمر الوضع لكن التغيير صار بموعد الانتخابات بدال لا يكون بالكورس الثاني صار بالكورس الأول

او بداية الكورس الأول بالأصح يعني الطالب المستجد ما يمديه يتعرف على القوائم الا خلال شهر واحد

بعد ما كان عنده فرصة يتعرف عليهم لمدة 6 اشهر تقريبا

وانتخابات الكورس الاول مستمرة بالكورس الاول من ذاك الوقت

الكل توقع التغيير بعد الغزو

خصوصا ان الغزو وحد الكويتين شيعة وسنة وبدو وحضر

بالاضافة للموقف الوصخ اللي سواه الاتحاد بقيادة الائتلافية ب 9-9-90

وهذا الشي راح اتطرق له بالحلقات اليايه

لكن الغريب ان ب 91 هم فازت الائتلافية وهم الحرة الاسلامية الحرة حصلت على المركز الثاني

وبسنة 1992حصلت قائمة الوسط على المركز الثاني للمرة الاولى بتاريخها والكل استبشر ان خلاص الوسط يبي يمسك الاتحاد بالسنوات اليايه

واستمرت المنافسة بين هالقائمتين مع اختفاء تدريجي للاسلامية

وصعود بطيء للمستقلة

وطبعا من 92 كان الوسط الديمقراطي مسيطر على كلية التجارة وهالكلية لها ثقل خاص بالجامعة مادري ليش

لدرجة ان بسنة من السنين الوسط حصل فيها على ما يقارب الألف صوت بهالكلية بس

وهذا اللي خلّى الإئتلافية تمارس تكتيك يديد وقوي

راح أذكره بآخر حلقات الواقع باجر

على فكرة

ما أتبع ولا قائمة ولا لي شغل فيهم بس هذي قناعاتي لحّد يفكر إني اجامل احد على حساب أحد

واللي مو عاجبه كلامي

ما أقول له إلا إن كلامي حلو

ماشاءالله عليّ والله يحفظني

:p

اي شاركوا بالتصويت على اليمين للضرورة القصوى خلال يوم واحد بيتسكر التصويت

21 comments:

Anonymous said...

شنو المسلسل اللي مافيه الا ضابط واحد من بدايته ليما حلقة أمس؟

الاجابة : مسلسل باب الحارة 2

Anonymous said...

الكلام غير صحيح اول عضو كان عدنان الشرهان في عام 1985 ولم تقتصر على عيال التجار وكان فيها بدو وشيعة من غير التجار وهي قائمة وحدة وطنية

بوصالح said...

الكثر من المعلومات الواردة في المقالتين غير صحيحة ..

بيت القرين said...

أنو
غلط

أنو
قلت اني مو متأكده من معلومة مرزوق الغانم وممكن اللي تقوله صح عن توجه القائمة
بس ياريت تنطر لنهاية الموضوع وتبقى آراء بالنهاية

بوصالح
تقدر تكتب تصحيحاتك هني او بالايميل
اللي يريحك

Anonymous said...

بوصالح والي يعافيك لا تتفلسف
هذا شخص كان بالاتلافيه بكلية التجارة لكن لما انطرد من الجامعه مالقوه ويه ودخل جامعه خاصه ودخل مع المستقله لكن هم مالقوه ويه جان يصير ماله شغل وانه ماله شغل بهالسوالف ومراقب من بعيد


اقول استريح والي يعافيك لا فظايحك تطلع

Anonymous said...

انا جنه خابر اكو تزوير حاصل وان الصناديق ودوها صليبيخات بس شنو بالظبط ما اذكر اسالج واقولج



اي جذي ردي اكتف

فتى الجبل said...

للأسف السرد التاريخي فيه معلومات مغلوطة خاصة اني عاصرت الفترة من 1989 الى 1995

Bad-Ran said...

مرزوق الغانم كان من المؤسسين .. بس عدنان الشرهان اهو اللي نزل مستقل اول شي و بعدها اسسوا القائمة المستقلة
لا طعم لا رائحة لا لون

bo9ali7 said...

ياجماعه اللي يشوف اخطاء خل يصححها لنا

Mohammad Al-Yousifi said...

اكملي

فريج سعود said...

الائتلافية بس نجحت بال79 محد قدر عليها الى اليوم وهالسنة اخذوا ست كليات تعال طلعنها منهم الحين ,,ما يطلعون ولا بنقبلة مسييلة للدموع
اما نهاية عرس الدم كما اتوقعها ان عيال تركي وعيال اخوه وبرطم ابوه كلهم يطلعون مو عيال حلال ويحولونهم للادلة الاجنائية ويسوون لهم فحص دي ان اي وينفجر الجهاز وما يبقى لهم من العينات الا شلفوح من البرطم يبنون عليه الجزء الثاني في رمضان الياي

لو دامت لغيرك ما اتصلت اليك said...

السلام عليكم

المسلسل عرس الدم

فيه بس النقيب التركماني


المهم زياد الشرهان نزل عضو مستقل سنة 1986

و القائمة المستقلة انزلة سنة 1987

والشرهان كان مجرد عضو فيها

وو بس اي معلوومه انا حاضر

:)

لو دامت لغيرك ما اتصلت اليك said...

مممممممم

و ترى صج الوسط زور الانتخابات وصايرت بينهم وايد مشاكل بالهيئة التنفيذيه و اهم جمدو نفسهم والله لو اقوول السبب راح تضحكووون

Q80 Blogger said...

مشكوره على النقل الممتاز

بس عاد عن النحاسه صج

تره والله مو متابع غيره طول رمضان
لاتحرقينه

واذا تبين تحرقينه كتبي تنبيه بالبوست
عشان انغمض عيونا

Q80 Blogger said...

واذا على سؤالج مال الشرطي
مايبيله
التركمان
طلال
عرس الدم

Anonymous said...

عدنان الشرهان اهو الي نزل مستقل بس مرزوق كان اول رئيس حق المستقله

يعني تقريبا صح كلامج

ARTFUL said...

كلامج حلو الله يحفظج =)

شنو المسلسل اللي مافيه الا ضابط واحد من بدايته ليما حلقة أمس؟

عبيطه ;p

متابعين لا تبطين

=)

Anonymous said...

شكرا على الجهد للكتابة عن مرحلة تاريخية مهمة من تاريخ العمل الطلابي ولكن كان يجب ان يتم اخذ اراء من عاش تلك الفترة
ولكن انا لي رأي خاص حول نشأة قائمة المستقلة والتي يعود سبب نشأتها بهدف ضرب قائمة الوسط الديمقراطي ومنها ضرب الحركة الوطنية بشكل عام لان العمل الطلابي هو المغذي الاساسي للحركة الوطنية من القواعد او القيادات السياسية لذا ليس من المستغرب ان يكون لؤي الخرافي هو المؤسس الرئيسي لقائمة المستقلة ونترك لكم تحليل كيف يلعب الخرافي منذ الثمانينات تخريب العمل السياسي في الكويت
راجعوا اطروحات وادبيات قائمة المستقلة في الثمانينات ستجدونها تقدم نفسها ليس بديل عن قائمة الاتلافية تسعى للفوز في انتخابات الاتحاد ولكنها تقدم نفسها كبديل لقائمة الوسط الديمقراطي .
بلا شك خسرت الحركة الوطنية قواعد عديدة من الشباب الوطني الذي كان يمكن ان يتطور سياسيا ويزيد الوعي السياسي له لو كان الصراع قائم بين تيار وطني ممثل بقائمة الوسط وبين تيار انتهازي يلبس لبوس الدين كواجهة له ممثلا بقائمة الاتلافية. ولكن ماذا يمكن ان نفعل في ظل الدعم المفتوح لها من قبل الدولة
وشكرا لكم على طرح الموضوع

ARTFUL said...

انو
ليش تعتبر الوسط الديمقراطي حركة وطنية عفيفه
وباجي القوائم انتهازيين ويقصدون ضرب الحركة الوطنية؟
مع ان جميع ممثلين القوائم من اهل الديرة وأجدادهم تربوا بهالديرة ويحبون ويخافون هالديرة شمعنا الوسط اهم اللي همهم الاول والأخير الحركة الوطنية وباجي الناس يبون يخربون؟

كل واحد له منهجه في خدمة دولتنا الحبيبه بغض النظر فكري يميل حق أي قائمة ولكن في النهاية الوسط أخذوا المنحى الناصري في فترة و المناداة بالقومية العربية والتحرر من القيود التي فرضها الدين و العادات والتقاليد التي تعطل حركةالنمو الفكري والاقتصادي وغيره وكان الشارع الكويتي في هذه الفترة يميل الى هذا الفكر

والمستقلة
مادري شنهو الفكر في بدايتهم ولكن نقول انهم ناس ما يبون يتبعون أي شي يعني قائمة قائمة على نفي الغير وقدروا يحركون الشارع وأخذه على هذا المنحنى واعتبار المستقلة القائمة الوطنية الحقيقية من غير أهواء ولا اتباع فكر أو أشخاص معينين
وكان يمثلون تهديد قوي على الائتلافيه في سنة 98 ، حيث ان رئيس الاتحاد راح لمقر الاتحاد يلم أوراقه لتوقعاته سقوط الائتلافيه وانا سامعها من السانه

والائتلافيه ، خذت الوطنية من الجانب الديني والجوع الى الدين وربط الدين بالسياسة وهذا ما يتنافى مع فكر الوسط ، واقدروا يحركون الشارع بالاتجاه الديني مثل ما نشوف هالأيام

فبالنهاية مثل ما قلت حق اختي بيت القرين تبقى جميع التكتلات في الديرة نواة صغيرة بالنسبة للعوام ولكن نواة الاخوان غير عن نواة الليراليين غير نواة المستقلين والناس يلتفون حولهم فيكونون سواد أعظم

بس الواقع هالأيام ان أكبر نواة اهي نواة الاخوان والأمر من ذلك ان أكبر تجمع ليلحين حولهم

وأتمنى تقولي ليش تعتبر الوسط اهي الحركة الوطنية الوحيده؟ لأنها تماشي فكرك والا لأن الغير ما يعجبك فكره؟ مادري

ومشكور انو =)

مشكوره بيت =)

shee6an said...

يااا جماعه انا مادري انتو ليش مستعيليين

نطرو البنت تخلص الكلام كله وبعدين كتبو ملاحظاتكم والله كسرتو مياديفها
كل واحد طالعلي هذا غلط وهذا غلط والله لو انا اكتب الموضوع جان تحبطت وماكملت

وثاني شي
صارلي تحت هواش قوائم انا احسن والثاني يقوله لا انا احسن وهذا الشي اللي مخلي الاخوان يفوزون بالاتحاد و6 كليات كل واحد من المستقله والوسط جنهم عايشين في البرج العاجي ومايصير كل واحد منهم يقدم تنازل موعشان المستقله والا الوسط ترى هالتنازلت بتصير من حق لكويت
مادري متى راح يستوعبون هالفكره

الله كريم ويعطيج العافيه بيت لقرين

لو دامت لغيرك ما اتصلت اليك said...

الاخ الكريم يقول

ولكن انا لي رأي خاص حول نشأة قائمة المستقلة والتي يعود سبب نشأتها بهدف ضرب قائمة الوسط الديمقراطي ومنها ضرب الحركة الوطنية بشكل عام لان العمل الطلابي هو المغذي الاساسي للحركة الوطنية من القواعد او القيادات السياسية

اخوي اي ضربه اي تدمير انت من صجك !!! المستقلة يوم انزلة الانتخاباتكان الوسط المركز الثالث و لا يسيطر الا على التجارة؟؟؟؟ الي ضيع الوسط مؤتمر الهيئة التنفيذيه الي تناجرو فية وليش تناجرووو !!!تبي تعرف
عشانهم اختلفوا لاي تيار اشتراكي ينتموله التيار السلمي بقيادة الاتحاد السوفيتي او التيار الثوري الماوي بقيادة الصين

ادري بتضحك بس هذا الوسط