عهد الشيوخ والفداوية انتهى

قلت مابي أكتب أمس لاسباب وايد مع إن عدد أمس الثلاثا بالوطن كان ملغوم بس قلت أنطر تطورات اليوم وبالمرة أقرى الطليعة يمكن يفيدوني بشي زيادة

عنوان الموضوع إهوا العنوان اللي حاطينه الوطن أمس كعنوان رئيسي على لسان مسلم البراك

وطبعا اللي قايله مسلم البراك نقلا عن الوطن نفسها إهوا هذا

لن نقبل لأنفسنا ان نكون - تبعا.. نحن لسنا تابعين، هذا الزمن ولّى وراح

ولّى وراح عهد الشيوخ ولا يوجد احد فوق القانون

قولولي بس وين المشكلة بهالكلام إذا في واحد يقول غيره وينه خل نتفاهم معاه ونعلمه إن

في شي بتاريخ 11-11-1962 يقول نفس الكلام

وطبعا بعدين حاطين لستة صور واسامي حق الشيوخ تحت عنوان

شيوخ تحت مقصلة المجلس.. وتم خلعهم او التهديد بإستهدافهم من بعد الغزو

وأنا باخذهم واحد واحد على حسب اللي أعرفه

ناصر المحمد - موقف الحكومة ب شهر 5 2006 من الدوائر كان السبب وصلح غلطته وإنتهت المشكلة

جابر المبارك وزير الدخلية - محد حاطه تحت المقصلة إلا إنتوا يا شيوخ المسيلة على قولتكم وآخرها اللي كاتبينه بعدد اليوم ونائبكم الفاضل القدير الجهبذ المغوار سعدون حماد (أخاف ما أمدحه يطقني) مثل ما سوا مع العلاج بالخارج

:)

سعود الناصر - سئلوا حلفاؤكم الإخوان المسلمين اللي ماكو سطر بالجريدة إلا وذاكرينهم فيه اهما اللي حطوه تحت المقصلة

علي الخليفة الصباح- مربط الفرس مالهم ومو بس مقصلة المجلس لازم مقصلة نايف بعد لأنه حرااااااااااامي أو علي بابا على قولة خالد هلال

علي الجراح- التلميذ ما ودّره إلا علي بابا ومفروض الصف كله اللي كان مدرّسه علي الخليفة يحترق مو بس الجراح

طلال مبارك الأحمد مال الكويتية - ما أعرفه ولا اعرف شي عنه بس اللي أعرفه إن إذا شايفين أغنية أنا رديت حق عبدالكريم راح تشوفون طياراتنا ليما الحين نفس الشي واهوا الرئيس والتقصير اكيد بالادارة

مبارك الدعيج مال كونا - اذا ثبت إن إعلان الأهرام منه يستاهل اللي يصير له

أحمد الفهد كل وزارة مسكها الحين فيها مشاكل هذا غير الرياضة وطبعا كل هذا ينغفر له بس إن مرافجكم هذي بروحها مصيبة

طلال الفهد - لأني قدساوية مابي اقول شي عنه
:)
بس اللي اعرفه إن يخوره وايد بره نادي القادسية وما اعرف تفاصيل هالسوالف وايد

ولا تنسون إن إخو أحمد الفهد وعليه فضايح هاليبرتون مثل ما عرفت

فهد السالم خمبق بهيئة الزراعة ليما قال بس وإستجواب شرار فضحه بس أهم شي لما لبس برتقالي وراح ساحة الارادة يعني معارضة

:)

محمد العبدالله الصباح - يقول ماكو ولا قضية أو حالة فساد يتني

وأنا أقوله وإنت شنو؟

الباجي ما اعرفهم

طبعا اللي بيوصلون له إن الشعب مايبي الأسرة الحاكمة ويبينون حق اصحاب القرار من الشيوخ إن ديروا بالكم من الناس

ترى بيقلبون عليكم

والرد ممكن تلاقونه عند عاشق وطن اللي كاتب مقالة بالطليعة عن هالموضوع

انزين خلونا نروح حق رفيج بوش وولد خال بلير ونسيب ساركوزي و يد بوتين فؤاد الهاشم

مقالة إسمها النعاج والشاوي

كاتب فيها إن 3 نواب ما راحوا ديوان أبل على موضوع الزعبي

ألحين ديوان ابل ردوا عليكم وقالوا ما دعيناهم وإنت ليما الحين

بس مو هني الموضوع

لأن كاتب جملة تعتبر أكبر غلطة في تاريخ الكتابة على الإطلاق وتفشل الصراحة ومادري شلون طافت على المدققين بجريدتهم

لأن ما يصير اللي كاتبه إهوا

غلطة صج صج شنيعة

يقول
وانا ارفض دعوات عديدة للانضمام الى احزاب وتكتلات ومجموعات سياسية في الكويت، بعضها مرتبط »عاطفيا« بالخارج،، وبعضها مرتبط عقائديا بالخارج ايضا!! لماذا؟! لأنني انسان ولست.. »تيسا« أو »نعجة

فؤاد الهاشم إنسان

!!!!!!!!

بالكويت عندنا بلبلين

بلبل المغني مااروعك وسكة سفر وانا ناطر وليلحين احبها ورحلتي لا لا رحلتي مالت رويشد صج

تدرون عاد نبيل خيروه بين رحلتي وسكة سفر وإختار سكة سفر؟؟؟

لا لا وين رحت انا

المهم البلبل الثاني اللي عندنا ما يغني بس يطبل حق معزبه علي الخليفة

شيقول بمقالته أمس - سنة الذبحة

طبعا كاتب عن استهداف الشيوخ نفس اللي مكتوب بالصفحة الأولى

أنا يعجبني توارد الخواطر بين كتاب الوطن وإدارة التحرير أشكره يكتبون من نفسهم مو اوامر من خليفوه

:)

يقول

سنة الذبحة بدأت مع إقصاء الشيخ أحمد الفهد اثر أزمة الدوائر، ثم تلاه إعدام سياسي لابن عمه الشيخ أحمد عبدالله الأحمد. وما كدنا نمسح دماءهما من المشهد السياسي حتى تم اغتيال شخصية الشيخ علي الجراح. واليوم تتصاعد الاحتمالات بتصفية الشيخ مبارك الدعيج والقضاء على الشيخ صباح الجابر، ودفن الشيخ طلال المبارك!!.هذا بالطبع إضافة الى المؤامرات المستمرة لتدمير الشيخ علي الخليفة والتهديد باستجواب الشيخ صباح الخالد، لتتوج سنة الذبحة هذه بالتهديد الذي لم يعد مبطناً باستجواب سمو رئيس مجلس الوزراء

وبعدين يسترسل حلوة يسترسل مو؟

لا نستطيع الهروب من سؤال مؤرق يقول: »هل يعقل أن أبناء الأسرة دون غيرهم هم الفاسدون، وهم الفاشلون في أعمالهم عن بقية أبناء الشعب، الذي يبدو أنهم كلهم وطنيون صالحون نزهاء؟

طبعا يبي يسوي فتنة بين الشيوخ والناس مثل ماكان الحجي بالصفحة الاولى

وأنا اجاوب على سؤاله وأقوله السالفة مو بعيال الشيوخ السالفة بمناصب البعض اللي يسيئون إستغلالها مثل احمد الفهد وعلي الخليفة

والدليل إن دعيج الخليفة فرزدق الكويت محد ياي صوبه مع إن كاتب من قبل

طااط وطوط كاهو ياكم الأخطبوط عن المنتخب ومن يومها وإحنا مو مترقعين

وغيره وايد من عيال الصباح ماغلطوا أو خاروها السالفة باللي يغلط

هذا السنعوسي طار بسبة أغلاطه وإهوا مو شيخ هذا النوري وزير المالية هذا الكليب وشرار وغيرهم كلهم مو شيوخ وتحاسبوا

لا تقعد تألف عاد

وأخيرا يكيكي

بنهاية مقالته أمس اللي عنوانها

اشسالفة رئيس ديوان المحاسبة

مادري منو وين مطلع الالف اللي قبل الشين بالعنوان بس ما عليه

كاتب هالجملة

تلقينا تعليمات من السيد الوالد سليمان الفزيع بتقديم أشد الاعتذار لرواد ديوانية ابراهيم ابل على قساوة ردنا على بيانهم وتنفيذا للأوامر السامية أبلغكم باعتذاري الحار والصادق لأي كلام في مقالي قد يكون مسكم بتجريح من غير قصد خصوصا وأن نوايانا القلبية تحمل لكم محبة خاصة منذ أيام الانتخابات واستقبالكم الكريم لشخصنا المتواضع آنذاك وعلى أمل قبول اعتذاري وصدق محبتي لكم

ياليت تسمع كلام أبوك وتكون مؤدب دايما

لكن ما كل ما نتمناه ندركه

وصلوا

جريدة اللصوص شرفت

لا يخسون ما يشرفون

شافوا المدونة بعد الثورة الإعلانية عن الموقع

عند مطقوق وساحة الصفاة

مشكورين يا مطقوق وساحة الصفاة

والله لا يحييكم يا لصوص

مابي اشوفكم مرة ثانية

تبطلون الوضوء حتى بالشوفة

فيصل الجناعي

ما عندي شي على فيصل الجناعي بس حبيتكم تقرون المكتوب وإنتوا مبتسمين أو تضحكون على حسب إعجابكم بخدوده
:)


قرار ضبط وإحضار لمتهمي «الناقلات» هذي جريدة الراي

ضبط وإحضار' المتهم الخامس علي الخليفة وهذي جريدة القبس

ضبط وإحضار علي الخليفة وهذي عالم اليوم

لجنة محاكمة الوزراء أمرت بضبط واحضار علي الخليفة وهذي جريدة السياسة


لجنة محاكمة الوزراء أمرت بالقبض على الشيخ علي الخليفة وهذي جريدة الآن الإلكترونية

وجريدة الجريدة هم نفس الشي بس مو راضي يفتح معاي الموقع

أما بالنسبة لجريدة علي الخليفة فالمانشيت كالتالي

دول الضد.. تعود


لووول يعني محد يدري شالسالفة وبيقصون ع الناس هالمانشيت

أما بالنسبة ليكيكي عاش عاش

فإليكم مشروع هدّه خلّه يتحدي

تبون الناس يا تصير صبيان عندكم يا تحرقون الديرة باللي فيها؟! معصي وروسنا تشم الهوىهذي اليوم

ولاتنسون التجنيس وكشف التجنيس وينه؟ موعند مكتب معالي الوزير؟ يعني تظنون ان النائب مسلم البراك او النائب محمد خليفة الشمري يقدران يتكلمان على معالي الوزير والكشف عنده؟! (اتحدى) هذي يوم السبت اللي طاف 7-7

حدك عاد واعرف من جبيلك هذي يوم اليمعة 6-7

انا وضعت روحي على كفي وخل اللي يصير يصير »يعني انتحاري« شلون توقفون انتحاري؟؟؟ملاحظة: الطق علينا وايد بس اقسم لك يا كويت.. محنا مخلينك!! هذي يوم الأربعا اللي طاف 4-7

يبي يتحدى الولد

ما أقول إلا على قولة هيفاء عادل

عتيج عتيج وينك وينك يا عتيج؟

شنو هذا...؟

شصاير يا جماعة العادة 3 أو 4 أو خمس تعليقات على المواضيع اللي أكتبها

خرعتوني وصلتوا 20 ماشاءالله عليكم

بعدين إكتشفت إن مطقوق إهوا السبب

مشكور يا مطقوق ع الدعاية

:)

وإن شاء الله أوعدكم إني أكتب بشكل مستمر بس مو يوميا عاد ترى والله متابعة الوطن تمرض

مو كل أهل عبدالحسين عبدالرضا يضحكون

قررت إن كل يوم يمعة أكتب شي عن جريدة اللصوص يكون فيها الاشياء اللي لفتت انتباهي طول الاسبوع


المهم

اليوم كان في موضوع مضحك جدا بطله يكيكي اللي مو من عوايده يكتب شي ايام الخميس واليمعة بس غصبا عليه اليوم لان يايله رد من ديوان ابل اللي إستشهد فيهم لما كتب موضوع عن محمد الزعبي بالصفحة الأولى

معطينه خوش طراق

خل أعطيكم أول شي خلفية عن الموضوع

يوم الأثنين اللي طاف الفزيع كتب موضوع عن وزارة الخارجية وتقريرها وطبعا كل كلامه كان مردود عليه وتقدرون تقرون الموضوع اللي تحت عشان تعرفون تفاصيل أكثر

المهم من ضمن كلامه بموضوع يوم الاثنين يقول يكيكي إن ديوان ابراهيم ابل سووا عزيمة
على شرف محمد الزعبي

الا ان المريب او الغريب ان النواب احمد لاري وسيد عدنان عبد الصمد وحسن جوهر وجهت لهم الدعوات ولم يحضروا؟

وبرد ديوان أبل شيقولون

ان ما ذكر في الخبر حول توجيه دعوة العشاء لاعضاء مجلس الأمة الافاضل السيد عدنان عبد الصمد والسيد احمد لاري والدكتور حسن جوهر، عار عن الصحة تماما نظرا لان الدعوة كانت مقتصرة على رواد الديوان كما نتشرف بحضورهم ونفخر بكونهم ممثلي الشعب

طبعا انا أختلف مع ديوان ابل إنهم يردون على هالجريدة ومحررينها لأن كلها جذب لكن خوش دقرة حق يكيكي

وهذا هم جزء من رد ديوان أبل

اننا في الوقت الذي نعرب فيه عن ترحيبنا الحار بكافة اعضاء مجلس الامة الكويتي، وفي الوقت الذي نحن بأمس الحاجة الى التمسك بالوحدة الوطنية قولا وفعلا، نستنكر وبشدة زج اسماء النواب الافاضل عبد الصمد ولاري وجوهر في محاولة مكشوفة لبث سموم الفتنة بين ابناء الشعب الكويتي الواحد هذا ونود التأكيد على ان النواب الافاضل المذكورين هم محل ثقة وترحيب تام ونفتخر بهم وبمواقفهم الوطنية التي عجزت الصحف والأقلام عن النيل منهم والتي يشهد لها القاصي والداني.أخيراً: اننا اذ نستنكر من جديد ما قامت به الصحيفة من خلال استغلال لموضوع الأخ محمد الزعبي لبث سموم الفتن وتصفية الحسابات السياسية.يعرب إبراهيم أبل وإخوانه عن اعتزازهم الشديد بالشعب الكويتي كافة وبنواب مجلس الأمة الأفاضل جميعا والأخ محمد الزعبي ورواد الديوان ويؤسفهم ما بدر من إساءة بحقهم من قبل الصحيفة

يعني بطوا الجربة وكشفوا نوايا الوطن ومن خلال الوطن نفسها

وناسة

المهم أبيكم تقرون رد ديوان أبل كامل وأبيكم تشوفون إذا إنذكر فيه إسم يكيكي خير شر

الإجابة طبعا لأ

بس هم تاكدوا

طبعا من الحرة قعد يلف ويدور بمكانه

وشوفوا شنو يقول برده على رد ديوان أبل

وبعدين تعال يا صاحب البيان تقدر تقول لي منو حطك محامي عن هؤلاء النواب؟ ماعندهم لسان؟ مايقدرون يتكلمون عن نفسهم؟ فخطابي في المقال كان موجها لهم وليس للديوانية، واذا عندهم كلام خل يقولونه بدال ما يخلون غيرهم يتكلم عنهم، ترى اذا كان البعض يحب يكون عصعص للنائب ترى احنا روس وروس لاتحني هامتها الا لوجه الله عز وجل
اخيرا فان كاتب هذا المقال ينتمي لأسرة شهداء، ومواقف هذه الاسرة بالوطنية مشهود لها اكثر من مواقف هؤلاء النواب الوطنية، كما سميتموها لان مواقفنا افعال وافعال تشرف الكويت بنوابها بما فيهم نواب صاحب البيان فليس هناك داع للعزف على اوتار الوطنية، وكلام من مثل عجزت الصحف والاقلام عن النيل منهم، فتاريخ اسرة كاتب هذا الموضوع بالوطنية اكبر من مواقف نواب صاحب البيان مليون مرة ومايطلع من ظهر اسرة الفزيع غير وطني، حدك عاد واعرف من جبيلك

يقول عن نفسه ان اهوا من الروس اللي ما تحني هامتها الا لوجه الله عز وجل

ما تركب الله يهداك وإنت تكتب بالوطن إنك تكون من الروس

بعدين تعال منو طعن بأهلك ومنو ياب لهم سيرة أصلا

بس الظاهر كان حاب إن يتكلم عن أهله وبس

وتعال جملة حدك عاد وإعرف مجابيلك هذي حق منو

حق الديوان يعني

إستح على ويهك إنت محامي ومفروض مفروض تكون مثقف يعني بس كلامك عكس هالشي تماما

بالنسبة لتاريخ اسرتك المعروف ومادري شنو مو معناته إن إنت شريف مثلهم

يعني معروف عن عبدالحسين إن كوميدي من الطراز الأول بس مو كل أهله يضحكون

معروف عن بدر المطوع إن خوش لاعب بس مو كل عيال المطوع يلعبون زين

معروف إن من عيال الفزيع شهداء قدموا روحهم للكويت بس اكيد مو كل عيال الفزيع وطنيين اكيد فيهم عبدة اللي يدفع اكثر والدليل انت

الظاهر ماكو راحة

قلت إني برتاح وما راح أكتب الا المواضيع الكبيرة

واليوم نواف الفزيع صار محرر بالوطن مو كاتب مقال

وكاتب بالصفحة الاولى وبالمانشيت العريض

وزارة الخارجية... «مقابلي»

طبعا هجوم شرس على وزارة الخارجية

على موقفهم من إعتداء الإيرانيين على الزعبي الدبلوماسي بإيران

الظاهر إن وزير الخارجية كان له دور في إستقالة الجراح

ولا ما يصير كل هالهجوم

بس على فكرة قبل لا أذكر لكم تفاصيل اللي قايلينه عن الهجوم على الدبلوماسي

شوفوا شنو قالوا قبل 10 ايام تقريبا

بالتحديد يوم 21-6
بالافتتاحية مالتهم

ضربت الدبلوماسية الكويتية بقيادة نائب رئيس الوزراء ووزير الخارجية الشيخ الدكتور محمد صباح السالم الصباح نموذجا ناجحا وواضحا للدبلوماسية القوية عندما انتفضت فورا لكرامة دبلوماسي كويتي تم الاعتداء عليه لاسباب »غامضة« لاتستهدفه هو شخصيا بل تستهدف الكويت ذاتها، فاستحقت الكويت وهي البلد الصغير الحجم والتعداد احترام العالم لوقوفها في وجه جار عملاق مثل ايران واشتراطها الاعتذار الايراني عن هذا الاعتداء السافر وابلاغ ذلك للسفير الايراني الذي تم استدعاؤه على عجل فعبر عن الاسف لما حدث والحرص على عدم تكراره

طيب اليوم طابين بالوزارة بناء على تقرير خليجي عن تفاصيل الإعتداء

انا ما أدري من وين هالتقرير ومن وين يايبينه

بس ذكروا شي منقول من التقرير خلاني أتأكد إن التقرير خرطي وعلى قد يكيكي بس

يقول التقرير

ستة أزلام ضخام الجثة اشبعوا الزعبي لكما وضربا وابتعدوا عنه لثوان لأنهم ظنوا انه مات»، مبينا أن «المعتدين اكتشفوا ان الزعبي لم يمت فأرغموه على مرافقتهم إلى السفارة الكويتية، تحت صراخ أربع كلمات (إمبريالي- كويتي- أمريكي- صدام

الحين يقولون طقوه طق وإعتقدوا إنه مات

يعني اذا مو ميت على الاقل متكسر صح

طيب اهوا اليوم الثاني راد الكويت ولابس جينز وقميص ازرق ويمشي عادي مع محمد صباح السالم

يعني شنو هالطق اللي يخليهم يعتقدون إن مات واليوم الثاني يتمشى

على فكرة انا مو قاعده اقول ان ما انطق

او اني مستانسة ان انطق بالعكس اكيد هالشي مرفوض

بس مو يجذبون عينك عينك

وثاني شي يقول التقرير إن كانوا يصارخون عليه

إمبريالي كويتي امريكي صدام

ذكروني بنكتة قديمة

اللي واحد قال حق بنت ربطي الجوتي
ردت عليه
شنو انا تفاحة؟
جان يطيح الكبت

نفس المنطق صج خوش تقرير

مادري صدام شكو بالسالفة

أخيرا

إستقال الوزير

وإفتكينا من أحد أدوات علي الخليفة على قولة مسلم البراك

مبروك

كنت ناطره الاستقالة عشان اريح شوي من هالجريدة اللي تعبتني نفسيا من كثر ما أتابع جذبهم

وعلى هالاساس ما راح اكتب يوميا عنهم بالفترة اليايه

الا الأشياء اللي حدها قوية

سامحوني اذا قصرت بالفترة اللي طافت

وشكر لكل من تابع بالتعليق أو المشاهدة