كل عام وإنتوا بخير

غصبا عليكم

بيلعبون
بيخسرون
بيربحون مو مشكلة
بس غصبا على اللي ما يرضى بيلعبون
محد وصي عليهم الا اهاليهم
ماكو قانون يمنع
ولاتقدرون تطلعون قانون يمنع اصلا
بيلعبون كرة سلة طائرة جمباز سباحة غطس باليه مصارعة يابانية
كيفهم

خالد السلطان ومحمد هايف والطبطبائي والوعلان وكل من صرح او بيصرح ضدهم
انتو اولياء امور بيوتكم بس
لا تلعبون بناتكم كرة
نقطة

تخسون تتدخلون بشؤون غيركم

اما ربعنا اللي ما تكلم منهم غير اسيل وحتى عدنان المطوع طلع احسن منهم فلا عزاء لنا فيكم

التحالف المنبر صوت الكويت واي تيار مدني ضروري ضروري ضروري تحتفون بمنتخب السيدات لأنهم خسروا وراح يخسرون المباريات اكيد لكن كسبوا صوت عالي قالوا فيه نحن هنا أحرار في إختيارنا رغم انف شلة الممنوع

جبّار إسرائيلي يا جبّار!؟

إعلان إسرائيلي بالوطن ديلي يبرر الهجوم على المسلمين يا جبّار؟

على قضيتنا العادلة يا جبّار؟؟

بتنطق يا جبّار ولا بتصير مثل الفار عشان عيون الدينار؟؟

جبّار أقصد فيه أكثر من واحد وأبرزهم

هذا - هذا وهذا بعد اللي كنسلوا هلافبراير عشانه السنة اللي طافت لأن مو راضي للي تتعرض له غزة

ورنا حرصك الحين

عن التشلخ

مرزوق الخرافي: استاد جابر مطابق للمواصفات وتم تسليمه في الموعد المحدد

وأكد الخرافي ان المجموعة قامت بتسليم المشروع في الموعد المحدد دون اي تغيير حيث تم تسليمه في سبتمبر 2007، حسب العقد المبرم

هذا كلام مرزوق ولد بومرزوق اليوم بالراي والقبس حسب ما قريت

يقول تسليمه ب 2007 حسب العقد المبرم

الكويت - 20 - 9 - 2005 (كونا) -- اكد وزير الاشغال العامة ووزير الدولة لشؤون الاسكان بدر ناصر الحميدي هنا اليوم ان مشروع استاد جابر الرياضي سيكون جاهزا في ديسمبر 2006 .

واضاف الحميدي اثناء تفقده سير عمل المشروع بحضور المدير العام لهيئة الشباب والرياضة الشيخ فهد الجابر الصباح ومسؤولي وزارة الاشغال العامة ان الهدف من هذه الزيارات المستمرة للمشاريع التي تشرف عليها الوزارة هو الاطمئنان على حسن سير العمل والتاكد من انتهاءه حسب المدة الزمنية المحددة له .


وهذا المصدر

عيب يا مرزوق يا ولد بومرزوق تسوي مؤتمر صحفي تجذب فيه وتعتمد على نسيان الناس للتواريخ وتاخذنا بالهولليلة

على ابو ان مؤتمر صحفي وحاط لك جم ورقة يعني قاعد تقول الصج

أنا طبعا مادري اذا فعلا سلمته ب ديسمبر 2007 أو لأ عادي تكون قاعد تشلخ

بس حتى لو مسلمه ب 2007 تكون متأخر سنة عن موعد التسليم

والعقد مدته سنتين وانت متأخر سنة يعني متأخر نص المدة

لا تجذب عيب ترى في ناس متابعه

سالم العلي والدوحة

الشيخ سالم العلي عميد أسرة الصباح الكريمة رجع من السفر قبل أيام بعد رحلة علاج طويلة والحمدلله على سلامته والله يشافي كل مريض داخل وبره الكويت ويردهم بالسلامة ان شاء الله

بس تنحط نقطة هني

أما حفلة التصاريح اللي حاصله واللي يطالب بمنطقة بإسم الشيخ سالم واللي يطالب بنصب تذكاري وغيرها من أمور

أول شي مو قانونية حسب ما ينص القانون مثل ما عرفت ان مايجوز تتسمى المناطق الا باسامي الأمراء أو أولياء العهد

وهذا القانون يديد على ما أظن لأن عندنا مناطق مو بأسامي حكام مثل عبدالله المبارك وفهد الأحمد

ثاني شي في ناس برايي أولى من الشيخ سالم ضحوا بحياتهم عشان هالوطن ومنهم أسرار القبندي وأحمد قبازرد وفايق عبدالجليل ووفاء العامر وهشام العبيدان وغيرهم مئات من اللي ضحوا بحياتهم عشان يعيش هذا الوطن

أدناة الدون حطوا منطقة باساميهم مجتمعة تسمى منطقة الشهداء بدل شارع واحد بالديرة بأسامي الشهداء

لمصلحة منو قاعد يطمس تاريخهم ويتم إختزالهم بالشهيد فهد الأحمد؟؟

غير الشهداء في ناس ثانية تستحق ايضا ان يكون في مناطق باساميهم مو الاكتفاء بمدارس مثل المعلم يوسف بن عيسى الجناعي أو أحمد الربعي أو أحمد الخطيب ومئات غيرهم رسموا تاريخ الكويت المشرق

ماهو عداء للأسرة الحاكمة ولاهو معارضة وبس لكن الحق حق والكويت للجميع لا نقتصر الكويت على عايلة وحده نحبها ونقدرها وإرتضيناها تحكمنا

أما السالفة الثانية اهيا حادث وصلة الدوحة واللي توفوا نتيجتها شباب بعمر الورد الله يرحمهم برحمته ويصبر اهاليهم

الحادث باختصار سيايير تتسابق وتسوي حركات بالشارع وجمهور يتفرج ويشجع

وصار الحادث وتوفى عدد من الجمهور

نوابنا ما صدقوا خبر وإستغلوا على طول حادثة إنسانية عشان يقطون البلاوي على الحكومة

وانا معاهم إن الحكومة غلطانة وتحديدا الداخلية

بس مو غلطانة لأنها بس ما حضرت موقع السباق سريعا على الرغم من تبليغ الناس لهم بالسباق

لا غلطانة من الاساس لأنها بالأصل كانت تسمح لنواب من شاكلة اللي صرحوا ينددون فيها بعد الحادث انهم يتوسطون ويطلعون أي مستهتر يعبث بروحه وأرواح الناس

وراح يظلون يتوسطون وراح الداخلية تظل تخضع لوساطتهم

وهذا اللي خلى الداخلية تتقاعس في القبض على مستهترين الشوارع لأنهم يدرون إن عنوتهم وقبضهم على هالشباب راح يطلع بوش بمجرد واسطة من نائب وأحيانا سكرتير نائب بعد

طبعا مو عذر كافي هذا، الداخلية لازم تقوم بدورها

بس الأهم وقف الواسطات بأرواح البشر ومو بس وقفها الإعلان عن كل نائب يطلب الواسطة

وحزتها تعرفون منو يعبث بأرواح عيالكم وإخواننا

حتى إنت؟؟؟

فإننا نقترح مجموعة من الشروط والضوابط، على أن يعمل بها بجميع الجهات الحكومية والأهلية في البلاد

وفيما يلي عرض للشروط والضوابط المقترحة

عدم التعدي على الذات الإلهية

عدم التعرض للنبي وآله بيته وأزواجه أمهات المؤمنين بسوء

عدم التعرض للصحابة بسوء

عدم التعدي على الذات الأميرية

عدم التعدي على رموز البلاد

عدم التعرض بسوء لدولة الكويت مباشرة وشعبها

ويمنع منعا باتا من يخل بها ويتعداها من استضافته ودخوله لدولة الكويت

عبد الرحمن العنجري د.وليد الطبطبائي فلاح الصواغ د.فيصل المسلم محمد هايف سالم نملان حسين مزيد خالد السلطان د.على العمير مبارك الوعلان خالد الطاحوس د.محمد الحويله محمد المطير سعد زنيفر د.ضيف الله أبورمية مخلد العازمي دليهي الهاجري د.جمعان الحربش علي الدقباسي شعيب المويزري خالد العدوة ناجي العبد الهادي

حنث بالدستور وباليمين الدستورية لا وحاط اسمه اول واحد يعني زين

حمدالله والشكربتغيرون الكويت بكيف ابوكم

واذا مشى هالقانون انا اطالب بأن أي واحد ما يحب رويشد ما يدش الديره

كيفي انا اعتبره رمز من رموز البلاد واحسن منكم كلكم ايها الموقعون

حمدالله والشكر والله يفكنا من هالمعاتيه اللي بالمجلس قولوا آمين

عاشووووور!؟؟

مليون كويتي وشوي

لو حسبنا ان متوسط الاسر الكويتية اهوا خمس اشخاص

راح يصير عندنا 200 الف اسرة كويتية

هذا غير اللي ماخذ ثنتين وعنده عيال منهم شلون نحسبهم اسرة ولا اسرتين

ولا اللي متزوجه اثنين وعندها عيال منهم شلون نحسبهم بعد؟؟

خل ناخذها ان احنا 200 الف اسرة

بعشر آلاف دينار حق كل اسرة

هذيل مليارين دينار كويتي

زائد

خمس آلاف حق كل مطلقة يعني خنقول عندنا 10 آلاف مطلقة كويتية بس راح تاخذ 5 آلاف دينار

هذي خمسين مليون دينار

ونقول عندنا 10 آلاف ارمله بعد وهم تاخذ خمس الاف دينار

هذي خمسين مليون دينار ثانية

وعندنا ألف كويتية ماخذه مو كويتي وهم تاخذ 5 ألاف

هذي خمس ملايين

وكل كويتي بالغ 21 ومو متزوج ونقول عددهم 100 الف ب 5 آلاف بعد

هذي 500 مليون دينار

يعني الاجمالي على اقل تقدير 3 مليارات دينار كويتي تقريبا

تقدم هبة حق الكويتيين وابتلشوا بأجيالكم القادمة

هذا مجلسنا وهذولي نوابنا الحمدلله والشكر

واذا الحكومة عارضت قالوا تأزيم

عموما تمر اليوم الذكرى الرابعه لرحيل الشيخ جابر الله يرحمه

نختلف مع اللي سواه او نتفق لكن يبقى حبيب الشعب

والله يرحمه برحمته

وهم ما يفوتنا نهني الجماهير العرباوية بحصولهم على أول 3 نقاط بعد 6 مبارايات من الدوري وخذوها من الصليبخات طبعا

ما تشوفون شر