الأسبوع الياي أكثر من موضوع وعد + شخصية الإسبوع

آسفه جدا على التأخير

بس مو بيدي والله

المهم اوعدكم الاسبوع الياي اكثر من موضوع ان شاء الله

المهم

قبل الإنتخابات كان شكله جذيه

بس لزوم القائمة والإنتخابات والدائرة صار شكله جذيه

وطبعا يكيكي نفس الشي

بس ما لقيت له صورة باللحية بس بحلقة الوشيحي كان حاط لحية

اي على الطاري الوشيحي ترى وايد كنت مدلع يكيكي


صج ان اللي معاه بالحلقة خالد الشطي مخلي يكيكي بطل


بس لان الشطي ما يعرف يتكلم هذاك طلع المنقذ

ويالوشيحي دش بيت القرين قبل لا تقابل يكيكي وبشوف شلون يقدر يرد

بس تدرون شنو أحلى شي قاله يكيكي

الوشيحي يقول له انت وايد عنيف باتهاماتك وانتقاداتك لما تكتب

بس الحين وانت مرشح وايد هادي

جان يقول له يكيكي

لكل مقام مقال



تدري لو انا المذيعة هالجملة هذي بس اخليها موضوع الحلقة

يعني اقول حق خالد الشطي يالله توكل على الله

واخز يكيكي واقول له شنو يعني لكل مقام مقال

يعني لما ما تكون مرشح تسب ومادري شتسوي ولما تصير مرشح يصيرون الفاسدين على قولتك الصقر صار بوعبدالله والسعدون ومسلم حبايب قلبك

النفاق اي لون صاير بعد

وشيحي تكفه لا تخوره

انت يا الوشيحي برنامجك اهوا المتفوق على كل البرامج الانتخابية وقلطة الوطن طاحت بجبود خليف وربعه

مهمتك ماهي بس نقل للاراء مهمتك كشف الكذب بعد والتلون والنفاق لا تذبح البرنامج وخل جرؤتك مستمرة

اي صح مدونة بنغير مدونة يديدة ذات هدف زوروها

باكستاني أول ضحاياها.. وأعقبه إيراني
مخالفات الهاتف أثناء القيادة تجاوزت الـ 200 في يومها الأول

باكستاني اول مخالفين النقال ووراه ايراني

سؤال مهم

هل القانون الكويتي الخاص باستخدام النقال بالسيارة تم تعميمه بلغات المقيمين عشان يعرفون ان استخدام النقال جريمة او لأ؟

وعلى طاري جرايم المرور

الحين اذا دبدوب مال الوطني طاف الاشارة الحمره يتسفّر؟؟؟

مسج من خدمة الازرق اول أمس يقول على لسان ابن الشهيد الوحيد بوفهد

مستعد للعودة لرئاسة اتحاد القدم ولكن بشرط تركنا نعمل لوحدنا

اول شي قاعد تشرط على منو ثاني شي للذكرى فقط


على مدى 14 سنة ترأس أحمد الفهد الاتحاد الكويتي لكرة القدم والإنجازات كالتالي

غياب كأس الخليج لمرتين متتاليتين لأول مرة بتاريخ الكويت 92- 94


الحصول على المركز قبل الاخير اليمن تحتنا بس في كأس الخليج بالكويت 2004


عدم التمكن من الاستقرار على نظام دوري ثابت على مدى الاربعة عشر سنة

يعني الاخفاقات اكثر من النجاح

على شنو تتشرط ؟

ننتقل حق حدس

اول شي

الصانع والشايجي يقاضيان موقع «أبناء الكويت

اي ردوا عليهم

ليش قضية ومادري شنو

قولوا ان الكلام جذب مو صحيح فندوا ادلتهم

كاهو المليفي اتهموه بسبع ملايين بحسابه ما ظل مكان الا ورد فيه على الاتهام

ردوا قولوا ما حصل

الاوراق اللي قدموها قدموا عكسها


انتوا تدرون ان القضية بتاخذ وقت وبس تبون تقولون ترى رفعنا قضية يعني انتوا واثقين من انفسكم وشعبنا نساي للاسف


وعلى ما تطلع نتيجة القضية تنتهي الانتخابات ردوا من الحين دامكم واثقين من افعالكم

بسكم تهديد وتخويف الموقع قدم اوراقه واثباتاته ورونا شعندكم بالله

على طاري حدس


جمال الكندري مرشح حدس بالدائرة الاولى يترأس مجلس ادارة شركة الابراج القابضة واهيا الشركة نفسها اللي تملك شركة المسيلة للتنظيف


شركة المسيلة للتنظيف معروف عنها التأخر في صرف أجور العاملين فيها وهذي مصيبة على العمالة اللي ما تملك الا معاشها

أعطي الاجير أجره قبل ان يجف عرقه يا رئيس مجلس الادارة وعضو الحركة الدستورية الاسلامية

اللي عنده أدلة على تاخرهم بصرف الرواتب للعمالة خل يقول وأنا من ناحيتي اعرف 2 من العاملين صار لهم ثلاث اشهر مو مستلمين رواتبهم

سؤال يا ناس

كل الندوات اللي يغطونها بالجرايد فيها حضور وايد شالسالفة؟؟؟

والمشكلة ان الندوات لتيارات واطياف سياسية متنوعة

شسالفة الناس يعني يحبون كل المرشحين؟؟؟

وليد الطبطبائي دش الفيس بوك

بس للأسف كقروب مو كشخص

يا ليت يدش كشخص عشان اضيفه وأقول ان تعرفت عليه بالمكسيك


:)


شخصية الاسبوع

الدوري الأسكتلندي ثلاث مرات
كاس اسكتلندا اربع مرات
كاس الدوري الاسكتلندي مرة
كاس الكؤوس الأوروبية مرتين
وكاس السوبر الأوربي هم مرتين
الدوري الإنجليزي تسع مرات
كاس انجلترا خمس مرات
كاس الدوري الانجليزي مرتين
الدرع الخيرية خمس مرات
دوري أبطال أوروبا مرة
وكاس العالم للأندية مرة

وممكن هالسنة يفوز بدوري أبطال أوربا والدوري الإنجليزي
وفوق كل هذا طلع برشلونه خالي الوفاض

يعني صج صج شخصية الإسبوع

السير أليكس فيرغسون
مدرب مانشستر يونايتد
ولا عزاء لبرشلونه
:)

حرّة إسبوع + أستاذ + شخصية الإسبوع

أدري ولهانين علّي وايد

بس هالاسبوع كان مرهق على الصعيد العملي وخلاني أتأخر في تنزيل البوست

عموما هالمرة البوست طويل وقسموه على اليوم والسبت

وخل نبدى بمعلومات هامة

هل تعلمون إن أحمد الفهد هو من يقف وراء الفحم المكلسن والتي يسميها سرّاق المال العام بسرقة؟؟؟؟

هذي اشرحها لكم بعدين

المعلومة الثانية

تدرون إن شركة أديداس كانت بدايتها عن طريق إخوين ألمانيين تهاوشوا

واحد كمّل مشواره وأسس أديداس

والثاني تهقون شنو سوّى

ما سوّى شي بس فتح له ماركة رياضية ثانية اللي اهيا بوما

من يقول عندهم فلوس

هذا بند المعلومات

الحين نروح على بند السؤال

قرينا عن ألف طريقة للإنتخابات الفرعية

اللي بالتكاسي واللي من مصر واللي من باريس

انا ودي أفهم شي واحد بس

ليش الكويتيين أحسن ناس بالغش والحيل

يعني أحدث طرق البراشيم والغش كويتية

دام عندكم هالافكار وهالاساليب اللي بعضها الكثير ذكي جدا ليش ما تستغلونها حق التطور مو الجرايم؟؟

الحين قبل لا نبلش بمواضيعنا المهمة خلونا نروح حق المليق بس نقضي عليه ونرد

المليق كاتب مقالة أمس ينتقد شعار التحالف

خنشوف شيقول

هل الأمل الذي يقصدونه بـ»الدندنة« و»الطنطنة« على الحفاظ على الحريات العامة، ثم الهروب وعدم حضور مهرجان التنديد بقانون التجمعات.. الذي اقيم قبل اسبوعين في ساحة الارادة ؟! ثم وصفه بالفشل في صحيفة التحالف الوطني ؟! لكي لا تزعل الحكومة الرشيدة

عدم الحضور لمهرجان الخونة اللي مادعوا فيه احد يبون يحققون الانتصار باسم الامة امر وعدم التنديد أمر ثاني

هذي أسيل تندد

وهذا الخالد

وهذا الراشد

وهذا الشايع

يعني حتى تايسون ما يطق مثل ما طقيتك وكشفتك لانك وايد سهل

نكمل مع المليق

ام الأمل الذي يتحدثون عنه، يكمن في نهب اراضي أملاك الدولة.. كأرض المدينة الاعلامية، المطلة على الخليج العربي مباشرة، وبثمن بخس، تحت دعوى انشاء مدينة اعلامية لشركة تحت التأسيس ؟! ثم تأجيرها على فضائيات وفنادق ومطاعم ومحلات تجارية.. وربما نواد صحية لزوم المدينة الاعلامية ؟

أراضي أملاك الدولة والمدينة الإعلامية

ممكن تقول لي وين ارض المدينة الاعلامية اللي تدعيها حدد لي عالخريطة وين ارض المدينة الاعلامية؟

إنزين شتقول عن رد وزير البلدية اللي قال

وزاد الصقر انه فيما يخص المدينة الاعلامية ان الارض لم تخصص لنا في المقام الاول وقرأت جملة استفزت ناصر الصانع وهو سؤال برلماني لوزير البلدية وجوابها ان البلدية لم تخصص ارضا للمدينة الاعلامية لانها - اي البلدية - لا تخصص ارضا فقط للجهات الحكومية

هذا اقتباس الصقر من رد وزير البلدية

نكمل مع المليق

ما علينا، قبل أسابيع من حل المجلس طرح الاخ علي الراشد، اقتراحا لإلغاء قانون فصل الاختلاط في الجامعة.. واقام الدينا ولم يقعدها على هذا الاقتراح »السخيف«، وعندما حل المجلس، واضطر ـ او اضطروا ـ لتنظيم ندوة انتخابية، وضعوا فاصلاً بين النساء والرجال ونشروا صورته في الصحف بلا احترام لعقل القارئ

الندوة عن التعليم المشترك صارت بالجامعة الامريكية ماهي من تنظيم التحالف

بس الطلبة لانهم يعرفون منو يتكلم باسمهم طلبوا نواب التحالف الحضور والتحدث بالندوة والفاصل اللي تقول عنه هذا من ادارة الجامعة وانت تدري بس تبي تجذب لانك انسان متدين

وقبل اشهر ايضا كان الشيخ احمد الفهد رئيس جهاز الامن الوقائي في نظر التحالف الديموقراطي.. سبب جميع المشاكل في الكويت، ثم وبقدرة قادر يصبح مؤتمر جريدة الجريدة، لمناقشة الاوضاع السياسية والاقتصادية والفنية برعاية او حضور الشيخ احمد الفهد

اول شي مو الوقائي الوطني هذا واهوا المعزب والسمي ومنت عارف منصبه

ثاني شي تدري ان مو برعايته

بحضوره

هذي جريدتك تسب التحالف ومقابلة اسيل اليوم، شلون ؟؟؟؟

ولو كنت في الدائرة الثانية وسُئلت هل تمنح التحالف الوطني الديموقراطي صوتك؟ لأجبتهم بالكويتي الفصيح »مالكم أمل

مرشحين التحالف لازم ينسحبون المليق ما راح يصوت

بس فرحتني الصراحة من زمان مو فاضحه احد بهالقوة

:)

الحين نسولف عن الفحم المكلسن اللي صار لهم سنة وشي يحنّون عليها جريدة الفتن

طبعا كل المعلومات ماخذتها من مدونة الدائرة الثالثة وحفظا لحقهم الأدبي

خل يعذروني بس أنا ادري أن هدفهم إهوا نشر الحقيقة ولا يهمهم وين تنشر بقدر إن تنشر الحقائق

السالفة وما فيها إن بيت الاستثمار العالمي "جلوبال" وبطلب من مؤسسة البترول الكويتية أعلنوا عن خصخصة مشروع الفحم المكلسن بالكامل هالكلام بسنة 2002 وحطوا وقت لتقديم العطاءات وغيرها

أحمد السعدون استغرب من هالسالفة

قام ب 28-12-2002 ووجه سؤال حق وزير النفط بالوكالة بذاك الوقت أحمد الفهد يقول فيه

إن مؤسسة البترول صرفت مبالغ كبيرة على دراسة المشروع والاعداد لها

وفجأة طرحوه للقطاع الخاص

فكان سؤاله ليش صار هالشي

وهل مؤسسة البترول قبل لا تعطي الفحم المكلسن للقطاع الخاص طرحت مناقصة على نفس المشروع

قوم يا احمد الفهد وطنّش السؤال

قوم يا أحمد السعدون ورد اسأل نفس السؤال في 22-7-2003وطبعا رد عليه أحمد الفهد بشهر 5-2004

يقول أحمد الفهد إن الخصخصة بالفحم المكلسن لها دور ايجابي وتحقق المطلوب وبالفحم المكلسن في منها فايده

هذا كلام أحمد الفهد

وزير الطاقة بذاك الوقت

إنزين ألحين الوطن وكتابها ومطبلينها عندهم قناعة ان الفحم المكلسن تنفيع حق اصحاب النفوذ

والفحم المكلسن الحكومة عطته هدية حق ولد احمد السعدون

واحمد السعدون ماكان عاجبه الوضع

بس احمد الفهد اهوا اللي كان عاجبه

يعني اللي يتحمل المسؤولية المباشرة على التنفيع اللي يعتقدونه الوطن بسالفة الفحم المكلسن

اهوا احمد الفهد الاحمد الصباح

وبما ان عندنا المرشح الفذ يكيكي بالدائرة الاولى اقترح عليكم ان اي واحد يسئله عن هالموضوع ويشوف شيرد عليه

هل احمد الفهد يتحمل المسؤولية او لأ؟؟

اللي يبي يتعرف على التفاصيل بالصور يروح يزور مدونة الدائرة الثالثة ويعطيهم العافية على شغلهم

الى الآن فريق أحمد الفهد خسران العديد من ابواقه بالانتخابات وقبل الانتخابات حتى

وليد العصيمي - احمد الشحومي - غانم الميع - سعد الشريع - مبارك الخرينج والفال للباجي

اي على فكرة برنامج الوشيحي جميل خاصة حلقة جمال العمر والمتابعة بعد الحلقة وشلون فضحوا مواقفه الداعمة لأحمد الفهد على الرغم من إن يجذب يقول لأ

بس حلقة السنعوسي وبن طفلة كانت تعيسه جدا واعتقد إنك فشلت فيها يالوشيحي الى أبعد حد

وبالنسبة لقناة نبيها تحالف

انا الصراحة مو عاجبني ان بس تقابلون ربع التحالف لأن بالنهاية احنا مو لازم نكون بإعلام أحادي الاتجاه نفس الأنظمة العربية نبي اختلاف نبي طرح متنوع

عشان لا يصير الموضوع تطبيل وبس

الحين ندش بموضوع الأستاذ

وامام هذا المشهد الغريب غير المسبوق في ممارساتها السياسية فانني لا ارغب ولا اريد ان يكون ترشيحي في الدائرة الاولى عاملا في ارتباك او تعميق الخلاف او تحوله الى صراع في صفوف التيار الوطني واصدقائه ومؤيديه مهما كانت فرص النجاح كبيرة

لذلك فاني ألتمس العذر من الاخوة والاخوات، الذين اتصلوا بي أو عقدوا معي الاجتماعات واللقاءات المتواصلة طيلة الفترة، الماضية والدواوين التي زرتها وابدوا ترحيبهم وتقبلهم بل وحماسهم لخوض المعركة الانتخابية في الدائرة الأولى ومجاميع الشباب رجالاً ونساء الذين ابدوا الاستعداد بل الاندفاع والشوق للعمل معي في حالة الترشح وكذلك الشخصيات الوطنية والاجتماعية التي التقيتها، طالبا المشورة والنصح منهم جميعاً أقول بكل تواضع وبكل خجل سامحوني، اذا كان قراري جاء خلافاً لتمنياتكم ومخالفاً لاقتراحاتكم ومطالبكم

هذا الكلام لا يصدر الا من رمز وأستاذ يستحق رفع القبعات تقديرا للي يسويه

بومحمد كفيت ووفيت وكلنا مع الحق وأصحابه

بالفعل عطيت درس بالإيثار بداية من تنازلك بالدائرة الثانية للدماء الجديدة

وبعدين قرار عدم خوض الانتخابات بالدائرة الاولى على الرغم من التقبل الكبير لشخصك الكريم

يعطيك الف عافية وبالفعل استاذ اعطى للقوى الوطنية كلها درس في الوحدة وعدم شق الصفوف

شخصية الإسبوع

تابعوا وإجتهدوا وإن شاء الله يستمرون على هالمتابعة والسعي لملاحقة مجرمين الانتخابات

شكرا وزارة الداخلية على المجهود وللإمام في تطبيق القانون

طبعا مسئولية + شخصية الإسبوع

مدونات يديدة

ملقوف كويتي + تعاليل

الخطوط الجوية الكويتية احتفلت بيوبيلها الذهبي قبل فترة يعني خمسين سنة

دشيت موقعهم ولا تصدقون ما شاء الله لا اله الا الله عندهم 16 طيارة بالتمام والكمال

رحت ودشيت موقع الطيران السعودي ولا طلع عندهم 150 طيارة بس المساكين

قلت لا السعودية فقارى خل اشوف قطر ولا عندهم 60 طيارة بس و 80 بالطريج مع ان قطر دشت عالم الطيران ب 96 مادري 97 مساكين

يا رب يا رب يصير عندنا طيارة زيادة ونصير 17

عفيه

القادسية فازوا على كاظمة امس مبروك علي وعلى كل القدساوية

المهم قريت تغطية الخبر بجريدة الفتن

ولقيت الخبر الأهم الصراحة

استخدم طاقم حكام مباراة الأمس بين القادسية وكاظمة ولأول مرة جهاز الاتصال اللاسلكي بينهم وكان الجهاز وصل إلى الملعب قبل موعدالمباراة بقليل بعد جهود بذلها رئيس لجنة الحكام عبداللطيف الدواس الذي وجه شكره لمدير عام الهيئة العامة للشباب والرياضة د.فؤاد الفلاح ونائبه عصام جعفر على التسهيلات التي قدماها لاحضار الجهاز

رئيس الهيئة العامة للشباب والرياضة بدرجة وزير يايب جهاز لاسلكي لا مو بروحه بعد وياه نائبه

زين ما طلبوا من وزير الشؤون ييب البطاريات مرة وحده

استحوا على ويوهكم شوي

صار لكم سنة ونص تقريبا مو عارفين تتكلمون عن قوانين الرياضة وتطبقونها على ابن الشهيد الوحيد وتكتله

بس فالحين تييبون لاسلكي

فؤاد الفلاح أبي بلاي ستيشن عندك؟؟؟

خلصنا من هالسوالف

خندش بالموضوع

ما ظلت قناة او جريدة إلا وحطوا إعلانهم فيها

الكويت مسئولية

طبعا الشعار ما يدل على أصحابه

اللي اهما حدس

الحركة الدستورية الاسلامية

ح وعرفنا انها حق حركة
د وعرفنا انها حق دستورية
س حق شنو بالضبط؟؟

اسم مو عارفين يختارون

مثل حملة متطمن

اللي اهيا عبارة عن مبادرة توصيل طلبة المدارس بأمان

مو غصب تلزقون شعارات يعني

المهم

الكويت مسئولية

والمسئولية معناها صيانة الدولة والمجتمع والقانون

و حدس ومرشحينها بعاد كل البعد عن هالموضوع

تدرون ان ليما اليوم ما حددوا موقفهم من استجواب الجراح

خوش مسئولية

تدرون ان مرشحهم بالدائرة الاولى رئيس اتحاد الطلبة بقيادة الخونة سابقا دش فرعية العوازم وسقط فيها يعني هم مارسوا جريمة وهم فشلوا

ونعم المسئولية

تدرون إن حملة ترشيد اللي تدفع لها الدولة ملايين الدنانير عشان مرة يطلعون مرة بموضة قطع الكهربا ومرة بموضة قطع الماي تستخدم ارقامها وتلفوناتها حق الاتصال بالناس لدعم مرشحين حدس

خوش مسئولية

تدرون إن جمعية الإصلاح الواجهة الإجتماعية لحدس قالت عن طلبة الجامعة لقطاء واصحاب امراض كالسفلس والايدز

ولتعيش المسئولية

تدرون إنهم منزلين دعيج الشمري معاهم

ما ظل فيها مسئولية

تدرون إنهم رفضوا مبدأ المساواة من خلال رفضهم لحقوق المرأة

ويسعون لكسب ود المرأة

هذي المسئولية

هذا غيض من فيض وبعد الأيام بتكشفهم زيادة

الكويت مسئولية أكيد

وعشان جذيه ما نبيكم

شخصية الإسبوع

أبدعوا في مهرجانهم من أجل الربعي وخصوصا الفيلم اللي حطوه بالاضافة للصور

شكرا لجميعة الخريجين على هذي اللمسة الجميلة

ويا ليت تحطون الفيديو على ال
youtube

والاستاذ عامر الزهير ليش ما تنزل عندما تكلم الشعب مرة وحده ترى خوش وقت الناس تستفيد من توثيقك

عسكر

شلونكم

أبي شسالفة منا قابضة يا جماعة اللي يعرف بالبورصة خل يقول

مدونة أكاديمي مدونة يديدة زوروها

العتيبي للمسجات دزت مسج يقول

إشتباكات سعدون العتيبي والشرطة بديوانه بصباح السالم نبي الفزعة

هذا نص خدمة العتيبي للمسجات

أنا ما فهمت هل معنى المسج إن سعدون العتيبي قاعد يتشابك بروحه مع الشرطة

يعني سعدون أول مرة تشابك مع لجنة العلاج بالخارج

وثاني مرة التشابك مع الشرطة

الثالثة راح تكون بفيتنام؟؟

وثاني شي سؤال حق خدمة العتيبي للمسجات

الفزعه مع شرطة الكويت ولا مع منو بالضبط خل نفهم؟؟؟

لأن اذا مو مع الشرطة فهذا المسج يعتبر دعوة رسمية للتمرد

خنشوف بعد صاحب الوجه الطفولي البرئ عسكر العنزي شيقول

وهل يمكن ان تصل المرأة الى البرلمان في الانتخابات المقبلة؟
صناديق الاقتراع هي التي ستحدد هذا الامر. وأنا لا أعلم الغيب، لكني واثق من ان الناخبين سيختارون الافضل دائماً، الذي يستطيعون التواصل معه، والالتقاء به في اي ساعة من ليل او نهار، والذي تظل ابوابه مفتوحة لهم من دون اي قيود

الأفضل بنظر عسكر هو من يمكن التواصل والإلتقاء به في أي ساعة من ليل أو نهار وأبوابه مفتوحة

يعني بيقول ان المرأة ما تنفع بس بذرابة

بس انا أقول لك إنت ريّال منت صغير

والأفضل بالنسبة لك اللي نقدر نلتقي فيه بأي وقت ليل أو نهار

شوف يا عسكر اذا فزت الله لا يقول راح نسوي شفتات عند بيتك ناس تمر الظهر وناس العصر وناس المغرب وناس الليل وناس الفير وناس الصبح وإذا طنشت أحد إنت منت الأفضل وطبعا إحنا ندري انك مستحيل تكون الأفضل

هل تؤيد الانتخابات الفرعية؟
سئلت هذا السؤال مرات من قبل، وقلت انها مجرد مشاورات يجرى مثلها في أعرق الدول الديموقراطية ولا بأس بها مطلقاً

الحين عرفت ليش توني بلير ما نزل مرة ثانية

اثاريه سقط بفرعية المسكين

فالقبليون مثلاً اسلاميون من منبت الشعر حتى أخمص القدم، وهم من أحرص الناس على الدين عقيدة وشريعة


انت يا بو أحرص الناس اللي مو منتمين حق قبايل صهاينة مثلا يعني؟؟؟

وعلى أي مقياس حددت مستوى الحرص مو طعنا بالقبائل ولا غيرهم بس عيب هالكلام

نبي يسوون إمتحان مثل التوفل حق المرشحين بس لتعليمهم فن التصريح والكلام مو أكثر

يكيكي يخوض الإنتخابات بالأولى تحت شعار كل ابونا جماعة مادري كتبتها صح أو لأ

بس أبي واحد من المتابعين فاضي ومزاجه رايق يشوف المواضيع اللي تطرقت فيها حق يكيكي ويا كثرها عشان نسوي له ملف بعنوان يسقط المقرود
:)

تهقون الوليد بن طلال شكثر يحب محمد عبده؟؟

أخليكم مع أبله أمينه

وصوت يستحق الإحترام

صالح والتحالف + شخصية الإسبوع

شلونكم؟؟

مدونة جندل مدونة يديدة زوروها

انزين

قبل لا أدش بالموضوع الرئيسي لازم أكتب بعض الشغلات مثلا

مقالة المليق أمس

إعلان التحالف الوطني ترشيح الدكتورة اسيل العوضي، لانتخابات مجلس الامة 2008، ضمن قائمة التحالف بعد الانتخابات الفرعية التي أقامتها في مقرها

الفرعية هذي مو سوالفنا كافة الاعضاء بالتحالف او غيره من التنظيمات الوطنية يحق له الترشيح بعيدا عن مذاهبهم وانتماءاتهم

مو سوالفنا هذي

فاليوم الدكتورة اسيل قد تزور بعض دواوين الدائرة الانتخابية.. وقد تعقد بعض المحاضرات واللقاءات العامة للناخبين، فتسير على نهجها بقية المرشحات، بحيث يصبح دخول المرشحات على الدواوين، أمراً عاديا، ويمسي دخول »النائبات« في المجلس على الدواوين.. امراً ضرورياً ولا مناص منه

أمبيه بتزور دوواين ما يصير المليق مو عاجبه

انت بجريدتك مع جم إمراة تتعامل وجم مذيعة قابلتك

استح على ويهك وعن الجمل الايحائية اللي تعكس افكارك

صحيح ان نجاح دكتورة اسيل امر مستبعد من الحسبة الانتخابية، وصحيح ايضاً ان بقية التيارات السياسية لم ترشح ممثلات عنها في الانتخابات، لان النجاح غير مضمون.. ولان التيارات السياسية تريد دخول المجلس لا مديح الناس.. لكن هل المشرع، حينما افتى بجواز منح المرأة حق الانتخاب لانه وكالة.. قد راعى هذه الجزئية؟ وهل دار في خلده، ان النائبة قد تدخل الدواوين الرجالية، ومعها مديرة حملتها الانتخابية، وربما »مفاتيحاتها« الانتخابية؟

مديح الناس؟؟

يعني الناس بتمدح خطوة التحالف

واذا الناس تمدح اعتقد اهما نفس الناس اللي بيصوتون ولا الناس يمدحون شي وياخذون غيره

صج المرسيدس خوش سيارة ممتازه بس باخذ بيجو

اننا ايها الافاضل ومع كل احترامنا للدكتورة اسيل العوضي.. وحقها في الترشيح لعضوية مجلس الامة، الا اننا نقف امام منعطف حساس وخطير.. منعطف سوف يهوي بعاداتنا وتقاليدنا الى مستوى لم يتخيله الاباء والاجداد.. ويجب علينا جميعا ان نتصدى لهذه الاهداف الخفية وراء منح المرأة حقوقها السياسية.. والله يعينكم

الآباء والاجداد ما تخيلوا بنروح لي لندن بست ساعات لا تسافر مرة ثانية

وعلى فكرة ما تخيلوا ان الحرامي بيبوقنا ويفتح جريدة

ثانيا أبناء الكويت ريحوني من يكيكي وربعه بموضوع مميز شوفوه

وقبل لا ندش بالموضوع الرئيسي

مو عادتي اعلق على الصور وبس بس لقيت صورة اجبرتني على التعليق عليها

بو فهد عندك رنة الجوارح ؟؟؟

ندش بالموضوع

كثرت المواضيع حول ترشيح صالح الملا وعدم ضم قوائم التحالف لإسم صالح الملا في قائمتهم الإنتخابية

اللي يقول خالد الهلال اختار ربعه على صالح الملا مع ان صالح الافضل

واللي يقول صالح الملا احسن واحد

واللي يقول لأن صالح ما يخضع لهم ما خلوه معاهم

واللي يقول قالوا مانبي نكبر اعداد مرشحينا بالثالثة عشان نفتح الباب للتحالفات ونفتح المجال لشخصيات وطنية بالفوز وبعدين نزلوا د.أسيل

أنا مقدره كل هالحماس سواء من اللي يدافعون عن صالح او التحالف او ماخذين موقف الحياد

قد يكون صالح افضل من كل مرشحين التحالف بالثالثة

وقد تكون حظوظه ممتازة وقد يكون مرشحين التحالف مو بقدرة صالح وشخصيته

كل هذا ممكن يكون صحيح

لكن يا ناس صالح ان فاز راح يصوت مع التعليم المشترك والأمر نفسه مع مرشحين التحالف

مرشحين التحالف راح يحاربون سراق المال العام والامر نفسه مع صالح الملا

صالح الملا ان فاز راح يطالب بتطبيق الدستور و نفس الشي مرشحين التحالف

لانهم بالنهاية نفس الخط ونفس الروح والمبدأ

وهذا الشي محد يختلف عليه

ليش نثير العداء عيل

ليش نقسم روحنا لفريقين فريق صالح وفريق التحالف

اللي يفوزون بالدائرة عشرة

والشخصيات البارزة والمتناسقة بالمواقف بشكل دائم اربعة او خمسة بالدائرة

يعني شاللي يمنع ان نشتغل مع الكل وندعم الكل

مو الا يكون واحد صح وواحد غلط

دام اثنيناتهم يسعون لنفس الهدف

المواضيع الاجرائية وترشيح صالح من عدمه مع التحالف هذا موضوع اجرائي تنظيمي ما يقلل لا من قدر صالح او التحالف

لا نسويها حرب ونصير فريقين

صالح عرباوي وانا قدساوية وبعطيه صوتي

ونواب التحالف مادري شيشجعون وبعطيهم صوتي

لا تسوونها حرب محد يستفيد منها الا تيارات التخلف

العقل شوي

على عيني وراسي عدم رضا بعض الناس عن اجراء التحالف

لكن مو معناته ابد ان نتحارب

ما كتبت هالموضوع الا بعد ما قريت تعليقات ومواضيع بمدونات ثانية مع احترامي لرايهم حولت مسالة صالح والتحالف الى حرب معلنة

السؤال اذا فازت هيلاري راح يدعمها اوباما او لا؟

والعكس صحيح

نتمنى من صالح والتحالف الظهور علنا وابداء الود بينهم لان ساعات عدم الكلام من الطرفين يكبر المشاكل ويزيد الاشاعات

ويخليها ما توقف والله يستر شنو يصير بيوم التصويت

خلونا نلتفت حق المواضيع الأهم شلون نبني الكويت صح يا ناس

كلنا عندنا اربع اصوات ومرشحين التحالف 3 ويبقى لنا صوت رابع عطوه حق صالح بدل التحلطم وبهالحالة يفوزون 4 من نفس التياروالله انها بسيطة

شخصية الإسبوع

الأستاذ الدكتور دعيج الشمري يعلق على ترشيح التحالف للدكتورة أسيل العوضي مو عاجبه

موقع الأمة عطوا الموضوع حقه بشكل ممتاز

وبالنسبة لي فشخصية الاسبوع اهيا الحركة الوطنية من خلال التحالف الوطني اللي برهن ان مطالباته بحقوق المرأة ما كانت من باب دغدغة المشاعر بقدر ما كانت مبدأ ثابت وراسخ يؤمن بالمرأة وقدرتها على العطاء

فبعد الموقف المشرف للقوى الوطنية باستجواب نورية تثبت القوى الوطنية انها صاحبة مبدأ بالفعل وتدعم الكويت برجالها ونسائها

لكم مني كل التحية

ياني ايميل يسألني شنو صار على ابن الاسرة المتهم بتجارة المخدرات

منو يملك الاجابة؟

صور وبس

شلونكم

اول شي موقع أبناء الكويت موقع يديد ويشكي عدم اعلان المدونين عن الموقع على الرغم من الإيميلات اللي دزها لهم

أنا مادري شنو سر نحاسة المدونين ساعات وأذكر إني عانيت من هالنحاسة ببدايتي

لكن مطقوق مشكور وممنون ومحبوب إهوا اول من أعلن عن مدونتي بالبداية وعنده برنامج بقناة نبيها تحالف بعد اظن اليوم تنعرض أول حلقة اليوم يعني يوم الثلاثا حق اللي قاعد يقرى الموضوع باجر
:)

ترى مو عيب إذا أعلن أحد فينا عن المدونين اليدد او المواقع اليديدة واي شي يكتبونه اهما يتحملون مسؤوليته مو إحنا

ثاني شي مرشح بالدائرة الخامسة إسمه محمد خليل إبراهيم قمبر وأطلق موقعه وطلب بأدب جم الإعلان عن موقعه

وإحنا حاضرين

ثالث شي اذا ملاحظين في واحد بكل رمضان وعيد يطلع علينا لابس بشت وراز صوره بالشوارع وخصوصا عند مستشفى هادي يهنينا برمضان والعيد

وعلى فكرة اهوا لا شيخ دين ولا شيخ صباحي

بس اهوا يحب يلبس بشت

المهم اليوم حاط إعلان نص صفحة بجريدة النهار بالالوان لا والصفحة الأولى بعد

طبعا هالمرة مو لابس بشت لأن ناخب ماهو مرشح فمو حلوه ناخب ولابس بشت

بس الصراحة إسلوبه خلّى دموعي تهطل خاصة اللي مكتوب تحت كلمة ملّينا وفوق الكويت بحاجة إلى قرار

بس ودي أسأل لما كتب نص الاعلان هذا شلون فكّر جذيه بالضبط؟؟

::::::::::::::::::::::::::::::::::::::::::::::::::::::::::::::::::::::::

بالعدد بالضبط وصلني 12 إيميل بنفس المضمون اللي إهوا صورة من تلفزيون الوطن لا اطول عليكم هذي الصورة

اذا قناتك مو عارفه شنو جنسك شنو تتريّى من باجي الناس

بس طبعا مو هذي سالفتي على الصورة

السالفة وما فيها

ان من خلال كم الايميلات اللي دازين لي نفس الصورة

مادري الجملة بدلية او لا

بس من خلال هالكم عرفت ان ناس وايد قاعده للوطن قعده

وناطرين اي شي عليهم

واقل زلّه

السؤال اللي يحن على راسي لي متى بنظل ورا الكيبورد نكتب ونتكلم واحنا ندري مدى رداءتهم ومدى وصاختهم

يعني متى ننتقل للمرحلة الثانية واهوا النبذ العلني

حاولت مع القوائم الطلابية وما فاد بحاول وخل تكون النواة هال 12 اللي دزوا الايميلات

يا جماعة حسبه بسيطة

اذا ال 12 كل واحد اقنع شخص واحد خلال اسبوع من اليوم بس بعدم التعامل مع الوطن راح يصير العدد 24 وهال 24 لو الاسبوع اللي وراه كل واحد فيهم يقنع واحد راح يصيرون 48 خلال 3 اسابيع يصير عندنا 96 وخلال شهر يعطينا 192 شخص

خلال شهرين 3072 وعليكم الحسبة الباجية مالي خلق احسب

يعني كل اسبوع ضيفوا الضعف واللي يوصل للنتيجة النهائية بنهاية شهر 4 2009 جم تكون محصلتنا خل يحطها لو سمحتوا وخل يشيل 40% نسبة التكرار والخطأ


آخر شي اللي يعرف هالطالبة اللي سوت جذيه قولوا لها حياها الله تشاركني بالمدونة لأنها صج ضحكتني

وأهم شي الجامعة تبي تسحب شهادتها

شكو؟؟؟

سحبوا الجنسية بعد

أما السؤال الأهم بهالموضوع شرايكم بإقدام التحالف على ترشيح إمرأة
د.أسيل العوضي ضمن قائمة التحالف بالدائرة الثالثة؟

صفحة 16 + شخصية الإسبوع

شلونكم؟؟؟

أول شي

close@hotmail.com
m9la7a@hotmail.com

هذيل الإيميلين

لقيتهم على سيارتين بالشارع

وعشان أوفر عليهم الفرارة بالشوارع عشان ينشرون ايميلهم

قلت أنشرهم لهم هني اريح لهم وأفر عليهم بنزين

:)

ويستمر تحالف الخونة مع اللصوص

ودام الكاتب المليق أحمد الفهد موجود بالندوة عيل خنشوف مقالته امس

وشيقول ببدايتها

من اهم انجازات النائب السابق وليد الطبطبائي في مجلس الامة المحلول.. قانون منع التشبة بالجنس الآخر، والذي نص على عقوبة كل من اتى فعلاً فاضحاً، او تشبه بالجنس الآخر في مكان عام

الحين إنت قاعد تمدح وليد ولا تتطنز عليه ما فهمت؟؟؟؟

والله اني كنت ناطره تحط ابتسامة بآخر الجملة

يعني صج إنت تشوف إن هذا من اهم الإنجازات؟؟؟

خليف إنت متى تتأدب يعني؟؟

أخبار عن غضب شديد من سعد البراك واعضاء مجلس ادارة زين على خليف

لأن يروح اجتماعات مجلس الادارة

ويطلع يفتن على طول ويقول شصار بالاجتماع

لا وساعات ينشر الاخبار بجريدته بعد

مما أدى إلى أنه أكل زفة معتبرة من مجلس الإدارة في الإجتماع الأخير مما جعله لا ينشر اخبارا خاصة متعلقة بزين إلا بعد نشرها من مصادر إخبارية أخرى

وآخرها خبر حصول زين على رخصة النقال بالسعودية اللي نشرها امس الخميس

وكان مصدرها كونا -السعودية

يوم الأحد اللي طاف وتحديدا بصفحة 16 بجريدة الفتن كانت الصفحة ملغومة جدا جدا

والصراحة إستغربت من عدم تطرق المدونين على الأقل المدونين اللي أنا أتابعهم حق هالصفحة تحديدا

وهذا بعض اللي نشر بهذيك الصفحة

عسكر العنزي يقول ان ما خرج عن مشورة القبيلة واللي يقول انه خرج عن مشورة القبيلة يهدف للتكسب الانتخابي

بمعنى ان الخروج عن منهج الفرعيات يؤدي الى الخسائر الانتخابية وعاشت لنا الكويت

إي عسكر العنزي مرشح صاحب برنامج ورؤية ثاقبة وأنا أعطيكم الدليل

تدرون شنو رأس أولوياته بالإنتخابات؟؟؟

واوضح ان زيادة الخمسين ديناراً سوف تكون على قمة الاولويات

قمة الأولويات بعد يعني هذا أعلى شي يسعى له

إنزين إذا هذا أعلى وقمة الأشياء اللي تسعى لها شنو الأشياء العادية

صبغ مجلس الأمة؟؟

وعاشوا أهلها

هذا عسكر احد أبطال الصفحة 16 يوم الأحد

وهذا الثاني وهم مرشح بالرابعة

يقول القبيلة هي الاساس طال عمره

انزين انا ما اعرف تقسيمات القبايل ولا ادري عائلة الشهري تتبع اي قبيلة

بس اذا قبيلته او الروس الكبيرة من قبيلته خارج الكويت طلبوا منه شي ما يوافق مصلحة الدولة اللي اهيا الكويت

شبيسوي وقبيلته على كلامه اهيا الأساس

مع إحترامي لقبيلته ومع عدم إحترامي لاي أحد يفكر بقبيلته او مذهبه أو عائلته كأساس قبل دولته

وعاشت لنا الكويت

وهذا هم واحد ثاني بصفحة 16

نروح حق اقوى واحد بصفحة 16 واللي صج صج مخليني مستغربة من عدم تعرض أي أحد له

وهالمرة من مرشح الدائرة الخامسة ودكتور بعد
ياخوفي مثل دكتواره دعيج

يهدد ويقول!!!؟؟؟؟؟

سنواجهكم بأعداد أكبر!!!؟؟؟؟؟

الازالة ستسبب مشاكل في البلاد الله يعلم عقباها

عند تنفيذ الإزالة يقول ستكون المواجهات بكميات أكبر؟؟

شنو كميات يعني

مادري ممكن تطلق كميات على البشر؟؟

يعني الهاجري يقول حق ناصر المحمد

لازم تسحب قواتك خلال ايام وإلا؟

هذا تهديد أمن دولة واضح وصريح ومباشر ولا تأويل فيه

والوطن طبعا تنشره عن طيب خاطر

وعاشت لنا الكويت

يكيكي وما أروعه من يكيكي

مقالته أمس عنوانها

اشسالفة... فرض الهيبة

أنا جم مرة قايلتلك

شسالفة مافيها ألف أول شي؟؟؟

إذا أرادت الحكومة أن تكون الهيبة على ابناء القبائل فنحذرها: هؤلاء اهل الكويت ومن يمس شعرة منهم تأكدي أن ولا الف قنبلة مسيله للدموع او الف عصا ستمنع من المواجهة! وتأكدي ان أي كلمة مسيئة قد نسمعها من لجان الازالة بحق أي صاحب ديوانية مخالفة لن تمر علينا مرور الكرام وسنلجأ لجميع الاجراءات القانونية تجاه أي احد منهم وهذا وعد

يشتري ود ابناء القبائل على أمل أن يحصل على أصواتهم بالدائرة الأولى

واليوم يأكد هالموضوع من خلال تصريح

مبينا ان ابناء القبائل والذين تعرضوا للقنابل المسيلة للدموع والضرب بالعصي ابان تجمهرهم امام مبنى المباحث الجنائية هم من اهل الكويت ولا نرضى لهم اي مساس كما تحذر الجهات المختصة في قرار ازالة الدواوين من اتخاذ اي مسلك ينم عن اي عنجهية في التعامل مع اصحاب الديوانيات المخالفة
وتعهد الفزيع بالدفاع تطوعا عن اي مواطن كويتي يتعرض لاي سب او قذف او تجريح فضلا عن اي معاملة مهينة من قبل الجهات المنوط بها قرار الازالة داعيا الحكومة الى التروي وحث مسؤولين وفرق الازالة على احترام المواطنين والتعامل معهم بكل الرقي الذي يستحقه اهل الكويت

كل هذا تبي اصوات القبايل؟؟

شرايك تشارك بقلطة الوطن مرة وحده بعد؟؟؟

شخصية الإسبوع

يا إني ما تابعت عدل يا إن ماكان اكو شخصية بارزه هالاسبوع

لذا وحلوه لذا

اللي بباله شخصية حق هالاسبوع يكتب تعليق باسم الشخصية والاسباب يمكن اقتنع واحطها شخصية الاسبوع