06/10/2007

إنتخابات الجامعة -1

عدل عدل مو مضيعين بس مغيره التصميم عادي كيفي

الـــــواقـــع

إئتلافية مستقلة إسلامية وسط ديمقراطي

أسامي قوائم طلابية بجامعة الكويت يعرفها كل طالب جامعي ويعرف بعضها اذا مو كلها كل أهل الكويت تقريبا

بعد إصرار وتكرار من ناس وايد

ولأني شفت المدونين ما غطوا موضوع الجامعة بشكل جيد على الأقل المدونين اللي أتابعهم

قررت إني أكتب موضوع مطول عن انتخابات الجامعة

وراح أقسمه لمحاور رئيسية تنقسم للواقع والمشكلة والحل

بشكل يومي لغاية نهاية رمضان ان شاء الله

عاد إقروا وخاصة ربع القوائم

الواقع يقول يا محفوظين السلامة إن الحركة الطلابية الكويتية إهيا الأعرق بالمنطقة كالعادة

وهذي الحركة مرت بمراحل

المرحلة الأولى في العمل الطلابي المنظم

كانت من بداية افتتاح جامعة الكويت بسنة 1966

إلى 1974

كانت هالمرحلة اهيا مرحلة التأثر بالتيار القومي او الناصري بالاصح

ومع نكسة 67 ووفاة جمال عبدالناصر بعدها ب3 سنوات

لقى تيار الاسلام المسيس فرصة ان يبني له كيان وان يسعى لدخول الجامعة

خصوصا ان القوميين انقسموا لثلاث تيارات اللي اهما تيار ثوري وتيار الدكتور احمد الخطيب وتيار العم جاسم القطامي

ويمكن الظهورالابرز لتيار الاسلام المسيس كان من خلال ندوة الاختلاط بنوفمبر 1971

هالقضية اللي ليما اليوم يحجون فيها الحمدلله والشكر

وطبعا

على طول عبروا عن مستواهم

وما خلوا الندوة تمر لأنهم طبعا ما يتحملون الراي الآخر

وقلبوها طق ومهزلة كالعادة

اللي شقوا دشداشته

واللي باقوا تكرمون نعاله

واللي ضيعوا شحّاطتها مسكينة ليما اليوم تدورها كانت شاريتها من فهد السالم وقاطه كل ما وراها ودونها عليها

طبعا طقوا البنات والشباب

صج اسلامهم عجيب

طبعا هذا مو كلامي كلام دكتور محمد جواد رضا بكتابه معركة الاختلاط تلاقونه

بمكتبة الربيعان بحولي شارع بن خلدون

مجمع جبال مجمع العثمان

ماكو سوق الذهب مال حولي اللي عند محلات الكمبيوتر

اي شفتوه

مو يمّه

ولأن الشارع الطلابي بذاك الوقت كان واعي ومثقف اكثر بوايد من الحين

فرفض هالممارسات وما سمح حق هالاشكال انها تتواجد بقوة داخل الجامعة

وطبعا بدت المرحلة الثانية بسنة 1974 مع اندماج القائمة الديمقراطية مع قائمة الوسط الطلابي

وكونوا قائمة الوسط الديمقراطي

وطبعا هذا درس تاريخي محد استفاد منه

يبين شلون كان مهم عند الطلبة ان الكيان الطلابي يكون اقوى وما يسمح حق تيار الاسلام المسيس بأنه يقوى ويكبر

وظلت قائمة الوسط الديمقراطي مسيطرة على اتحاد الطلبة

وبسنة 77 سووا الاخوان المسلمين من خلال جمعية الاصلاح حركة عبارة عن انهم اسسوا قائمتين اللي اهما المتحدون والمستقلون

وكان في قائمة موجودة بالساحة اسمها المعتدلة

ما كانت تتبع الاخوان بس كانت مدعومة منهم

مثل االطبية الحين بالطب يعني

المهم هالقائمتين اللي اسستهم جمعية الاصلاح اتحدوا مع المعتدلة ب 77وسموا القائمة الائتلافية منطلقين من مبدأ كمال ولميس بالرجل الحديدي "الاتحاد قوة" وبإنتخابات اتحاد 78

واثناء الفرز كان التفوق بسيط للإئتلافية

وباقي صندوق كلية التجارة اللي كان محسوم منطقيا للوسط

ولان الإئتلافيين عرفوا السالفة

قاموا وطعنوا بالفرز قبل لا يخلص

لكن المسؤلين عن الانتخابات من القوائم الثانية رفضوا وقالوا الطعن بعد الفرز ما يصير الحين

وصارت المفاجأة

اللي نقولها باجر

عموما ترى هذا رايي الشخصي بعد قرائتي لكتاب علي حسين العوضي بعنوان الحركة الطلابية الكويتية والتيارات السياسية
وكتاب نورية السداني الجماعات الضاغطة
وبعض الايميلات والمتابعات الخاصة

15 comments:

ButterFlier said...

nabee part 2

Anonymous said...

صراحة
أفتر راسي من وصفج لعنوان مكتبة الربيعان وما عرفت للحين أشلون أوصل لمكتبة الربيعان بحولي

ممكن أتصل بصديق ؟

UmmEl3yal said...

LoL .. Bada3ti! Let me know if you need any details for the 70's and 80's in Kuwait University ... emkin ana eli bago sh7a6ti :)

Mohammad Al-Yousifi said...

كملي بارج الله فيج

ZwaiZ said...

mabrouk 3al new look
o na6reen el-other parts bas plz ya3ni make them daily manabi nan6er wayed ;)

حسام بن ضرار said...

topic خوووووووش

كملي


و الله يسمح دربج

shee6an said...

دانه ترى شوقتينه

عاااااد موتزعينه :))) ترى قاعدين ننطر التكمله


ويعطيج العافيه

Bad-Ran said...

خوشش لووك ..

و موضوع ممتاز و محد تطرق له .. برافوو عليكييي

ARTFUL said...

ما عرفت بيتكم شمسوية؟؟ ;p

منزل مبارك ، وخوش حجي ، تعجبني قرائتج وبحثج قبل الكتابه
=)

انوني ،، تقدر تحصل الكتب بمكتبة العجيري اذا مو كلها بعضها واذا ما حصلت هم في ورا الخياط اللي يم العجيري مكتبة تحصل فيها هالسوالف =)

انا كنت أتمنى ينطرح الموضوع من غير أي تحيز لأي قائمة أو فئة ، بس مادام كتبتي هذا رايج خلاص مدونتج وكيفج كتبي رايج اللي تشوفينه صح =)

وتسلمين على هالتعب والله لا يضيع تعبج

=)

فتى الجبل said...

قاعد أنطر التكملة

ديرة بطيخ said...

ماصارت علقتينه :)

يالله زتج

Anonymous said...

خوش موضوع تصدقين

واهم شي انه بسلوبج يعني خفيف طينه الموضوع
:)

Anonymous said...

Since ma6goog is weiting so b.e.a.u.tifully about books and reading, and the really interesting subject from you, those are some books about al7araka al neqabeya,, enjoy,,



كتاب (الطلبة والعمل السياسي )


د.عبدالله النفيسي


كتاب ( الحركة الطلابية الكويتية في 20 عام ) اصدار الاتحاد الوطني لطلبة الكويت 1964

كتاب الحركة الطلابية الكويتية في ربع قرن) اصدار الاتحاد الوطني لطلبة الكويت 1990

كتاب (الحركة الطلابية الكويتين بين مبادرات التوفيق ومحاولات التحجيم ) م.حمود العنزي

كتاب (المفاهيم العشر في إدارة العمل النقابي ) م. حمود العنزي

كتاب ( الحركة الطلابية الكوييتية والتيارات السياسية ) أ. على العوضي


كتب حمود العنزي موجوده في مكتبة الربيعان او على موقع النادي النقابي

www.naqabi.com

Q80 Blogger said...

نقل الموضوع من نظره واحده
الكلام هذا ملينا منه من الوسطيين

شكرا
وناطرين التكمله
ودي اعرف بعد اسباب سقوط الوسط في ايامنا الحاليه
وهل لو كانت سالفه صندوق التجاره هذي ماصارت ... هل راح يكون حاضر الجامعه الحين مختلف !!

اربع قوائم وحده اسوأ من اختها ... هذي بختصار جامعتنا

Anonymous said...

الصراحة خووووووووووووووش موضوع
لان في وايد ناس محتاجة تعرف تاريخ قائمتها اللي تصوت لها
خاصة الي يصوتون عالبركة والا عالاسم وبس

بداية حلوة وناطرين الجزء الثاني

اللي حقايقه تفشل بصراحة