هيا ونااااسة

شلون يعني؟؟

أول شي منو وزير النفط؟؟

ثاني شي شدعوه انت اللي مسوي النفط؟؟

ثالث شي اذا احتياطياتنا النفطية اكبر من المعلن هذا معناه ان الحكومة اللي انت ممثلها قاعده تقص علينا وتعلن لنا اشياء غلط

وين الفطنة بالتصريح

وليش تحسسني انك تتكلم عن افتتاح المحاميد مو احتياطيات نفطية، شنو مفاجأة سعيدة؟؟

خوش ديرة اللي مصدر ثروتها الأول والأخير ما عندهم تقديرات ثابتة لها ونعتمد على المفاجأة في مصدر الثروة الوحيد

عن الخبال

كاتب أثول أهبل مينون دثوي بيتكسب على حساب سب الديمقراطية الكويتية واهوا بقطر

كتب اللي كتبه عن الكويت ومجلسها وديمقراطيتها

قال اللي قاله من حجي فاضي

وبعدين؟؟؟

هل قطر الوحيدة اللي فيها مهابيل وميانين؟؟

عندنا وعندهم خير

هل قطر الوحيده اللي فيها ناس يسبون جيرانهم؟؟

هم عندنا وعندهم خير، وخيرنا وايد أكثر

الكاتب اللي بقطر قليل أدب واسلوبه وقح

وعندنا هالصبي قايل من مدة هالكلام

تصرفات قطر غير الأخلاقية

متهم دولة بكبرها مو افرادها

البيلر وغيره اشتغلوا ومازالوا يشتغلون على الحكومة القطرية وعلى وزير خارجيتها

ويوم انسحبت اعلانات الوطنية منهم قامت القيامة على الوطنية وهذيل عملا حق قطر

مع انهم قطريين شلون عملا حق قطر مادري

وبعد كل الصيحة كان مالك الجريدة وربعه ناوين يبيعون شركة الاتصالات الثانية بكاملها حق الهنود؟؟

الزبدة ان ليش كل الصيحة والتسفل بقطر

لا وناس يطرشون برودكاست تمنن على قطر احنا سوينالكم وعطيناكم ومن هالخرابيط لا ويطلبون من المتلقي يدز البرودكاست مع اسم اللي كاتب الحجي

من زين الحجي عاد

ارد واقول الدثاوة مو موجوده بقطر بس

بكل مكان بالدنيا

يحق لنا نرفض كلامه بس ليش نسب ديرة بكبرها على مجموعة مهابيل عندهم

ويا كثر مهابيلنا وبلاويهم اللي ما خلت لنا صاحب ابد

مو عاجبكم اللي ينقال عنكم لا ترضون ان ينقال عنهم بدال هالحجي الفاضي

وعن الخبال

إنــچــعــم

نفهم إذا تبي تدافع عن شركتك وتنفي بعض اللي تعتقده مو صحيح

أما إنك تقل أدبك على بوخالد الصوت الجريح فهذي مو من حقك ولا إنت اللي تقيّم بوخالد أو حتى تفكّر بهالشي

جابل شركتك وايد أبرك

وراح يظل بوخالد صوت وفن ماله حدود

سامحنا بوخالد

ماكو شي يسوى

سياسيا ماكو شي يسوى

أو إن أنا حايشني برود مو طبيعي

بس حابه أبارك لكم بشيين

الأول تدشين جامعة جديدة مملوكة لعلي خليفة الصباح

والشغله الثانيه اللي أحب أهنيكم فيها

إهيا غلاف ألبوم رابح

مادري عن الأغاني بس الغلاف أطربني

يعني ماشاالله ينفع حتى يكون غلاف لعبة سوني

الشرهه على اللي معطيك ويه

الطبطبائي: لازم ترسل كشوف المغادرين والقادمين يوميا إلى لجنة الظواهر السلبية للتدقيق
نريد كشوفات بالكويتيين الذين يغادرون إلى تايلند وبيروت والقاهرة ودبي والبحرين في عطلة نهاية الإسبوع

للتدقيق يعني كل واحد بينسدح على بطنه ويشوف الموجود والماموجود
انزين دققتوا وبعدين؟؟

ثاني شي يبي كشوفات الويك اند على بعض المدن والعواصم مادري ليش ما حط المكسيك؟؟؟

بس الشرهة والله مو عليك انت من اول ما دشيت المجلس وانت فاهم السلطة التشريعية غلط

الشرهة على اللي معطيك ويه ويقول لك صعبه بس نحاول
لا وبعدين يقطها على وزير الخارجية

ودامنا بهالطاري فلاي دبي راح تفتح رحلتين يوميا من نهاية هالشهر بين الكويت ودبي
على المسافرين بالف عافيه

خطوة نحو الوسط

هذي دعوة حق اليوم الثلاثاء منظمينها جمعية الخريجين وجمعية حقوق الانسان وصوت الكويت الساعة 7 مساءا في جمعية الخريجين

وعندنا خطوة كنا فاقدينها من زمان من شباب الوسط الديمقراطي بالجامعة اللي شوية غبار كان مغطي ملامحهم لكن اليوم نفضوا جزء من هالغبار ووقفوا بتحدي وثبات على خطهم وتوجهم رغم إن التيار ضدهم وهذا اللي ميز الوسط الديمقراطي قبل وإن شاء الله يعيدون هالتميز
الوسط الديمقراطي راح يكرم منتخب كرة القدم النسائي مو لنتايجه طبعا لكن لحريته في الإختيار اللي لازم ندعمها
وهذا نص دعوتهم

لنقف معا ونجعل حرياتنا خطوط حمراء بعيدا عن أيدي من يستغل الدين، لنتواجد جميعا وندعم منتخب الكويت النسائي تزامنا مع يوم المرأة العالمي، لنريهم من هو شعب الكويت العاشق للحرية

وذلك في ندوة الوسط الديمقراطي في الجمعية الثقافية النسائية يوم الأربعاء 10-3-2010 الساعة السابعة والنصف

والتي سيتم فيها تكريم منتخب الكويت النسائي لكرة القدم وسيحاضر فيها كل من د. معصومة المبارك - د. إبتهال الخطيب - د. رولا دشتي

والآن عبدالله رويشد ليلة عمر 2010 بالأسواق

:)

والله درينا

لي متى واحنا نسمح وصف حالة التيار الديني ما ظل مقال من ربعنا او افتتاحية واهما يعطونا وصف الحالة ترى يبون جذيه
ترى فعلتهم جذيه وتركتهم جذيه
والله العظيم ورب الكعبة ندري

اي لي متى عاد وإحنا بمرحلة التشخيص

صار لنا 30 سنة على هالحال
متى بس راح ننتقل لي مرحلة العلاج؟؟

الفتنة زادت القمع زاد واحنا ليما الحين بس فالحين نطلع لهم اسامي يديدة مرة تورا بورا مرة طالبان مرة القاعدة مرة ايران مرة حزب الله مرة حماس والتالي يعني؟؟

من ردى الوضع صرنا ملوك التصاريح تقول احد يتحرك الحين بعد شوي باجر ماميش

تبون يتغير الوضع كشفوا الروس ويالله تحركوا غيره ما ينفع

آخر سطر معادلة بسيطة

جمعان الحربش وهايف والشلة يقولون نرفض الرياضة النسائية وما راح نسمح لهم يقومون بهالتصرفات

يعني المسج اللي بيوصلونه يا اهل البنات ويا بنات انتوا غير مؤهلين بإتخاذ قراراتكم ولازم نكون اوصياء عليكم

انزين بما ان نواب الامة يقولون ان اهل شريحة من المجتمع غير قادرة على اتخاذ القرارات السليمة
وبما ان النواب وصلوا للمجلس نتيجة اتخاذ المجتمع لقرار وصولهم للمجلس
اذا فإن التمثيل النيابي بالمجلس عبارة عن اختيار ناس مو صاحين وغير قادرين على اتخاذ القرار

بالكويتي اللي انتخبوا جمعان ميانين