900

أكد وأنتقد تقرير الديوان المحاسبة لعام 2008 ما قامت به المؤسسة العامة للتأمينات الاجتماعية على وضع وديعة تقدر بأكثر من 900 مليون دينار!! و هو ما يعادل 30 % من ممتلكات التأمينات في بنك واحد فقط لا غير وهو البنك الأهلي المتحد!! والمصيبة ان هذا البنك يتواجد في دولة – شقيقة- نسبة ضمان الودائع فيها تساوي صفر وهي البحرين في حين ان البنوك الكويتية ودائعها مضمونه من قبل الحكومة الكويتية بنسبة 100% فهل هذا استثمار ام استهتار؟؟؟

أنقل هالمعلومة من مدونة إحتجاج لضمان انتشار أكبر للموضوع

هالمرة مو خمس ملايين تم استجواب الوزير فيها مرتين

وهالمرة مو شيخ اللي ورا هالعبث بالمال العام عشان لا يقولون نحارب الشيوخ

يالله الدور الباجي على الضمائر

والله يستر من اليوم الساعة 6 ما يصير شي ما نبيه

لا تاخذونا بالصيحة

اي نعم الجويهل غلط

وإي نعم ما نرضى بتقسيم الكويتيين داخل وبرّه السور وهالكلام الفاضي

ولا نرضى بكلامه الفاضي واوراقه

ومراسلاته بين الجيش الشعبي وناس كويتيين

ولا بالسي دي اللي هدد فيه بو حمود كل هذا ما نرضى فيه

لكن إن ندخل اللي اكو واللي ماكو بتصفية حسابات هذا اللي مو منطقي ابد

وان نستغل حادثة الجويهل بمراقبة المدونات وتقييد الحريات أكثر على الإعلام بحجة الحفاظ على الوحدة الوطنية

هذا كلام مو مقبول

لأن لو الوحدة الوطنية تهمكم جان وقفتوا علي خليفة من قبل

وساحة الصفاة حطّت لكم بعض مصايبهم

وتمزيقهم للوحدة الوطنية

وتقدرون تراجعون ارشيف بيت القرين بالفين وسبعه وتعرفون

لكن بتمررون قوانين وتقييد حريات جدام نواب الأمة وبرضاهم هذي مصيبة وما راح تتطوف لكم

والشغلة الثانية

لا تاخذنا الصيحة وتكفير الجويهل وطنيا ونتناسى قضية عادلة

واللي اهيا محاسبة مزدوجي الجنسية سواء كان سيلاني كويتي او استرالي كويتي او ايراني كويتي او سعودي كويتي او امريكي كويتي او بريطاني كويتي

اي واحد عنده جنسيتين مخالف القانون

ولا بد يتطبق القانون عليه

مو لأن الجويهل طالب بهالشي صار المطلب غير شرعي

لحّد يحاول بهالخبصة يسّفه الموضوع

أما ثالث شغله

فهني على قلب برشلونة مليونين يورو من فلوسنا عشان يقعدون على الكراسي بالعديلية

عكس التيار والله يعين عالتخوين

أكثر أشياء ترددت خلال أسبوع

اهيا 3 استجوابات لأن الوعلان مسكين محد صوبه بس اهوا يصرح + علي الراشد

علي الراشد إقترح تنقيح الدستور

انزين أول شي تنقيح الدستور عندنا مشكلة فيه؟

أنا من ناحيتي لأ إذا كان بإطار الدستور

يعني وفق المادة 174 بموافقة الثلثين

والمادة 175 اللي تتكلم ان ما يصير التنقيح الا لضمان حرية ومساواة اكثر

يعني الدستور ما يرفض تنقيحه واللي يرفض تنقيح الدستور مو مؤمن بالدستور

انزين هذي اول نقطة من نقاط علي الراشد ما فيها شي واللي اهيا تنقيح الدستور

ثاني شي هل في مواد بالدستور تحتاج تغيير او تعديل

انا مثلا برايي اي نعم في بعض المواد

مثلا مادة 80 تقول

يتألف المجلس من خمسين عضو وهذا الكلام كان في 62 بمعنى ان شعب الكويت ما اعتقد كان يتجاوز ال 200 الف مواطن وكانوا نوابهم خمسين

الحين شعب الكويت خمس اضعاف اللي كان عليه في سنة 62 فمنطقيا نحتاج زيادة عدد الاعضاء

مثال ثاني مادة 82 اللي تشترط بالعضو مواصفات معينة

منها ان يعرف يقرا ويكتب بالعربي بس

وهالشرط ب 62 كان معقول ومقبول

لكن مع الزامية التعليم اللي نص عليها نفس الدستور لا بد ان نتطور ونحدد شروط اكثر فايدة من مجرد القراءة والكتابة بالعربي

آخر مثال بقوله مادة 86 اللي تبين سالفة اجتماع المجلس

يعقد المجلس دوره العادي بدعوة من الأمير خلال شهر أكتوبر من كل عام، وإذا لم يصدر مرسوم الدعوة قبل أول الشهر المذكور اعتبر موعد الإنعقاد الساعة التاسعة من صباح يوم السبت الثالث من ذلك الشهر. فإن صادف هذا اليوم عطلة رسمية إجتمع المجلس في أول يوم يلي العطلة

ايام الدستور كانت الاجازة بس يوم اليمعة بعدين صارت خميس ويمعة الحين يمعة وسبت بمعنى ان بكل الاحوال السبت اجازة، حتى لو ما كانت إجازة فاهيا تعتبر راحة اسبوعية وهذا يحتاج ان يتغير اليوم الى الأحد صحيح ان تغيير غير مؤثر بس يفرق

اوكي أظن انتوا هم فهمتوا ان في مواد تحتاج تنقيح أو تعديل بالدستور وهذا ايضا مو عيب

وهذي نقطة ثانية مافيها شي بكلام علي الراشد

النقطة الثالثة بكلام علي الراشد اهيا التعديل على الإستجواب

طلب مناقشة موضوع أو لجنة تحقيق لازم يقدمونه خمسة أعضاء وطبعا مناقشة موضوع ولجنة تحقيق اقل حدة من الاستجواب

في حين ان الاستجواب اللي يهز الوزارة المستجوبة حتى لو كان كلام فاضي يحق لنائب واحد فقط يطلبه

ولابد إن يصير حتى لو 49 نائب مو راضيين

ويضيع الوقت عالفاضي ولنا بإستجواب الوعلان خير دليل على الكلام الفاضي

الراشد وده ان يكون في عدد محدد موقع على طلب الاستجواب وما يكون شخص واحد

يعني انا اذا بستجوب لازم اقنع عاجل ونيو وفريج سعود ودللي ان استجوابي يسوى عشان اقدر اقدمه

واظن هالكلام هم لا باس فيه وينظم الأمور نوعا ما وأنا راح أأيده لو إنه تقدم فعلا

إلى الآن 3 نقاط من اربع اظن توافقوني ان ما فيهم اي شي

نروح للرابعة

ان الحكومة يكون لها أصوات في طرح الثقة

أنا مو مع هالاقتراح ابد بالوقت الحالي طالما مافي احزاب وحزب أغلبية داخل البرلمان يقود الحكومة

لكن خنشوف

عندنا 49 نائب حاليا و16 وزير المجموع 65 نائب ووزير

طرح الثقة بالوضع الحالي يحتاج 25 نائب

مع اقتراح علي الراشد يحتاج 33 نائب يعني زيادة 8 نواب

ارد واقول الاقتراح بالوضع الحالي مرفوض برايي ومو عاجبني

لكن اذا صار في احزاب ممكن يكون تنقيح قابل للنقاش

اللي ابي اوصل له ان 4 ركائز تكلم فيهم علي الراشد 3 منهم منطقيين والرابع لأ

فصار علي الراشد خاين وعميل وبيخرب الدستور وردة عليه؟؟

شوية منطق

أدري علي الراشد تغير وأدري إن مو الأولاني وإن الأصوات اللي ياخذها اليوم ماهي نفس الأصوات اللي خذاها في سنة 2003 و 2006 وحتى 2008 بعد

لكن يا جماعة مو منطق ان نتهمه بالتخوين واهيا يايب 3 من 4

يمكن الناس ربطوها بأمور ومواقف سابقة له واشتغلت حرب الشتيمة

بس خل أقول شي

لنفرض ألحين أحمد الفهد مشى حسب الأصول بوزراة الإسكان وأنا ما أواطن أحمد الفهد أبد لأن عندي قناعة انه مخرب بالكويت

لكن اذا واحد قدم له استجواب فاضي بالإسكان

هل راح نطالب بطرح الثقة فيه؟

وهل راح نكون عقلانيين بطلبنا؟؟

هذا اللي اقوله مو دفاعا عن علي الراشد بس دفاعا عن الموضوعية شوي

والله يعين

الله يالدنيا

شوية راحة من لوية الإستجوابات عشان ترسخ بالعقول ونعرف نقراها بعد حين

بس في شي مؤرقني

المصوتين لصالح سرية إستجواب رئيس الوزراء هم كالتالي

مومهم - مو مهم - مو مهم - مو مهم

مو مهم - مو مهم - مو مهم - مو مهم

عدنان عبدالصمد

مو مهم - مو مهم - مو مهم .. إلخ

بس للتاريخ يا بو

ما دري بو منو يا سيد

بس شوف وتذّكر

خلاص لا ترحل بس لا تقعد

شيك ثاني بعد اليوم؟؟

شنو بتسوي بعد يا بوصباح؟؟

شرايك تطلع إنت وحش حولي مرة وحده؟؟


وأمس قناة الكويتي محمود حيدر الموالية لبوصباح حاطه طلال الفهد وتقول له ياللي تحب الكويت لا تقطع الآمال؟؟

وهذا موقف ناصر طبعا بما أن العدالة تبع محمود الكويتي ومحمود تبعه

على فكرة طلال رفض ان يكون اي احد يدق معارض ورفض يكون اي احد رياضي معارض وياه بالحلقة

وصارت الحلقة تلميع بمجرم بحق القانون الكويتي

اللي يمثله بوصباح مفروض، وما يرضى إن أتباعه يلمعون المجرمين

عموما ساحة الصفاة متلألأه بموضوعها مادري اذا كتبتها صح أو لأ؟

بس عندي سؤال أخير حق كل من عنده إعتقاد إن ناصر المحمد ما يستحق الرحيل

عطوني إجابة ليش يقعد؟

مع المطاوعة

سويسرا منعت المآذن مو المساجد

المآذن

وأنصار الحرية تحركوا

للتذكير

معبد سلوى
مسيد البهرة
والكنايس

عامل كما تحب أن تعامل وبلا هذرة

الإخونجية سووا كل شي عشان يطيحون الوحدة الطلابية الناتجة عن توحد القوى الوطنية في أمريكا ضد القوى الرجعية

وهم ما فاد

السنة الياية انتخاب الهيئة التنفيذية اليديدة فرع الكويت اللي تتكون من 35 عضو

يعني الأغلبية من مقاعد الهيئة التنفيذية

يا ربع الجامعة وحدوا نفسكم بالهيئة التنفيذية وتلّوا كراسيهم وتطاققوا بالكليات عليكم بالعافية

فكونا الله يخليكم من هالاشكال

تعالوا باجر

حبا في الكويت وحريتها نغلق المدونة طيلة يوم الثلاثاء

إحتجاجا على ترهيب وتهديد بعض الزملاء المدونين

عيد سعيد وسندوّن

عــيــدكــم مــبــــارك

وهذي مبادرة من بلوق عمتي أدعمها وأأيدها

ما أواطنه

نبارك للأمتين العربية والإسلامية عودة نيو بعد 82 يوم انقطاع

حسسني ان كان حايشه رباط صليبي

المهم

شنو يعني كل يوم تالّين محمد الجاسم وكل يوم تعال وادفع كفالة

صج إني ما أواطنه ولا أعترف بإنقلابه على نفسه بعد اخراجه من جريدة الوطن

لكن الحق حق

الريال يعارض رئيس الوزرا

ومثل ما أشارت الآن اللي هم ما اواطنها ان في سابقة اساءة للذات الأميرية وإكتفت النيابة بالضمان الشخصي

الحين على راي يشوفه بو صباح ان سب وقذف كفالة ألف دينار؟؟

الزبدة بالموضوع كله

إني ما أواطن احد بهالبوست الا نيو

:)

شنو يعني؟

درس تاريخي

يبدو أن الصدام عام 1961 الذي أسفر عن إنسحاب الشيخ عبدالله المبارك نتج عن حدثين منفصلين

الأول: عند زيارة الملك سعود بن عبدالعزيز من 1-8 ابريل 1961، حيث شاركت قوات الأمن التابعة للشيخ عبدالله المبارك في عرض عسكري أقيم على شرف الملك في 2 ابريل، وتم إستعراض الجيش الكويتي بكامله مع المعدات العسكرية، وكان هذا العرض في رأي السير جون ريتشموند المعتمد السياسي، مفاجأة فتحت عيني الحاكم "عبدالله السالم" والعائلة الحاكمة التي لم يسبق لها أن قدرت حجم الإنفاق العسكري للشيخ عبدالله المبارك

الثاني: تواجد بعثة من البنك الدولي للإنشاء والتعمير في الكويت من 2 مارس الى نهاية ابريل 1961 بدعوة من الحكومة لوضع توصيات مستقبلية للبنية الإقتصادية والإدارية في الكويت، ولفت هذا الحدث أيضا حجم الإنفاق المالي في دائرة الأمن العام وكذلك رفض الشيخ عبدالله المبارك إخضاع إدارته للرقابة المالية الصارمة

جاءت الخاتمة بسرعة فقد غادر عبدالله المبارك الكويت متوجها لبيروت في 17 ابريل وألغى مأدبة غداء كان يعتزم إقامتها في اليوم التالي على شرف المعتمد السياسي ووكيل الوزارة الدائم في وزارة الخارجية البريطانية

وفي 18 يونيو ظهر إعلان في جريدة الكويت اليوم بمرسوم أميري ساري المفعول من 17 يونيو 1961 يقضي بتعيين الشيخ سعد العبدالله رئيسا للشرطة والأمن العام خلفا لعبدالله المبارك ، وبذلك إنتهت حياة الشيخ عبدالله المبارك السياسية كما إنعدمت فرصه بتولي سدة الحكم

وقد أبلغ الشيخ صباح السالم أحد أعضاء الوكالة السياسية البريطانية "بسرية تامة" ماوصفه الشيخ صباح بالقصة الحقيقية لإستقالة عبدالله المبارك، وتقول رواية الشيخ صباح

إن الشيخ عبدالله المبارك قدم إستقالته فعليا إلى الحاكم " عبدالله السالم" بعد الإنتقادات التي وجهت في المجلس الأعلى "للأسرة الحاكمة" إلى نشاط الدوائر التابعة لعبدالله المبارك، كان الحاكم "عبدالله السالم" ميالا لقبول الإستقالة لكنه أرسل للمجلس الأعلى لبحث قبولها أو رفضها

ووفقا لذلك أرسل المجلس الأعلى رسالة لعبدالله المبارك يطالبه بسحب إستقالته بناءا على 10 شروط لم يكشف صباح السالم سوى 4 منها

أ- نقل تبعية محطة الإذاعة من إدارة الشيخ عبدالله المبارك إلى دائرة أخرى

ب- إخضاع المشتريات الرئيسية لجيش الكويت أو قوات الأمن لموافقة المجلس الأعلى

ج - إخضاع إدارات الشيخ عبدالله المبارك للرقابة المركزية المعتادة على الأرجح لدائرة المالية والمجلس الأعلى

د - إضفاء شيء من التحسن على سلوكه الشخصي

ورد الشيخ عبدالله المبارك على هذا الخطاب بأن موضوع الإستقالة خارج نطاق اختصاص المجلس الأعلى وإنه سيسحب إستقالته عندما يطلب منه الأمير ذلك

وكان الواضح أن عبدالله السالم لم يطلب منه ذلك قط

وقد أعاد إندلاع أزمة 1961 مع العراق الشيخ عبدالله المبارك إلى الكويت في 27 يونيو وكان من المتوقع أن يتولى قيادة الجيش لكن آماله لم تتحقق وعاد إلى بيروت في اليوم التالي
وكانت رواية المستر دايتون مارك القنصل الأمريكي تقول

أن الأمير "عبدالله السالم" دعا الشيخ عبدالله المبارك لعشاء عائلي ليلة عودته للكويت، وتفادى بمنتهى الحذر إقتراح تولي عبدالله المبارك مسؤولية الأمن العام والجيش مرة أخرى، بل أنه في الحقيقة إقترح أن مكان عبدالله المبارك المناسب كان إلى جانب زوجته الحامل في بيروت

المصدر كتاب الشيخ صباح السالم الصباح
أمير الكويت
سيرة شخصية
تأليف روبرت ل جيرمان
أشرف على الترجمة د. عبدالله بشارة
تم إنتاجه ونشره عام 2002 من قبل مركز لندن للدراسات العربية

الزبدة

أول شي الكتاب لندني بعد ما فيه مصالح

ثاني شي عبدالله المبارك هو عم كل أمراء الكويت من عبدالله السالم ليما اليوم

ثالث شي مصلحة الكويت وعدم العبث فيها بشكل أو بآخر أدوا إلى هذا العزل الذرب لعم الأمير

رابع شي عدم قبوله بإخضاع مصروفات الأمن للرقابة أدوا لكل هذا، فما بالكم لو كاسر قانون أشكره؟

فماذا نستخلص؟

حسابك بعدين

تطمش كالعادة من ناصر المحمد على عيال عمه وخرقهم للقوانين

لا ويسوي مؤتمر صحفي ولد عمه لخرق القوانين

بس حسابه بعدين

السبت مباراة المنتخب بالكويت جدام اندونيسيا

الجو حلو

والوقت حلو الساعة 6 ونص بنادي الكويت بكيفان

خنروح الملعب عيب ما نترسه

وقبل اسبوعين ترسناه حق نادي الكويت

وجمعية الخريجين مع التحالف ومجموعة كلنا كويت مسوين هم تجمع عائلي لروحة الملعب يتيمعون الساعة 4 بجمعية الخريجين ويطلعون من هناك

لهم مكان مخصص بالملعب

ومن سبق لبق

ويوم الأحد في اعتصام جدام اتحاد الكرة بالعديلية الساعة خمس للوقفة بويه ط وربعه

مو يايني قلب اذكر اسمه لأني ما راح اذكره باسلوب سنع

وتوكل يالأزرق على الله

من زمان مو مستانسين

صوت الكويت مجموعة ضغط مدنية تسعى لحماية الحقوق الشخصية والعامة عبر حماية
وتفعيل دستور دولة الكويت عبر التوعية الاعلامية والتواصل مع صانعي القرار في
المجلس و الحكومة. وقد أصدرت المجموعة العديد من الكتيبات والنشرات التي تقدم
مادة مبسطة حول الحقوق الدستورية وأهميتها وتضارب بعض القوانين مع تلك الحقوق

كما شاركت المجموعة في العديد من المعارض واللقاءات والمهرجانات لتوعية الشباب
بالدستور ومواده وأهميته في حياتنا اليومية. كما ادارت المجموعة الكثير من
الفعاليات والانشطة التوعوية والتثقيفية في المدارس والجامعات لتعريف الطلبة
والشباب بالدستور وحقوق الانسان وتشجيعهم على التطوع والعمل المدني

ومن أهم فعاليات المجموعة الاحتفال بالذكرى السنوية لتوقيع المرحوم الشيخ
عبدالله السالم على دستور 1962 والتي تصادف 11 من نوفمبر. وستقيم المجموعة هذا
العام احتفالا كبيرا في ساحة الارادة بالتعاون مع العديد من جمعيات النفع
العام
ومؤسسات المجتمع المدنية. وسيتضمن الاحتفال العديد من الأنشطة التوعوية
والترفيهية لكل أفراد الأسرة. اذ خصصنا جناح للأطفال وآخر للشعر والأدب وعرضنا
مسيرة الدستور باسلوب مشوق لكل الأعمار في جو من المرح في الهواء الطلق وعلى
أنغام الموسيقى الوطنية بقيادة فرقة بلال الشامي. لذا ندعوكم وجميع افراد
عائلتكم مشاركتنا الاحتفال بذكرى توقيع الدستور هذا العام وذلك يوم الأربعاء
11
نوفمبر في ساحة الارادة أمام مجلس الأمة الكويتي من الساعة ٥:٣٠٠ مساءً الي
الساعة ١٠ ليلا.

يقولون إن مسيرة الدستور مالتهم شي مو طبيعي
أنا بروح عشان أشوف هالشي سمعت إنهم بانين شي حق هالمناسبة ويصير مثل شربط تاريخي نمر من خلاله

وهذا إعلان ثاني بعد

تتشرف دار معرفي بدعوتكم لحضور ندوة بعنوان "الدستور... صدر ليبقى" يشارك في الندوة كل من الإستاذ أحمد ديين - الدكتور غانم النجار - الدكتور محمد المقاطع - الدكتور محمد الفيلي

يدير الندوة الإستاذ يوسف عبدالحميد الجاسم، و ذلك في يوم الثلاثاء 10 نوفمبر 2009 في تمام الساعة السابعة و النصف مساء

العنوان : دار معرفي - الدسمة - قطعة 1 - شارع الدسمة

كفو على هذا الإلتفاف حول الدستور والإحتفاء فيه

دستورنا كرامتنا

فلوسه وكيفه

بعيد عن منو طلّع الشيك

وبعيد عن سالفة ليش طلع الشيك

وهل يستحق المسلم المحاسبة ولا ما يستحق

وكل صراعات المحامين او اشاعات ان حمد وناصر ورا توريط ناصر

وسمعة برقان

والشك ب 22 نائب سابق

طلع حجي ان بما ان الشيك من حساب رئيس الوزرا الخاص خلاص لازم نطنش

طيب جمال العمر والجويهل والدبوس كانوا يدفعون من حر مالهم

يعني على مفهوم روضان الروضان ورولا دشتي تحديدا واهما عيال الدائرة الثالثة عادي خل يسوون اللي يبونه دام بفلوسهم

انزين لنفرض ان بوصباح مقدم الشيك هبة مساعدة بيعة شروة اللي يكون

ابي النائب اللي استلم ليش ما صرح ليش ما قال؟؟

اذا كان بوصباح ساعدك بشي

انت طلعه من هالبلوة اللي ممكن تنهي اخر حكوماته؟؟

عدم تصريحك يبين ان الفلوس كان لها سبب مو زين

الزبدة

عذر فلوسه وكيفه مضحك

ويا تثبتون ان الفلوس راحت لمصدر معلوم ومفهوم وما فيه ريحة فساد

او تسكتون وما تدورون عذر شلون طلع الشيك ومنو وراه واسلوب رخيص وهالكلام كله

ما يردنا شي

أول شي

مدونة يديده اسمها
healthk10

مهتمة بكل شي وتركز على الصحة والآي فون بعد حتى داز لي ايميل عن طريق الآي فون

يستاهل الزيارة والدعم

عموما خندش بالسالفة

وضعنا سيء بكل المجالات وهذا شي خالصين منه

والرياضة طبعا جزء من الوضع المتردي ومع هالتردي والمهازل التنموية اللي نعيشها

وصل فريق القادسية وصار من أفضل 4 فرق في قارة آسيا على الإطلاق قبل سنتين أظن

وبالتسعينيات كان نادي كاظمة يتألق على مستوى آسيا وما كان يرده شي إلا اذا أوقعته القرعة مع فريق عراقي ويضطر للإنسحاب

وباجر يلعب نادي الكويت على نهائي كاس الإتحاد الآسيوي البطولة الآسيوية الأكبر على مستوى الفرق غير المحترفة

تخيلوا لو رياضتنا مستقرة وماشية صح شنو ممكن نسوي

وإحنا بالهوضع فرقنا منورة آسيا ومو رادتنا هالظروف السيئة

ما بالكم لو وضعنا زين

اللعب ضد الكرامة السوري على أرضنا و المفروض بين جماهيرنا

ما أضمن النتيجة بس اللي مفروض يحصل إن ما يكونون إخوانا السوريين أكثر من الكويتيين على ملعبنا فشله وإهانة لعيال الديرة من لاعبين نادي الكويت إنهم وصلوا هالمواصيل ونخليهم يلعبون على أرضهم مثل الغُرب

اللعب يوم الثلاثاء 3-11 الساعة سبع ونص بملعب نادي الكويت بكيفان ولأن التحالف مسوين نشاط باجر بنفس الحزة تقريبا فما راح اعلن عنه وأعاتبهم بعد لأن تمثيل الكويت أهم بوايد

وتوكلوا على الله يا عيال ديرتي

يا طلال يا ولد فهد الأحمد يا بو مشعل ما تفرق اذا صرت رئيس اتحاد يتكون من 14 عضو او من 5 اعضاء بكل الأحوال انت الرئيس ومعاك الأغلبية

توكل على الله وطبق قانون ديرتك صدقني الصورة اللي فوق تطلع أحلى بوايد

وفزعتكم

تعالوا

هل تعلم؟

أن محمد.. هايف

كوجا مرحبا

عاد للرياضة لمدة ست أشهر

وتحديدا كرة القدم

بهدف اجراء انتخابات بنظام ال 14 عضو

النتيجة النهائية فوز واحد - تعادلين - خسارتين

وعدم إجراء الإنتخابات بنظام ال 14 عضو

وتزوير في أوراق رسمية

وعلى الصعيد القاري

إفتر آسيا كلها عشان يخسّر محمد بن همام

وما ظل وسام الا وقدمه للدول

والنتيجة فوز محمد بن همام طبعا
وبعد كل هالنجاحات

النتيجه هي

أعلن مجلس أمناء جائزة محمد بن راشد آل مكتوم للابداع الرياضي عن اختيار الشيخ أحمد الفهد «شخصية العام الرياضية العربية» في جوائز الدورة الاولى من الجائزة التي تعد الأعلى في العالم من حيث قيمة الجوائز الممنوحة وعدد الفئات المشمولة

جذيه الشيوخ يضبطون بعض

بس هالمهزلة المحطوطة بجريدة الوطن مو مشكلة اللي يحر صج بو الشباب هذا

وهنأ النائب حسين القلاف الشيخ أحمد الفهد بالجائزة قائلاً: يستاهل بوفهد جائزة الشيخ محمد بن راشد آل مكتوم للإبداع الرياضي

مضيفاً: «كنا نتمنى أن يكرم من قياداتنا» وزاد القلاف: «منها للأعلى أبا الفهود فالقافلة تسير ولا يصح إلا الصحيح

القافلة تسير ها؟؟

سيّد علامك

هذي انجازاته خلال عودته للرياضة تتمنى ان يكرم عليها

والله انك تفشل

على فكره

رديت تكتب بالوطن

عسى يعطونك فلوس على المقال

طيب الله انفاسك

إيميلي موجود على اليمين حق اللي يبي يتواصل

وحده عن وحده تفرق

الدائرة الوحده طبعا أفضل من الخمس

بس ها تعالوا عشان لا تاخذنا الغبطة ونقول خلاص راح نقضي على آفة الفرعية اللي فوزت نص اعضاء المجلس

ونقضي على ما تبقى من شراء الأصوات والطائفية

لازم نتفق ونعرف الآلية

أوكي دائرة وحدة بس جم صوت للناخب؟؟

وهل راح تكون قوائم أو أفراد

كل هالأمور تفرق

لا نروح وهيه وحده وحده وحده

خل نحسم الموضوع من بدري لا تتكرر مهزلة الحكومة بالخمس دوائر

المطلوب لقاء واتفاق من الحين

قبل لا تفوتنا الأحداث

وبالأخير هالبشارة من هالموقع الحلو

مو دارنا أبد

جريدة الدار

أو الوجه الآخر لجريدة الوطن

ما أحب أتكلم عنها وايد والسبب ان ما ودي اعطيها أكبر من حجمها

لكن بلغوني من يومين إنها كتبت تلخيص لموضوعي الأخير بلاش لماضه

وإن التلخيص محرف

رحت قريته

وشفت الآتي

تطرقت مدونة «بيت القرين» للحديث عن اللجنة المؤقتة للاتحاد التي شكلت اخيرا وقد خدعت «الفيفا» وأن اللجنة الحالية زورت، وخاصة بعدما أقرت قوانين رياضية في عام 2007 ومنها أن يتكون الاتحاد الرياضي من 14 عضوا على أن يكون لكل ناد عضو في مجلس إدارة الاتحاد.

خلوني صلاح حيدر بوق الوطن بالرياضة؟؟

أنا كلامي كان إفتراضي

عشان أدحض ويا كبرها من كلمة إدعاءات أندية طلال

لكن إهما خلوا كل شي وكأنهم بيضللون قراؤهم ال 15 منهم 4 مادري خمسه عيال محمود حيدر

طبعا نشركم لفقرات من التدوين ماراح يشفع لكم مواقفكم وتقسيماتكم البغيضه حق المجتمع الكويتي عند المدونين

وأبد ما راح تكونون دارنا

عموما للحديث بقية عن الدار

لكن اليوم الأربعاء وقفة للحرية والدولة المدنية تقام بمقر التحالف ويشاركون فيها نواب وجمعيات نفع عام

الساعه 7 بالنزهة

ونشوفكم على خير

بلاش لماضه

عشان نحرق الفيلم من بدايته

ولا يستمرون يدندنون عليه وايد

ب 2007 انقرت قوانين رياضية بالمجلس

منها ان يتكون الاتحاد الرياضي من 14 عضو على ان يكون لكل نادي عضو في مجلس ادارة الاتحاد

زعلوا احمد وطلال الفهد لأن هذا راح يخلي 3 اعضاء معارضين لسياساتهم الرياضية يطلعون على بلاويهم عن قرب ويمكن يحدون منها

فقرروا وبتبعية 9 اندية والقادسية عاشرهم

ان يعارضون هالقانون تحديدا

وحجتهم ان الفيفا ما راح يوافق على 14 عضو وما يصير نتعارض مع الفيفا لأن الفيفا اهم من القانون الكويتي

المهم المطالبين بتطبيق القانون كانوا يقولون لهم وببساطة

انتوا يا اندية طلال واحمد وافقوا على قانون الدولة واذا الفيفا ما رضى نعدل القوانين

قالوا لا مانوافق لأن الفيفا ما راح يرضى

يقولون لهم وافقوا

يقولون لأ ما نوافق

المهم شصار عاد

أول ما مسك واحد مو محسوب عليهم حاليا اللجنة المؤقتة للإتحاد

وبعد 3 اشهر من تعيينه وافقوا الفيفا على 14 عضو بالاتحاد

يعني مثل ما نص القانون الكويتي

طبعا اندقروا

ومن خلال جريدة خليف

نزّلوا ان الفيفا وافق لأن اللجنة المؤقتة قصّت عليهم وقالت لهم ان كل الأندية موافقين

وهذا تزوير وما يصير ولا يجوز

طبعا من باب العلم بالشيء

أحمد الفهد لما مسك اللجنة المؤقتة قبل احمد اليوسف اللي ماسكها حاليا

يمّع الأندية بديوانية تشاورية ودز كتاب من ورا هالاندية ان هذا كان اجتماع جمعية عمومية!!؟؟

بس تزوير بو فهد يجوز حق الوطن

المهم مو هذا موضوعنا

موضوعنا اني بوافق الوطن للمرة الأولى وأقول اي اللجنة المؤقتة الحالية خدعت الفيفا

واللجنة الحالية زورت

بس تعالوا

الفيفا طلع يوافق على ال 14 عضو وعلى القانون الكويتي اذا اندية الكويت وافقت على القانون الكويتي

يعني حجة ان محنا موافقين لأن الفيفا ما راح يوافقون باطلة ومو صحيحة وعلقتونا من 2007 بسبتها وطلعت عالطل

يعني يا وطن الإسم مو الواقع طبعا

الفيفا اعلنها صراحة احترموا دولتكم نسوي لكم اللي تبون

هذا البوست ننشره من الصبح عشان لا تستمرون بفيلمكم الماصخ

ويالله عاد بلاش لماضه

عمّك وأميرنا

هذي دعوة طلبت أم العيال إن ننشرها وإهيا طبعا تستاهل

أعتذر إني ما قدرت أكمل توقف عن الكتابة لحين القبض على المعتدي على زايد الزيد

بس اللي شفته اليوم إستفزني لدرجة أظن فيها إن الكتابة إهيا أمر أهم من التوقف

الدستور يقول في مادته رقم 55 إن الأمير يتولى سلطاته بواسطة وزرائه

والأمير في كلمته الأخيرة برمضان قال ماراح يسمح لأحد بالعبث بنسيجنا الوطني

ونسيجنا الوطني يتكون من سنة وشيعة وبدو وحضر ونساء ورجال

وهم قال إنه يتألم من التصنيفات

وهم قال إن الاعلام مو لازم يكون وسيلة لبث الفتن

وبما إن الأمير يمارس صلاحياته من خلال وزراءه ورئيس وزراءه إهوا ناصر المحمد

إذا لازم ناصر المحمد يستخدم وسائله القانونية لوقف العبث بالنسيج الوطني

ومحاربة التصنيفات الطائفية ووأد وسائل الفتنة الإعلامية

خبر مثل هذا بالصفحة الأولى

خنفكر فيه شوي

مع عدم إعترافي بحزب الله كتيار محترم لأني ما أؤمن أساسا بتيارات الإسلام المسيسة

شنو يفيد المتلقي

رضينا او ما رضينا حزب الله يعتبر حزب شيعي يكسب تعاطف الشيعة قبل السنة في شتى انحاء العالم الاسلامي

انزين

انا الحين شفت الخبر وسنية المذهب شنو مفروض اسوي

ماني جهة عسكرية أو أمنية اقدر احارب مد حزب الله في الكويت

كل اللي راح يصير للمتلقي العادي من المذهب الآخر اهوا إستعداء الشيعة لإعتقاده إن حزب الله شيعي اذا كل الشيعة يحبونه

وهذا راح يعبث بنسيجنا الوطني ويؤلم الأمير اللي يتولى سلطاته من خلال وزرائه ويثبت إن بعض الوسائل الإعلامية تبث الفتن

الحين نكلم رئيس الوزراء

يا شيخ ناصر عمّك الأمير قالها صراحة وإنت مسؤول عن سلطات الأمير

شبتسوي الحين؟

بتمشي مثل عيال عمك المندقرين حاليا بالرياضة ومعارضين قوانين موقع عليها الأمير أشكره؟

أو إنك بتشممنا ريحة أمل وتتصرف وفق المسالك القانونية لإيقاف مهزلة عيال عمك الثانين خليف وإبوه؟؟

أو بتوقع لنا إتفاقية تعاون مع سيشل؟

دورنا وسويناه وقاعدين نبين لك اللي حاصل

وبقى دورك

وقفة مو عشان زايد

أختلف معاه ومع جريدته الإلكترونية وسياستها التعبانه

لكن يا خوفي إن اللي حصل له البارح إهوا نتيجة لمواقفه السياسية

لأن هذا بيعيّش وايد ناس بخوف من التصريح برايهم

والاعلان عنه

عموما رئيس الوزرا حالف 13 مرة ان يصيد الجاني

وانا راح اوقف كتابة لحين ما يصيدون الأثول

حتى لو كان هدف الجاني البوق مو رفض آراء الزيد

صيدوه بسرعة عشان لا تستغل حادثة الإعتداء وتروح لأبعاد أخرى

وإحنا الله خير أسرع ناس بالظن والحكم على الأفعال بدون أدلة

هذي سالفة؟؟؟

تحرشات

تفضيل الأجنبي على الكويتي في وظيفة أولى فيها أصحاب الإختصاص من أهل الكويت

تطنيش من نواب يفترض إنهم يحامون عن الشعب كله

مكتب وزير ما يسمح للمتظلمة بمقابلة الوزير بدون واسطة

لا بارك الله في ناس تسببوا بأذى كفاءة كويتية

التفاصيل عند سرحان

بوصلاح

هذا إعلان ندوة التدوين في الكويت عشان لا يطقنا مطقوق

نطلع بره السياسة شوي اليوم

ونتكلم عن شخصية برايي ماخذت حقها بالتقدير مثل ما خذوه البقية من الرواد

بكل عمل فني ناجح

لا بد ان دوره يكون له ثقل وسبب رئيسي في النجاح

في علي جناح التبريزي نشوفه اجاد في دور التابع قفّه

في باي باي لندن ما حلت المسرحية الا بوجود نهاش فتى الجبل

في الغرباء تألق بدوره لدرجة صار المسلسل يتسمى باسمه كامل الاوصاف

في فرسان المناخ قدم جو جميل بشخصية حمدي

وبخالتي قماشه وخرج ولم يعد وابوالفلوس


وبعد انحدار الفن بالكويت تأثر بهالانحدار حاله حال غيره سعد الفرج يمثل بسخافات المسلم ونايف الراشد

عبدالحسين يمثل بمسلسل مليق ومسرحيات من تأليف فجر

والحال ينطبق على غيرههم

وبوصلاح مثلهم انجرف بهالتيار

لكن كل الاعمال اللي تركت بصمة في زمن الانحدار كان له دور فيها

زمان الاسكافي الطير والعاصفة الخراز صواري الليل وأخيرا أم البنات

فنان بمعنى الكلمة

وحرام جدا ان لما نتذكر الكبار من امثال خالد وسعد وعبدالحسين ما نتذكر اسمه

بوصلاح غانم الصالح شكرا على فنك

يعني مو حرام ؟

سؤال

كل عام وإنتوا بخير

ويبقى سؤال

متى الشيعة يعيدون قبل السنة بالكويت؟؟

:)

الذكرى التاسعه عشر

هو مبارك فالح النوت

شهيد الكويت

اسمه انتشر في دواووين الاثنين وانتصر للدستور

وفي الاحتلال الغاشم رفض انزال صورة المغفور له الشيخ جابر الاحمد

واعدم امام الجميع بجمعية العارضية بتاريخ 12-9-1990

ادعوله بالمغفرة والله يسكنه بفسيح جناته

الرسالة مثل ما وصلتني بالايميل

إن هذا اليوم

في نفس التاريخ

ونفس الموعد

ونفس اليوم

يوم 9-9-2009

إفتتاح مترو دبي

وإنتقال بوصباح لبرشلونه

وتتوالى الإنجازات

أصف مع منو؟

هذا موقع كويتي شبابي يديد يستاهل الدعم والتشجيع

وزارة التربية والتعليم العالي فتحت باب الدكاكين الجامعية وصار عندنا آلاف الشباب اللي راحوا عشان يشترون الشهادات خصوصا بآخر ثلاث او اربع سنين

بمعنى ان عندنا مهندس ماهو مهندس وطبيب ماهو طبيب ومحاسب ماهو محاسب وغيرهم

وهذي مصيبة بحق الكويت

بعض نواب المجلس بعد هالمصيبة حمروا العين على الوزارة فقررت الوزارة وقف الاعتراف بالكثير من الدكاكين لكن النواب مو راضين ان يحاسبون المتسبب او المتسببه بالاصح لا والله الصح اهو المتسبب
وهم مو راضين ياخذون اجراء رادع ويسوى

بمعنى

الايام اليايه راح تقدم لنا آلاف الخريجين من الدكاكين التعليمية واحنا ندري انها دكاكين وندري ان الطلبة اصلا ماكانوا يدرسون ولا يسافرون الا مرة بالشهر او بالكورس
لكن لأن قبولهم قديم راح نسمح لهم بإستخدام شهاداتهم

وطبعا النواب ما راح يوقفون هالمهزلة

انزين

وباء انفلونزا الخنازير وعدم قدرة وزارة الصحة بالتعامل معاه لقصور في الإمكانيات على مر السنين تتوج اليوم بهالوباء اللي قاعد تزيد اعداد ضحاياه ما بيناتنا

النواب يفترض انهم يعني حمروا العين فطالبوا بوقف المدارس وصدقوني اذا وقفوا المدارس راح يطالبون باجتياز الطلبة للمرحلة الدراسية حتى لو ما درسوا بحجة عدم تأخير مستقبلهم
وبنفس الوقت محد تكلم عن ال70 الف اللي راح يصلون الجيام الاسبوع الياي بالمسيد الكبير مثل ما قالوا ربعنا بموقع الأمة

لأن يخافون يقولون شي فيعتبر ضد الاسلام والمسلمين
وهم ما راح يطالبون بوقف الحج والعمرة هالسنة واللي راح يخلي حجاجنا يختلطون بملايين من كل العالم وممكن جدا ينشرون الوباء بيناتنا بشكل اكبر من اللي حاصل؟

وزارة الأشغال ومأساة البيئة والتلوث في مشرف مع ان المحطة اللي سببت المشكلة اهيا محطة حديثة واذا ما خاب ظني ان في 2001 او 2002 يمكن، اهل مشرف سووا مظاهرة واعتصام بسبة انشاء هالمحطة ومحد عبرهم طبعا واليوم نعيش مأساة تقتل بحرنا كل يوم

النواب كان موقفهم المطالبة باستقالة الوزير

على الرغم من ان قرار انشاء المحطة وتفاصيلها كلها كانت بفترة حياة مجلس الامة وتحت عينهم ورقابتهم

لكن كل هذا ما فاد ونطروا الكارثة تصير عشان يطالبون براس الوزير

الزبدة

الحكومة ما عندها مؤسسات تعليمية تستوعب عدد شبابنا اللي يبي شهادات عليا
ولا عندها مستشفيات تتحمل ابسط الكوارث الصحية مثل مأساة الجهرا وانفلونزا الخنازير
ولا عندها حتى محطات صرف صحي صالحة

وطبعا ما عندها اشياء وايد زود

وبالمقابل من 92 الى 2009 يعني 17 سنة كان عندنا سلطة رقابية تشريعية دون توقف غير دستوري

وما سوت شي لوقف نتايج اليوم

ابي طرف زين اصف وياه

في أحد؟

عبدالله لا يمنعنونك

حديث البلاك بيري وبقية وسائل التكنولوجيا المحرمة شرعا كالايميل والفيسبوك وغيرها في الكويت

إهوا عبدالله مال دعاية فيفا



ما ظلت نكته الا وطلعت على هالعبدالله

وتحول الاعلان من اعلان فاشل الى اكثر الاعلانات انتشارا بالكويت برمضان

وفزورة رمضان صارت

هل سيمنع عبدالله من دخول الملعب؟

عبدالله ودي اسولف وياك شوي

عبدالله ..تدري ان ديرتك قاعده تتلاشى

مافيها كهربا ولا فيها ماي وحتى حمامك وانت والحاضرين بكرامه راح يذبح بحرك؟؟

العبد تدري ان وزارة داخليتك المعنية بالأمن والشؤون الداخلية ما تقدر تطلع ابسط معلومة اذا نواب الأمة عندهم جنسيتين او لأ؟؟

عبدالله... تدري إنك إنت ويمكن أبوك بعد ينطر 20 سنة عشان يطلع له بيت وآخرتها البيت يبعد عن مدرستك ساعه كامله بالسيارة مع ان إحنا ما نسكن الا ب 6% من أراضي الدولة؟؟

بوعابد... قالولك إن طيارة ديرتك اللي صار لها اكثر من 50 سنة بالجو ما عندها الا 16 طيارة ويمكن الصاحيين منهم 5 بس

عبّادي... جامعة الكويت اللي ان شاء الله تكبر وتبي تروح لها ما عندها مبنى واحد يجمع كلياتها مع ان الجامعة موجودة من 1966 يعني القرن اللي طاف اللي يمكن انت ما عشت فيه؟

عبّود... تدري إن لو في مسيحي أو بوذي يخدم الكويت ويعطيها كل عمره وحياته مستحيل يعطونه جنسية لأنه مو مسلم؟؟

عبدالله حبيبي ... تدري ان الكويت إهي إحدى أخوات كان

العبد .. تدري ان كل يوم يدش ديرتك اكثر من 100 مليون دولار نتيجة بيع النفط، وتدري ان احنا من نهاية السبعينيات واحنا ما نشوف حق هالملايين اي اثر؟

عبدالله تدري ان الكويت مافيها مستشفيات تكفينا ولا مسارح تسلينا ولا ملاعب ترضينا؟؟

عبّادي.. تدري ان اكبر خلافتنا بالكويت اهيا عن موضوع مخلص قبل 1400 سنة؟

عبدالله اذا كنت شيعي حبيبي اياني واياك تحب سنية ما راح يخلونك تتزوجها واذا كنت بدوي ايناي واياك تحب حضرية واذا كنت اصيل هم اياني واياك تحب بيسيرية ترى سعدون حماد ما يرضى

عبود.. اذا شفت كويتيين ما يوقفون حق علم ديرتك لا تستغرب حبيبي هذا شي عادي

عبدالله.. تدري ان هالمشاكل بديرة شعبها ما يعدون المليون ونص

صج والله لا تضحك مو نكته

عبدالله اذا كنت بتروح عند عيال خالتك تلعب وياهم بعد الفطور

إطلع من قبل الفطور ولا ما راح توصل

عبدالله تدري شلون اشرط على فيفا خل يعطونك مبلغ محترم وايد ولا لا تكمل الاعلان لأن هالشي الوحيد اللي بيفيدك

اي صج عبدالله تدري ان عندنا جريدة اسمها الوطن تتكلم باسم الوطن والناس مصدقتها

خلاص عبّادي حبيبي بس حبيت ارسم لك شويه من ديرتك اليوم

تكفه عبدالله لا يمنعونك دش ملعبنا وغير نتايجنا

والله يخاف

ما أتابع سكوب

ولا أعتقد إنها وسيلة إعلامية محترمه من الاساس

ومستحيل ان تكون فجر السعيد مصدر الهام سياسي او حتى اجتماعي بالنسبة لي

ولا شفت الا شوية لقطات من مسلسل صوتك وصل

تقليد واضح لشخصيات عامة

اعضاء مجلس امة ووزراء

واقصد بالتقليد اهوا الاشارة لهم بتصوير اشكالهم واسلوب كلامهم وغيره

وطبعا هذا مافيه اي شي

ولا جان داود حسين انمنع من ايام فقرة عيدكم مبارك اللي قبل الغزو وبعدين فضائيات وغنائيات وداوديات وقرقيعان

خلصنا من سالفة التقليد وانها اكيد مافيها شي ولا تسوى توقف مسلسل

وارد واقول اني ما شفته

بس يمكن صار في اساءة للشخصيات العامة اللي قلدوها

وهني هم نرجع حق البلام اللي قلّد جواد العلي و عبدالناصر اللي قلد منيرة عاشور

وجواد ومنيرة شافوا ان في اساءة لهم

لكن على الرغم من هذا

وعلى الرغم من ان منيرة بنت وزارة الاعلام وتمت الاساءة لها لكن وزارة الاعلام ما تجرأت ووقفت عرض ذاك البرنامج اللي تعرض لها

انزين يعني لا التقليد يسوى يتوقف البرنامج ولا الاساءة ينفع ان تروح بمنحى الايقاف كبديل عن القضاء

انزين ليش صدر مثل هالقرار اللي يفشل عيل

باختصار لأنه يخاف وما يبي احد من النواب ما عجبه التقليد يهدده باستجواب

لا قانون لا حريات لا عماة عين

كل شي ينداس لأنه يخاف

يا صاحب السمو

يا صاحب السمو لدينا جرعة دينية زائدة

أول مرة

نلتقي مجددا مع التشريب والفيمتو

الشيين اللي يجمعون هايف والقلاف

:)

أول مرة صمت نص ونص يعني ليما اذان الظهر كان عمري تسع سنين

وأول مرة صجية مع قليل من الايام اللي افطر فيها كان عمري 11

منو يتحدى؟؟

بس بدون تشلخ

مبارك عليكم الشهر

قولوا رايكم

تقدمت ..... ونواب ببعض المقترحات على قانون حماية حقوق الموظفين المواطنين في القطاع الخاص، وقانون العمل الأهلي لطرحه في جلسة مجلس الأمة غداً

مادة أولى

تلتزم الدولة بصرف رواتب وحقوق الموظفين الكويتيين الذين أنهيت خدماتهم من قبل البنوك وقطاعات النشاط الاقتصادي المحلي المنتج وشركات الاستثمار المخاطبة بالمرسوم بالقانون رقم 2 لسنة 2009 بشأن تعزيز الاستقرار المالي في الدولة - ولو كان انتهاء الخدمة قد تم بالاستقالة - وذلك اعتباراً من تاريخ انهاء خدمة كل منهم أو استقالته. وتستمر الدولة في صرف الراتب الشهري لكل منهم بالقدر الذي كان عليه وقت انهاء خدمته أو استقالته من الجهة التي كان يعمل بها المشار اليها في الفقرة السابقة الى أن يعودوا جميعهم الى وظائفهم، أو الى أن يلحقوا بوظائف تتناسب وتخصصاتهم في الجهات الحكومية مع احتفاظهم برواتبهم من دون تخفيض.

ماني قايله منو متقدم ولاني قايله وين منشور الخبر

أبي بتجرد هل هذا اقتراح موضوعي؟
هل هذا الإقتراح يتواءم مع للأموال العامة حرمة؟

بس رايكم

لا تدورون منو مقدم الاقتراح ولا منو معاه وضده

بس رايكم لو سمحتوا

حداد

نتوقف عن الكتابه لمدة ثلاثة أيام حدادا

ويرجى العلم إن بنك الدم بحاجة ماسة للدماء لإنقاذ ضحايا الكارثة

طبعا

هذي صورة إعلان إنتخابي بالثمانينيات أظنه حق مجلس الأمة لأن القادسية والمنصورية كانوا دائرة وحده

ماني فاهمه ليش المرشح كان مصور بصالة بيتهم؟؟

وليش لابس لبس عسكري؟؟

وشنهو القوطي الأحمر اللي شايله؟؟

عالعموم وصلت رسالة قذره حق النائبه معصومة المبارك فيها كل ريحة الطائفية والنتانه

يعني جد أحس الرسالة فيها ريحه خايسه

وطبعا ماهي غريبه السالفة لسبب

فالفتنة الطائفية اللي أبطالها وسائل الإعلام الكويتي وعلى راسهم اكثر جريدة إنتشارا بالكويت الوطن

وأقبح جريدة يديدة الدار

وطبعا هذي ماراح تكون آخر رسالة سواء لنائب أو شخصية عامة

يعني باجر راح يحوش هايف والمطير والسلطان والحربش هالنوعية من الرسايل

وعادي عادي نشوف أسيل اللي حاشها طشّار من رسالة معصومة وغيرهم بيحوشهم بعد

والسبب طبعا هالرسالة

رئيس الوزراء بالإنابة يوم الأربعاء اللي طاف داز حق القبس يشكرهم على عدم نشر تصريحات او مقالات فيها تحريض طائفي؟؟

وهذا اعتراف صريح من رئيس السلطة التنفيذية ان في عندنا بالديرة تناحر طائفي

ومع هذا الحكومة تتفرج وتشكر اللي ما ينشر؟؟؟

يعني حكومة بهذا الضعف اللي يخليها تشكر من لا ينشر

بدون معاقبة من ينشر شنو نتريا من اكثر من مليون كويتي يقرون يوميا جرايد التناحر ويشوفون وسائلهم الإعلامية المرئية؟؟

طبعا راح نلاقي الناس مشحونة غصب طيب بسبّة اللي يشوفونه ويقرونه

بدال كتب الشكر عاقبوا المتسبب

ما تقدرون تعاقبونه وقفوا على الأقل أخباركم عنه خل تصير جرايدهم تتكلم عن برامج فنون وتلفزيون الوطن وقناة العدالة

مو كتاب شكر ؟؟

على فكرة ترى الديرة بسباق بين الحرب السنية الشيعية والحرب البدوية الحضرية

واحنا ما علينا الا ان ننطر من يوصل للذروة قبل

الله يستر

وااااايد

من يوم اليمعه وأنا مقرره انزل بوست

وكنت افكر عن شنو

قلت اكتب عن حرب المهري ومن وراه محمود حيدر اللي صار يتكلم باسم الكويت

ضد السلف هايف ومجلة الفرقان

وشنو المهزلة اللي قاعده تصير وكل واحد يفتي عن ناس ماتوا من مئات السنين

وشلون الناس قاعده تتعسكر ورا هالطائفية

زمن اللي صار من يتكلم عن الكويت وشأنها الداخلي واحد مثل محمود حيدر

اللي كان عنوان جريدته الدار ايام الانتخابات وبكل وقاحة

نبيها عشره

وطبعا يقصد 10 نواب من الشيعة

بعدين قلت لا خل اتكلم عن موضوع هلال الساير والهجوم اللي صاير عليه من النواب وماكو نائب حقاني عادل يدافع عنه؟

وقلت هم لأ في مشكلة أكبر واهيا عدم رد وزير الداخلية على السؤال المتعلق برد النيابة

وكأنه يأكد استغفال النواب اولا والشعب كله ثانيا طول هالمدة

وهم قلت لا خنشوف سالفة جلسة المسرحين اللي يبون يحثونهم على الكسل اكثر من العمل

بدال لا يأهلونهم يقعدونهم

وقلت هم لأ خل اكتب عن هالخبر

ولفت إلى أن الوزارة ستدفع لتعديل اللائحة التفسيرية لقانون المطبوعات والنشر في الجزء المتعلق بالمادة 19 من القانون الذي نص على حظر نشر كل ما من شأنه المساس بالذات الإلهية أو الأنبياء أو بالصحابة أو آل البيت أو أصول العقيدة الإسلامية، بالطعن أو السخرية أو التجريح بالكتابة أو الرسم أو الصور أو بأي وسيلة من وسائل التعبير، مشيراً إلى ان اللائحة التفسيرية فسرت الصحابة «بالصحابة الأخيار» وهو معنى فضفاض، ولم يحدد ما إن كان هؤلاء الصحابة الذين لا يجوز تعرض اليهم بالإساءة هل هم من العشرة المبشرين بالجنة، أم محددين في الأحاديث النبوية الأخرى، مما دفع بالكثير من القضاة إلى تجنب هذه المادة، وساهم في إشعال نار الفتنة الطائفية في البلاد، وأن الوزارة تنوي تعديله ليضم جميع الصحابة، والتشديد على عقوبة من يسيء اليهم، فضلاً عن وجود فكرة لتجريم إشعال الفتن الطائفية وطرحها في الصحف

قال ابن حجر في مقدمة الاصابة ، الفصل الاول في تعريف الصحابي : " الصحابي من لقي النبي صلى الله عليه وآله مؤمنا به ومات على الاسلام ، فيدخل في من لقيه من طالت مجالسته له أو قصرت ، ومن روى عنه أو لم يرو ، ومن غزا معه أو لم يغز ومن رآه رؤية ولو لم يجالسه ومن لم يره لعارض كالعمى

يعني ما يصير احد يتكلم عن اي احد؟؟

وكأن صحابي معناته ما يغلط؟؟

وطبعا هذا معناه ان اي مؤرخ او باحث بالتاريخ الاسلامي اذا كتب ان مجموعة صحابة غلطوا يتعاقب؟؟؟؟

بعدين شفت جريدة الفتنة لإلكترونية الآن اللي بس واحد يكتب كلمة شيعة او سنة الا وحطوا مقالته وتغنوا فيها

الخبر يقول على لسان سفيرنا بالامم المتحده

اكد ان الكويت قامت بمساندة العراق سياسيا في المحافل الاقليمية والدولية اضافة الى مساندته اقتصاديا اذ انفقت حوالي 60 مليار دولار لاعادة اعماره

دافعين 60 مليار واحنا الكهرباء اول امس طافية بكل مكان؟؟؟

لا تصرح عشان لا نحقد اكثر

رايح قايل حق كل العالم ؟؟

بعدين بطلت ايميلي ولا واصلني هالموضوع

بنبي منطقة وندمر ثروة بيئية

مو مثل ما انتوا عارفين ماكو اراضي بالديرة ؟؟

آخر موضوع فكرت فيه اهوا موضوع وزير الشؤون ومهزلة الرياضة

شكّل الوزير لجنة تشوف اذا في تعارض بين قوانين الدولة وقوانين المنظمات العالمية

يات اللجنة وقالت ماكو اي تعارض

جان يتوهق لأنه هاللجنة مفروض تبع بوقفل

لكن هم قالت ماكو تعارض والحين الكويت ناطره بوقفل يرجع عشان يخربها زود

باختصار المشاكل وايد وانحكرت فقررت اسمع هالأغنية وما أكتب شي

شصاير بقطر؟

شهالإعلام اللي عندنا

يكتبون عن مشاكل بالعراق وبايران وبالسودان وبالصومال وباميركا الجنوبية وبافغانستان

وقطر حسب ما وصلني في حالة تمرد عسكري من ست ايام واحنا اللي بينا وبينهم ساعة بالطيارة لا حس ولا خبر

اللي عنده معلومات خل يفيدنا

دام جذيه عيل علي عبدالستار

عالية

اللي يلاقي نفسه بالاغنية خل يقول

ليش؟

صار لك اكثر من 20 سنة بلوك واحد

ليش التغيير؟؟

أتمنى تغيّر جلدتك مرة وحده

مو عيال عمّه.. إهوا

من بعد السنة الثانية من توليه للوزراة وأنا غاسلة إيدي منه

ومثل ما يقول الوشيحي بأحد مقابلاته

ناصر المحمد كرجل وأخلاق يستحق تزوجه بنتك

وفي الإدارة تطلقه منها

فعلا هذا افضل توصيف لرئيس الوزرا

واللي قاعد نشوفه منه

ولأني أشوف إن معركة الرياضة اللي صار لها ثلاث سنين الا..وليما الحين ما انصلحت ولا راح تتصلح

ماهي غلطة لا أحمد الفهد ولا طلال الفهد ولا عذبي الفهد ولا ضاري الفهد ولا خالد الفهد وطبعا ماهي غلطة سعود بوحمد

هذي مصيبة يديرها ناصر المحمد المستريح في ربوع جنيف حاليا

تخبطاته وااااايد بشكل غير مقبول ولا يدش العقل ان هذا رئيس سلطة تنفيذية وآخرها اليوم


لعدم اكتمال النصاب وغياب الوزراء
الكويت بلا اجتماعات لمجلس وزرائها

خل اذكركم بشغلة بس قبل لا أسترسل ماشالله علي

تذكرون محمد السنعوسي



محمد السنعوسي وزير للإعلام وأتوقع إن صاحب أقصر وزراة اعلام بتاريخ الكويت

وطبعا اهوا اعلامي معروف قبل الوزارة

وتاجر معروف ايضا

وأشهر مشاريعه الكويتية اهوا شوبيز

وعلى الرغم من دخوله الوزارة ووجوده كجزء من السلطة التنفيذية

الا انه تم سحب مشروع شوبيز منه بحكم مخالفته للقوانين والإجراءات

مو إلا السنعوسي

ناصر المحمد بنفسه وقضية مصروفاته

سوى لجنة وحول المصروفات لديوان المحاسبة وحولها للنيابة ومستعد يمشي وراها لي أبعد مدى بحجة تطبيق القانون

الحين ابي افهم شمعنى الرياضة اللي مو قادر تحول مجرمينها وتاخذ حقوقنا منهم؟؟

عيال عمك الصغار مخوفينك؟؟

وبشنو قاعدين يخوفونك خنعرف يمكن احنا نخاف بعد؟

اربع وزرا للشؤون ما قدروا يسوون لهم شي هذا امر مو منطقي الا اذا كان باوامر منك

مالها حل ثاني أبد

لحّد يقول أحمد الفهد كان مخرّع الوزرا لأن الوزارة الوحيدة اللي دشها بوفهد وكان في عندنا أزمة رياضة اهيا هالوزارة

يعني صباح الخالد وبدر الدويلة وجمال الشهاب كلهم موجودين بدون وجود بوفهد بالوزارة

وهذا اللي يخليني على يقين بأن المشكلة مو بو فهد واخوانه

المشكلة برئيس الوزرا

انزين لنفرض احنا كلنا ما عندنا سالفه واللي يعارضون قوانين الرياضة اهما اللي صح

انزين اتبع وياهم الإجراءات القانونية وبس مانبي اكثر

شوف اليوم فضيحتهم اليديدة

ولله درك يا جاسم أشكناني ياللي دمك احترق 3 سنين من دون نتيجة

عصابة التكتل دازين كتاب للفيفا مع ان الفيفا قايلين لهم قبل اسبوعين لا تدزون شي الا من خلال اللجنة الانتقالية

المهم دازين كتاب يقولون فيه اي تعديل على النظام الاساسي للاتحاد ما راح نقبل فيه ونرفضه

يعني اشكره وبتواقيعهم واسماؤهم الكتاب موجود

بعد الاجرام بحق القانون شلون قايل

بدال الفرارة بأفريقيا ونيل الأوسمة

سو لهم مثل ما سويت بشوبيز مو أكثر

آخر شي

دان الفنان محمد الصيرفي التصرف اللامسؤول الذي قام به أحد الأشخاص، وتسريب مقطع من إحدى حلقات برنامج «الاسنصيد» المزمع تقديمه في رمضان المقبل ونشره على الـ «يوتيوب»، مؤكدا أن المقطع المنشور عبارة عن بروفة لإحدى الحلقات التي ستبث في شهر رمضان

مقطع من برنامجه يقول فيه حق ضيفة البرنامج صارخي الحين وابي دموع
وبعدين يقول بروفة
أول مرة أشوف كاميرا خفية يسوون لها بروفه مع الضيف

شهالإستهبال بعد؟


وهذي اهداء لنيو

أنا مدونة ناشئة

مدونة إستكانة مدونة كويتية تستحق الدعم في جائزة هديل

لماذا كان هذا القصف العنيف على صالح الملا وعادل الصرعاوي وعلي الراشد ومرزوق الغانم وعبد الرحمن العنجري.. وهم من هم؟ هذا ما شغل بالي طوال الاسابيع الماضية وانا ألاحظ واحصي الحملة المسعورة في الصحف وفي المدونات «الناشئة» ضد القوى الوطنية. بالمناسبة المدونات التقليدية او مدونات نبيها خمس بالكاد تناولت موضوع الاستجواب بشكل عام

هذي العبارة الأكثر ضجة في عالم التدوين الكويتي آخر يومين وإهيا طبعا جزء من مقالة لعبداللطيف الدعيج في القبس يوم الأربعاء اللي طاف

بو راكان يقول ويعتقد بأن حملة المدونين ضد كل من وقف مع الوزير كان الباعث لها الاغتيال السياسي للنواب المتصدين لعبث عيال الشهيد الوحيد بالرياضة

وايضا قسّم المدونين بالتقليديين واهما مدونات نبيها خمس ومدونات ناشئة واهما بناءا عليه مدونات ما بعد نبيها خمس

بناء على كلامه فأنا أعتبر مدونة ناشئة بحكم اني للأسف ما كنت مع مدونين نبيها خمس وما ساهمت بالتغيير بواسطة التدوين بذيك الفترة

وبما اني مدونة ناشئة بنظر بوراكان فبتكلم من هذا المنطلق

اول شي تاريخ بدء التدوين ما اعتقد له علاقة يا بوراكان بالانتماء وحب الوطن واتخاذ المواقف

يعني ممكن يكون عندنا مدونات قديمة لكن مخرفة وممكن يكون عندنا مدونات يديدة لكن راقية وعندها راي مبني على اساس يحترم ولو اختلفنا معاه

وهذا الأمر طبعا ينطبق على كل المجالات مو بس التدوين يعني حتى الكتاب والسياسيين ممكن يصنفون بهالطريقة

ثاي شي انت قلت ان هذي الحملة المسعورة من المدونين سببها التغطية على فضايح الحكومة بملف الرياضة

وانا اقول لك ممكن جدا يكون في حملة مسعورة دافعها اللي انت تفضلت فيه

لكن ماهي بعالم التدوين او على الأقل بعالم التدوين اللي اعرفه ويعرفونه اللي حواليني

يعني خل اضرب لك امثلة

مستحيل فريج سعود يكون جزء من الحملة المسعورة هذا برايي ومستحيل موقع الأمة يكون جذيه ومستحيل ان الحلم الجميل يكون جذيه ومستحيل وجهة نظر تكون جذيه ومستحيل ان الدستور وسرحان و حاكي عقالي وانتر كويت وبلوق عمتي يكونون جذيه يا بو راكان

نص اللي ذكرتهم اختلف وياهم وايد

لكن انا على يقين انهم ما ينقادون من عيال الشهيد او غير عيال الشهيد لتوجيه الناس لقضايا واغتيال النواب سياسيا وافقادهم لمصداقيتهم

المدونين الناشئين او حتى التقليديين على قولتك دوم لهم مواقفهم

يبقى تعجبنا أو ما تعجبنا هذا شي ثاني

لكن نقطهم بحظرة الخيانة والإنتماء لقوى الفساد هذا كلام مغلوط وابدا ماهو مقبول خصوصا من قلم مثل قلمك طالما وقف مع المدونين بل واستقى بعض كتاباته منهم

انت تعتقد ان هجوم المدونين على صالح واسيل والعنجري تحديدا اكثر من غيرهم فهذا باعتقاد اللي انتقدهم مو تقصّد مثل ما انت تعتقد

بل من باب الصدمة من موقفهم

ارد واقول لك ممكن يكونون غلطانين يمكن يكونون مبالغين

لكن مو خاينين للديرة وهذا شي اكيد

خانك التعبير جدا يا بوراكان وضيعت البوصلة هذا اكيد

هذا جانب لك انت خصوصا يا بو راكان

اما الجانب الثاني فإهوا للمدونين

خنوديهم لهالفرضية

كل يوم اكو ناس يدّد يدشون المدونات يقرونها ويمكن مع الوقت يسوون مدوناتهم الخاصة

من يوم الاربعاء ليما اليوم ووايد مدونين من اللي ما عجبهم كلام الدعيج كتبوا عن مقالته يعبرون عن استياؤهم كل واحد وطريقته

واللي ما كتبوا علقوا عن اللي كاتبين

وهذا أمر طبيعي

لكن الموطبيعي

ان الرد على الدعيج يكون بالسب انا ماني ذاكره الا شكل واحد من اشكال السب من مدونة أقدرها وايد

فريج سعود يقول له تبا لك بالانجليزي

طبعا الغالبية فهمت المعنى

انا اشير حق سعود لان ادري اني ما راح انسب منه لما انتقد كتابته وطبعا مو شخصه

وفي غير سعود وايد تمادوا جدا بالسب

تقدرون تاخذون جولة وتعرفون بروحكم شقصد

شغالين الربع تسفل بالدعيج؟؟

واللي مو مسفل يتشكر من اللي كاتب موضوع يسب فيه الدعيج؟؟

معقولة يالربع هذا منطقنا إحنا؟؟

الحين نرد على الناس اللي دشوا يتطمشون على عالم المدونين من الاربعا ليما اليوم

شلون بينظرون لنا ولأسلوبنا

مو معقولة ان اسلوبنا يصير السب والصراخ الكتابي على كل من يخالفنا

خصوصا اذا كنا ندري ان اللي يخالفنا مو مسير بل صاحب راي معروف والسنين تشهد له

كلنا نغلط لكن خل نعترف باغلاطنا

واذا كان تعميم الدعيج غلطة كبيرة وما ينسكت عنها

فأكيد ان ردنا بالسب غلطة هم كبيرة ومو صحيحة ابد

آخر شي

نيو يقول عن رويشد هيلقي

ناسي ان بوفهمي كان يصور الأغاني وفي مرق على دشداشته

احب اوضح لك يا نيو ان رويشد خط احمر

وطمني بس
:p

فــشّـوها

الشباب عند ويهك

ذكرت الوزيرة أنها تسلمت كثيرا من المطالبات والمقتطفات من النواب الشيعة في مناهج التربية الإسلامية، وهم يرون أنها تتعارض مع الطائفة الشيعية، مشيرة الى أنها رفعت ما تسلمته من النواب الى اللجان المختصة للنظر فيها، مبينة أن 'مناهج التربية الإسلامية فيها بعض الأمور الحساسة ويكون عليها اختلاف، وهي الآن معروضة على اللجان المختصة'

طبعا ماكو شي غلط بكلام الوزيرة

ناس عندهم ملاحظات على المناهج

قالوها لوزيرة المناهج

وزيرة المناهج ودتها حق لجان اكاديمية مختصه بالمناهج

يقيمون الملاحظات منطقية او لأ

يعني انا اروح حق هلال الساير وزير الصحة

اقوله ترى ال
MRI
يطول وايد على ما نحصل موعد

يدز الموضوع حق المختصين

يشوفون كلامي صحيح ولا لأ

بس ربعنا لا بالشوفة حق اي سالفة يحسون ان فيها خلاف مذهبي

والله اني احسهم اول ما يشوفون مواضيع جذيه

يقولون هيّه

هايف والطبطبائي مصرحين المناهج ما فيها شي

شدراكم؟؟

اذا الوزيرة بروحها ما تدري وحولتها على اللجان

وصالح عاشور الله خير شكله حاط خدمة
RSS
حق الطبطبائي أول ما يقول شي هذا ينط له

استحوا على ويوهكم شوي بس

خلاف من 1400 سنة تتناجرون فيه ليما اليوم

شغل يهال هذا؟

شغل الوزيرة صح وكل شغل الباجين من اللي تكلموا غلط

وهم الوشيحي اليوم الله يهداه يقول ان الحكومة طلّعت سلاح الطائفية

اي ندري ان الحكومة استغلت وما زالت تستغل هالموضوع من عمر

بس هالمرة نقص الحق من نفسنا شوي ونقول الحكومة براءة وكلام وشغل الوزيرة عدل

وعويذ الله منكم

لا تــتــعــنــتــر

وزير الداخلية يقول

لا اهتم بكل ما يقال او يطرح.. وواثق من خطواتي التي تعزز موقفي في حكومة رئيس الوزراء, فموقفي قوي داخل مجلس الوزراء وكذا في مجلس الامة, وليقل النواب ما يقولون, فالحمد لله وضعنا "لا يخوف" ونعمل في وضح النهار
وفي سياق تأكيده على اطمئنانه الى سلامة موقفه قال الوزير "الكويت كلها واقفة معي وأنا لا ألوم المجروح, بل على العكس انا "مستانس" على صياحه, خلهم يقولون ما يقولون

وأنا أقول لك لا تـتـعـنـتـر وايد

وجاوب ولا تتنحش؟؟

كتاب النيابة متى ياك؟
قبل أو بعد جلسة طرح الثقة؟

وإذا ياك قبل الجلسة أو بعدها شنو رديت عليه

هذي كل القضية خلصنا ترى بروحه غبار وحر ومالنا خلق عوار راس

اذا ضللت الناس كلها وصدق الكلام استقيل ولا تنطر تقال

شنو الكويت كلها واقفه معاي شدعوه نادي القادسية انت؟؟

مسألة غير قابلة للنقاش رد على السؤال البسيط واذا الاعلام قدرت تسيطر على عدد كبير منه

احنا لأ

إي على فكرة هذا بالون إختبار من جريدة الشاهد يبون يعرفون في اوراق عند اللي ضد جابر الخالد أو لأ

لا تطيحون بهالفخ وتطلعون أوراقكم قبل لا يجاوب


وماشي درب الزلق لا يامن الطيحه

صج؟

سارت الأمور طبيعية بعد ذلك، الأمن مستتب والناس تأكل السندوتش، لكن، مساء الأربعاء الماضي، بلغني أنه لا توجد قضية في النيابة تخص هذا الموضوع، أبداً، تخيّل!، أكرر، 'ماااااكو قضية في النيابة' في هذا الخصوص، سمعت يا سلمان؟ ماااااكو قضية يا نوابنا ويا وزراءنا، ماااااكو قضية يا ناس. كان مقلباً بالنعناع وشربناه بالهناء والشفاء

هذا مقال الوشيحي اليوم

الوشيحي من مصادره المتعددة يقول إن ماكو قضية أحيلت للنيابة بشأن الخمس ملايين المهدرة بسالفة اعلانات 2008

وهذا ما يعني ان اي حجة لبقاء الوزير زالت

اذا كان هناك من وقف ضد طرح الثقة لعدم الدستورية مثلا

فعدم احالة القضية للنيابة يعني استمرار العمل المعيب اذا المقصلة السياسية هي جزاء الوزير بدون تردد

واذا كان هناك من يقول عدم موائمة سياسية وتصعيد مع بداية المجلس وعلى هالاساس رفض طرح الثقة

فتصرف الوزير قلة أدب سياسية تحتاج لفريق الإزالة إن صدق كلام الوشيحي

وان كان من يشوف السالفة انها معركة مناطق داخلية وخارجية

هذا نقوله كل تبن

نبي المعلومة الأكيدة من الحكومة مع ورق مثبت يفند كلام ومصادر الوشيحي والا

تضحك علي؟

إعتزلوا !!؟؟

أول شي مدونة يديدة إسمها صوت الكويت زوروها

ثاني شي

شدعوه محد نقل لنا اللقاء اللي طلبه صالح الملا مع الشباب

نورونا يا ناس

ثالث شي واهوا الموضوع

صار لنا 9 ايام على جلسة طرح الثقة

اللي نتايج تصويتها ما عجبت وايد ناس وبالأخص المدونين

وقرروا يعتزلون المواضيع السياسية الظاهر

وأنا طقتني البوهة على قولة ساحة الصفاة

طيب أفهم مواقفكم كلها

وإذا كنتوا تعتبرون رفض طرح الثقة طراق

فماهو أول طراق ولا راح يكون آخر طراق ابد

وهذا الشي اللي يخليني أستغرب

مو عاجبتكم مواقف النواب

تعتقدون انهم فرطوا بالمال العام

خلاص لا تساعدونهم بالانتخابات اليايه شالقضيه يعني؟؟

بس انكم توقفون الكلام وما تتكلمون بالسياسة لأنكم تعتقدون إن النواب المحسوبين علينا باعوا المال العام

بعد هذي غير شغله

برايي ان التدوين اهوا لتوعية الناس اكثر من توعية النواب والوزرا

وعلى هالاساس لازم نستمر بالكلام لتوعية الناس

لا تعجبنا المواقف

لا يعجبنا ولا نائب ولا وزير

خل نعجب انفسنا ونقتنع بآرائنا بس ونوصلها

آخر شي

أحمد الفهد لما يطالب بتغيير اللائحة عشان يرد وزير مكان وزير

بغض النظر عن هبل كلامه

بس هذا قاعد يقول عنك يا بوصباح وعن أفضل ناس برايك واللي انت اخترتهم انهم ما يعرفون يتكلمون

مو عيب ؟؟

وإعتزلت الغرام

هم هذا سكتووووه

تحديث
::::::::::::
الليله سبع ونص بساحة الارادة لمرور عام على اختفاء حسين الفضالة

وهذي رسالة من صالح الملا بعد

أخي العزيز عاجل... كل الشكر عزيزي لتفضلك بنشر الرسالة التي بعثتها لك و الشكر موصول لكل الأخوات و الأخوة اللذين تكبدوا عناء قراءتها و التفاعل معها سلباً أم إيجابا، و سواء فُهم الغرض من الرسالة و الدعوة بالشكل المطلوب أو فُسر بشكل جانبه الصواب ، غير أنني لا يمكن أن أضع سوى حسن و طيب النية في كلتا الحالتين. لذا يسرني أن أُجدد دعوتي لكل الأخوات و الإخوة المدونين و لكل من يريد سماع حقيقة موقفي من قضيه طرح الثقة و غيرها من القضايا الوطنية معلناً كل الأسباب و الحقائق لعلها تقنع البعض أو تريح البعض الآخر (و إن اختلف معي بالرأي) بأنني مازلت ذلك الشخص الذي يتخذ قناعاته وفق إطار الدستور و المبادئ الوطنية التي ورثناها و مازلنا متمسكين بها و لم أتعود أن ابرر أو ُأُلون المواقف التي أتخذها عن قناعه فإما أن أدافع عنها و إما أن أعترف بالخطأ إن أخطأت. و لكل من تساءل عن الدعوه المتأخرة بعد جلسه طرح الثقة ...أقول بأنني قد استشرت و اجتمعت بقواعد القوى الوطنية لاسبوعين متتاليين قبل الاستجواب و قبل طرح الثقة في ديوان المرحوم سامي المنيس في منطقه العديليه و الذي يعرف الجميع بأنه الديوان الذي أتواجد فيه رسميا كل يوم أربعاء الساعة 8:30 مساءا من كل اسبوع منذ أن أصبحت نائباً كما هي عادة أستاذنا المرحوم أبو أحمد

نظرا لتزامن الدعوة مع الاعتصام المزمع إقامته غدا الثلاثاء في ساحة الاراده أحياءا للذكرى الأولى لللمفقود حسين الفضالة و لعلمنا برغبة معظم المدونين و المدونات حضور هذه المناسبة المهمة و رغبتي الشخصية حضورها أيضا فإنني استسمحك و الأخوات و الأخوة في أن يتم تأجيل لقاؤنا ليوم الأربعاء الساعة السابعة مساءاً في ديوان الملا أو كما أسلفت بأن يتم تحديد الموعد حسب رغبه الجميع

:::::::::::::

أول شي باجر الثلاثا اعتصام بساحة الإرادة الساعة 7 ونص مساءا بمناسبة مرور سنة كاملة على إختفاء ولد هالأرض حسين الفضالة

وطبعا بومحمد صالح الملا كان قايل لنا انها وده يلتقي بالشباب عنده بالديوان بنفس الوقت

وعشان ما يتعارضون النشاطين مع بعض اتمنى من نائبنا صالح الملا يأجل لقاءه ويبلغنا بالموعد اليديد لو يتكرم

عموما قبل لا أدش بسالفتي بقول شي

النائب لما ينتخب من الناس يعتبر كتوكيل منهم للنائب لإتخاذ المواقف نيابة عنهم

وإهوا طول مدة نيابته غير ملزم إن يقعد مع الناخبين قبل إتخاذ المواقف

أعطيكم مثال بسيط

بوعبدالعزيز أحمد السعدون مثلا ما قعد مع ناخبين دائرته قبل إستمراره بالتكتل الشعبي على الرغم من وجود متعدين على هالقانون بالتكتل الشعبي

وهذا القرار يحق له بحكم إنه موكّل من الناس

وإئتمنوه على أصواتهم ورايهم

يبقى إنهم بعد نهاية المجلس اذا نزل أهما يقررون ان يوكلونه من يديد او لأ

نفس الشي يطبق على كل النواب بما فيهم صالح الملا

صالح اتخذ موقف ضد طرح الثقة وماكان ملزم يقعد مع الناخبين قبل اتخاذ الموقف هذا

والحين طلب يقعد مع الشباب خصوصا لشرح وجهة نظره وقناعته

وعشان جذيه اعتقد ان مو من السليم ان نقاطعه ونقول ليش ما اخذ راينا قبل الجلسة لأنه مو ملزم ياخذ راينا

واتمنى ما نعاديه قبل لا نسمعه

وانا اشوف ان خطوته لشرح الموقف للشباب خطوة جيدة اتمنى انها تفتح لنا باب للحوار

ندش بالسالفة

ماني من معجبين مسلم البراك أبدا

ولا أعتقد إنه ضمير الأمة مثل ما يسمونه أبدا

ولا كنت أبي اتكلم بصراع التصاريح بينه وبين ناصر الخرافي ابدا

قبل لا ينزل آخر رد على مسلم البراك

لكن هذي العبارة إستثارتني جدا جدا

لقد ذكرت يا أخ مسلم أنه لم يبقى إلا أن تكون مسئولا عن الغزو العراقي بعد أن سطرنا حالات الفشل التي تسببت بعودة البلد إلى الوراء، وأقولها نعم أنتم والذئاب من ساهم وساعد الغزاة وشجعوهم على الاعتداء على أراضينا بمحاولاتكم إضعاف الحكومة والسلطة وقتها ، وما يؤكد هذا النظر صراخكم على ما تسمونه بدول الضد لتعويض قصوركم وإخفاء مسئوليتكم عما حدث

ناصر الخرافي

إنت ما تستحي على ويهك؟؟

لا من صجي أتكلم ومو سؤال عابر

لا لا جاوب إنت ما تستحي على ويهك؟؟

الحين بتحمل أهل الكويت سالفة الغزو؟؟

منو حاول إضعاف الحكومة وشلون

مو المجلس كان ماشي حسب الأصول ليما تقدم إستجواب حق أخوك وحق علي الخليفة

وكانت النتيجة إلغاء الدستور ومجلس وطني "نغل" يعني مولود غير شرعي

وكان إخوك عضو في هالمجلس النغل بحكم منصبه بالوزارة

الحين اخوك وغيره يستبيحون القانون فيصير المدافع عن القانون والدستور بذاك الوقت سبب الغزو؟؟

لا تجاوب لانك صج ما تستحي

إي وعلى فكرة بس يابو العطاء السخي صاير لي جاسم يعقوب

وإحنا قدمنا وعطينا وبذلنا ومادري شسويتوا

ممكن تقول لي جم دفعت لكم الحكومة على ستاد جابر؟؟

التكلفة 50 مليون دينار والتسليم ب 2006

طبعا التسليم مع النواقص الوايد صار ب 2009

والتكلفة انت قولها

يا شهبندر

أخيرا

They don't care about us